ແຂວງຈໍາປາສັກ ປາຖະກະຖາເລົ່າຄືນມູນເຊື້ອວັນສ້າງຕັ້ງກໍາລັງ ປກສ ປະຊາຊົນ ຄົບຮອບ 64 ປີ
ວັນທີ 2 ເມສາ 2025, ແຂວງຈໍາປາສັກ ໄດ້ຈັດພິທີປາຖະກະຖາເລົ່າຄືນມູນເຊື້ອວັນສ້າງຕັ້ງກໍາລັງປ້ອງກັນຄວາມສະຫງົບ (ປກສ) ປະຊາຊົນ ຄົບຮອບ 64 ປີ(5/4/1961 - 5/4/2025). ພິທີຈັດຂຶ້ນຢູ່ຫ້ອງປະຊຸມກອງບັນຊາການ ປກສ ແຂວງ ໂດຍການໃຫ້ກຽດເຂົ້າຮ່ວມ ທ່ານ ອາລຸນໄຊ ສູນນະລາດ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຈໍາປາສັກ ປະທານຄະນະກໍາມະການປ້ອງກັນຊາດ - ປ້ອງກັນຄວາມສະຫງົບແຂວງ. ມີທ່ານ ພົນຈັດຕະວາ ສຸກພະຈັັນ ສີລາເພັດ ກໍາມະການພັກແຂວງ ເລຂາອົງຄະນະພັກ ຫົວໜ້າກອງບັນຊາການ ປກສ ແຂວງ ພ້ອມດ້ວຍການນໍາແຂວງ, ການນໍາພະແນກການກົມກອງອ້ອມຂ້າງແຂວງ, ຄະນະພັກ - ຄະນະບັນຊາກອງບັນຊາການທະຫານແຂວງ, ຄະນະພັກ - ຄະນະບັນຊາ, ນາຍ ແລະ ພົນທະຫານຕໍາຫຼວດກອງບັນຊາການ ປກສ ແຂວງ ເຂົ້າຮ່ວມ.
ໃນພິທີ, ທ່ານ ອາລຸນໄຊ ສູນນະລາດ ໄດ້ໃຫ້ກຽດບັນລະຍາຍເອກະສານເສີມຂະຫຍາຍທາດແທ້ມູນເຊື້ອປະຕິວັດຂອງກໍາລັງ ປກສ ປະຊາຊົນ ຄົບຮອບ 64 ປີ (5/4/1961 - 5/4/2025) ໂດຍຍົກໃຫ້ເຫັນປະຫວັດການການກໍາເນີດ ແລະ ການເຕີບໃຫຍ່ຂະຫຍາຍຕົວຂອງກໍາລັງ ປກສ ປະຊາຊົນ, ສະພາບແວດລ້ອມກ່ອນການສ້າງຕັ້ງກໍາລັງ ປກສ ປະຊາຊົນ ກ່ອນປີ 1961, ສາເຫດ - ຄວາມໝາຍສໍາຄັນຂອງການສ້າງຕັ້ງ ກໍາລັງ ປກສ ປະຊາຊົນ; ການກໍາເນີດ ແລະ ການເຕີບໃຫຍ່ຂະຫຍາຍຕົວຂອງກໍາລັງ ປກສ ປະຊາຊົນ ໃນແຕ່ລະໄລຍະ, ນັບແຕ່ໄລຍະການກໍາເນີດຂອງກໍາລັງ ປກສ ປະຊາຊົນ ໃນປີ 1961, ກໍາລັງ ປກສ ປະຊາຊົນ ກັບ ພາລະກິດຕໍ່ສູ້ປົດປ່ອຍປະເທດຊາດ ໄລຍະປີ 1961 - 1975, ກໍາລັງ ປກສ ປະຊາຊົນ ກັບ ການປົກປັກຮັກສາ ແລະ ບູລະນະລະບອບໃໝ່ ໄລຍະປີ 1976 - 2985, ກໍາລັງ ປກສ ປະຊາຊົນ ກັບ ການປົກປັກຮັກສາ ແລະ ພັດທະນາປະເທດຊາດ ໄລຍະປີ 1986 - 2016, ໄລຍະ 2017 - ປັດຈຸບັນ. ຍົກໃຫ້ເຫັນຜົນງານທີ່ພົ້ນເດັ່ນຂອງກໍາລັງ ປກສ ປະຊາຊົນ, ທາດແທ້ ແລະ ມູນເຊື້ອອັນສະຫງ່າງາມຂອງ ກໍາລັງ ປກສ ປະຊາຊົນ.
