ເມືອງໄຊສະຖານ ສໍາເລັດກອງປະຊຸມໃຫຍ່ອົງຄະນະພັກ ຄັ້ງທີ III

ກອງປະຊຸມໃຫຍ່ຄັ້ງທີ III ຂອງຜູ້ແທນອົງຄະນະພັກເມືອງໄຊສະຖານ, ແຂວງໄຊຍະບູລີ ໄດ້ສໍາເລັດລົງຢ່າງເປັນທາງການໃນວັນທີ 27 ມີນາຜ່ານມາ ໂດຍການເຂົ້າ ຮ່ວມຂອງ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ ເລຂາຄະນະບໍລິຫານງານພັກແຂວງ.

ກອງປະຊຸມ ໄດ້ພ້ອມກັນທົບທວນຄືນຜົນງານ ແລະ ໄຊຊະນະທີ່ຍາດມາໄດ້, ຈຸດອ່ອນຂໍ້ຄົງຄ້າງ, ສະຫຼຸບຖອດຖອນບົດຮຽນ, ຄົ້ນຄວ້າ ແລະ ເປັນເອກະພາບກັນຮັບຮອງເອົາບົດລາຍງານການເມືອງ, ແຜນ​ພັດທະນາ​ເສດຖະກິດ-ສັງຄົມ, ບົດ​ສໍາ​ຫຼວດການ​ນໍາພາ​ລວມ ແລະ ທິດທາງແຜນການ 5 ປີ 2025-2029. ກອງປະຊຸມຜູ້ແທນສົມບູນໄດ້ປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ຈໍານວນ 21 ສະຫາຍ, ຍິງ 2 ສະຫາຍ, ປ່ອນບັດເອົາຜູ້ແທນສົມບູນຈໍານວນ 11 ສະ ຫາຍ, ຍິງ 2 ສະຫາຍ ແລະ ຜູ້ແທນສໍາຮອງຈໍານວນ 2 ສະຫາຍ ເພື່ອໄປຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງ.

ກອງປະຊຸມຄັ້ງປະຖົມມະລຶກ ເລືອກຕັ້ງເອົາຄະນະປະຈໍາພັກເມືອງຈໍານວນ 7 ສະຫາຍ, ໂດຍປະຊາມະຕິຮັບຮອງເອົາສະຫາຍ ພັທ ພອນສະຫວັນ ວໍລະສັກ ເປັນເລຂາຄະນະບໍລິງານພັກເມືອງ, ສະຫາຍ ສົມສະນິດ ວົງສີ ແລະ ສະຫາຍ ແສງຈັນ ກິນດາລາ ເປັນຮອງເລຂາ, ເລືອກເອົາສະຫາຍ ຄໍາຮັກ ສີດາພອນ ເປັນປະທານ, ສະຫາຍ ສະແຫວງ ຊົງ ແລະ ສະຫາຍ ດາວິນ ສຸວັນນະແສງ ເປັນຮອງປະທານຄະນະກວດກາພັກເມືອງ.

ໃນໂອກາດນີ້, ສະຫາຍ ພົງສະຫວັນ ສິດທະວົງ ໄດ້ເນັ້ນໜັກໃຫ້ຄະນະບໍລິຫານງານພັກເມືອງຊຸດໃໝ່ຈົ່ງສຶບຕໍ່ນໍາເອົາແນວທາງ ປກຊ-ປກສ ທົ່ວປວງຊົນຮອບດ້ານຂອງພັກ ໄປເຜີຍແຜ່ເຊື່ອມຊືມໃຫ້ແກ່ພະນັກງານ, ສະມາຊິກພັກ, ກໍາລັງປະກອບອາວຸດ ແລະ ປະຊາຊົນບັນດາເຜົ່າຢ່າງກວ້າງຂວາງ-ເລິກເຊິ່ງ, ເຮັດໃຫ້ວຽກງານດັ່ງກ່າວກາຍເປັນຂອງປະຊາຊົນ, ຂອງສັງຄົມ ທຸກຄົນຢ່າງແທ້ຈິງ, ເຮັດໃຫ້ຊາຍແດນເບື້ອງຕາເວັນຕົກ ມີຄວາມສະຫງົບ, ປອດໄພ, ສືບຕໍ່ຊຸກຍູ້ສົ່ງເສີມການປູກຝັງ ແລະ ລ້ຽງສັດໃຫ້ກາຍເປັນສິນຄ້າປາຍແຫຼມຂອງເມືອງ, ເຮັດໃຫ້ປະຊາຊົນມີອາຊີບໝັ້ນທ່ຽງ, ຫຼຸດຜ່ອນ ແລະ ກ້າວໄປເຖິງການຢຸດຕິການເຮັດໄຮ່ປູກເຂົ້າ ຫັນມາເອົາລາຍຮັບຈາກການຂາຍສິນຄ້າປະເພດອື່ນໆທົດແທນ ແລະ ອື່ນໆ.

ຂ່າວ-ພາບໂດຍ: ອຸ່ນເຮືອນ ໂພທິລັກ