ວັນທີ 25 ມີນາ 2025, ທີ່ມະຫາວິທະຍາໄລແຫ່ງຊາດ, ວິທະຍາເຂດດົງໂດກ, ນະຄອນຫລວງວຽງຈັນ ສປປ ລາວ ໄດ້ຮ່ວມກັບບັນດາປະເທດສະມາຊິກອາຊຽນ ສະ ເຫຼີມສະຫຼອງ ວັນສັງຄົມສົງເຄາະ ອາຊຽນ ເພື່ອຍົກສູງບົດບາດອັນສໍາຄັນຂອງນັກສັງຄົມສົງເຄາະ ແລະ ບຸກຄະລາກອນ ສັງຄົມສົງເຄາະໃນການຫຼຸດຜ່ອນຄວາມສ່ຽງຈາກໄພພິບັດ ແລະ ການສ້າງຄວາມທົນທານຕໍ່ການປ່ຽນແປງສະພາບດິນຟ້າອາກາດ.
ທ່ານ ສາດສະດາຈານ ປະຣິນຍາເອກ ເດຊານູລາດ ແສນດວງເດດ, ວ່າການອະທິການບໍດີ ມະຫາວິທະຍາໄລແຫ່ງຊາດ ກ່າວວ່າ: ການສະເຫຼີມສະຫຼອງຄັ້ງນີ້ ເປັນເວທີທີ່ສໍາຄັນເສີມສ້າງ ການຮ່ວມມື, ພັດທະນານະໂຍບາຍ ແລະ ສ້າງຄວາມເຂັ້ມແຂງໃຫ້ແກ່ວຽກງານສັງຄົມສົງເຄາະ ເພື່ອປະກອບສ່ວນເຂົ້າໃນການຫຼຸດຜ່ອນຄວາມສ່ຽງຈາກໄພພິບັດ ແລະ ການສ້າງຄວາມທົນທານຕໍ່ສະພາບ ດິນຟ້າອາກາດ
ສປປ ລາວ ກໍາລັງຮ່າງກົດໝາຍວ່າດ້ວຍວຽກງານສັງຄົມສົງເຄາະ, ເຊິ່ງເປັນກົດໝາຍສະບັບທຳ ອິດກ່ຽວກັບວຽກງານສັງຄົມສົງເຄາະຂອງປະເທດ, ຄາດວ່າກົດໝາຍສະບັບນີ້ຈະຖືກຮັບຮອງ ໃນທ້າຍ ປີນີ້. ພາຍໃຕ້ກົດໝາຍດັ່ງກ່າວ ວິຊາຊີບສັງຄົມສົງເຄາະຈະໄດ້ຮັບການພັດທະນາ ແລະ ຮັບປະກັນບໍລິການທີ່ມີຄຸນນະພາບ.
ໃນຂະນະດຽວກັນ, ມະຫາວິທະຍາໄລແຫ່ງຊາດ ກໍ່ໄດ້ປັບປຸງຫຼັກສູດປະລິນຍາຕີພາກວິຊາສັງຄົມສົງເຄາະ ເພື່ອລວມເອົາຫົວຂໍ້ການຫຼຸດຜ່ອນຄວາມສ່ຽງຈາກໄພພິບັດ ແລະ ສະ ພາບອາກາດເຂົ້າໃນຫຼັກສູດດັ່ງກ່າວ, ເພື່ອກຽມພ້ອມນັກສຶກສາສຳລັບການແກ້ໄຂສິ່ງທ້າທາຍຈາກການປ່ຽນແປງດິນຟ້າອາກາດ ແລະ ຄວາມສ່ຽງທາງດ້ານສັງຄົມ.