ພ້ອມນີ້, ທ່ານ ອາລຸນໄຊ ສູນນະລາດ ຍັງມີຄໍາເຫັນເນັ້ນໜັກ ສູນນະລາດ ຍັງມີຄໍາເຫັນເນັ້ນໜັກໃຫ້ ຄະນະພັກ - ຄະນະບັນຊາ, ນາຍ ແລະ ພົນຕໍາຫຼວດ ເອົາໃຈໃສ່ເສີມຂະຫຍາຍທາດແທ້ຂອງກໍາລັງ ປກສ ປະຊາຊົນ, ເພີ່ມທະວີການຈັດຕັ້ງປະຕິບັດແນວທາງປ້ອງກັນຊາດ - ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ ໃຫ້ມີທັງປະລິມານ ແລະ ຄຸນນະພາບ, ມີຜົນສໍາເລັດຕາມຄາດໝາຍ; ຕັ້ງໜ້າແກ້ໄຂປາກົດການຫຍໍ້ທໍ້ທີ່ເກີດຂຶ້ນໃນຖັນແຖວການຈັດຕັ້ງ ແລະ ໃນສັງຄົມ ເພື່ອເປັນແບບຢ່າງໃຫ້ແກ່ສັງຄົມ, ຫັນລົງກໍ່ສ້າງຮາກຖານຢ່າງແຂງແຮງ; ເປັນເຈົ້າການຊອກຮູ້ກໍາແໜ້ນກົນອຸບາຍມ້າງເພທໍາລາຍຂອງສັດຕູ ແລະ ກຸ່ມຄົນບໍ່ດີ, ກໍາແໜ້ນສະພາບການສາກົນ ແລະ ພາກພື້ນ, ຊອກຮູ້ຮໍ່າຮຽນ, ກໍາແໜ້ນການເຄື່ອນໄຫວຂອງພົນລະເມືອງ; ເອົາໃຈໃສ່ຈັດຕັ້ງຜັນຂະຫຍາຍ 3 ທາດແທ້, 7 ມູນເຊື້ອ ຕາມທິດກໍ່ສ້າງ ແລະ ປັບປຸງກໍາລັງ ປກສ ປະຊາຊົນ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ; ຍົກສູງປະສິດທິພາບ ແລະ ປະສິດທິຜົນ ໃນການເຄື່ອນໄກວວຽກງານ ປກຊ - ປກສ ໃຫ້ນັບມື້ສູງຂຶ້ນ; ຄົ້ນຄວ້າປັດໄຈທຶນຮອນປະກອບສ່ວນໃນການພັດທະນາພື້ນຖານວັດຖຸເຕັກນິກ, ວັດຖຸອຸປະກອນທີ່ທັນສະໄໝ ຮັບໃຊ້ໃນການເຄື່ອນໄຫວວຽກງານ; ເຊື່ອມຊຶມມູນເຊື້ອ ແລະ ອອກແຮງຄົ້ນຄວ້າສຶກສາຮໍ່າຮຽນບໍາລຸງກໍາລັງ ໃຫ້ມີລະດັບຄວາມຮູ້, ຄວາມສາມາດ ໃຫ້ສົມຄູ່ກັບໜ້າທີ່ວຽກງານ, ມີຄຸນທາດການເມືືງທີ່ໜັກແໜ້ນ; ຫັນແຜນງານ - ໂຄງການ ທີ່ກະຊວງ ປກສ ປະຊາຊົນ ວາງອອກ ມາເປັນແຜນງານ, ແຜນການອັນລະອຽດ ແລະ ພ້ອມກັນຈັດຕັ້ງປະຕິບັດ ໃຫ້ມີຜົນສໍາເລັດ. ສ້າງວຽກງານພາລາທິການກັບທີ່ ຕາມທິດ ສອຈ, ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເພື່ອພັດທະນາຊີວິດການເປັນຢູ່ຂອງອ້າຍນ້ອງໃນກໍາລັງ ໃຫ້ມີຢູ່ມີກິນ; ເອົາໃຈໃສ່ການພົວພັນຮ່ວມມືກັບປະເທດເພື່ອມິດຍຸດທະສາດ ທີ່ຮັກຫອມສັນຕິພາບ ແລະ ປະເທດບ້ານໃກ້ເຮືອນຄຽງ ຕື່ມອີກ.
ຕອນທ້າຍ, ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານພັກແຂວງ ເຈົ້າແຂວງຈໍາປາສັກ ປະທານຄະນະກໍາມະການປ້ອງກັນຊາດ - ປ້ອງກັນຄວາມສະຫງົບແຂວງ ກໍໄດ້ມອບເງິນ 110 ລ້ານກີບ ແລະ ຄອມພິວເຕີຕັ້ງໂຕະ 10 ຊຸດ ມູນຄ່າ 150 ລ້ານກີບ ລວມມູນຄ່າ 260 ລ້ານກີບ ໃຫ້ແກ່ກອງບັນຊາການ ປກສ ແຂວງ ເພື່ອປະກອບສ່ວນໃນການເຄື່ອນໄຫວວຽກງານ ປກສ ໃຫ້ມີຄວາມສະດວກສະບາຍ ແລະ ນັບມື້ເຕີບໃຫຍ່ຂະຫຍາຍຕົວ.
ຂ່າວ-ພາບ: ທູນທອງໃຈ
