ວັນທີ 8 ພຶດສະພາ 2025 ນີ້, ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ໄດ້ຕີລາຄາສູງຕໍ່ນິຄົມອຸດສາຫະກໍາການປະມົງລ້ຽງປາສະຫວາຍແມ່ນໍ້າຂອງ ທີ່ຈີນລົງທຶນຢູ່ແຂວງຈໍາປາສັກ, ຜ່ານການລົງຕິດຕາມຕົວຈິງແຕ່ຂັ້ນເລີ່ມສ້າງນິຄົມອຸດສາຫະກໍາ ທ່ານເຈົ້າແຂວງຈໍາປາສັກ ໄດ້ໃຫ້ສໍາພາດຕໍ່ CMG ເວົ້າວ່າ, ເຂດອຸດສາຫະກຳປາສະຫວາຍ ຢູ່ເມືອງໂຂງ ແຂວງຈຳປາສັກ ເປັນໂຄງການຍຸດທະສາດ ທີ່ມີບົດບາດສຳຄັນໃນການພັດທະນາເສດຖະກິດ-ສັງຄົມ ແລະ ສ້າງສາຍພົວພັນມິດຕະພາບ ລາວ-ຈີນ.
ທ່ານເຈົ້າແຂວງຈໍາປາສັກກ່າວວ່າ: ໂຄງການນິຄົມອຸດສາຫະກໍາການປະມົງການລ້ຽງປາສະຫວາຍແມ່ນໍ້າຂອງ ຢູ່ບ້ານບຶງງາມ ເມືອງໂຂງ ແຂວງຈໍາປາສັກທີ່ຈີນລົງທຶນ ໄດ້ສະແດງໃຫ້ເຫັນຄວາມໝັ້ນຄົງຂອງການຮ່ວມມືລະຫວ່າງສອງປະເທດ. ໂຄງການດັ່ງກ່າວແມ່ນສອດຄ່ອງກັບ ຍຸດທະສາດ “ໜຶ່ງແລວ ໜຶ່ງເສັ້ນທາງ” ການສ້າງເສດຖະກິດ, ສ້າງວຽກເຮັດງານທຳ ແລະ ສົ່ງເສີມອຸດສາຫະກຳປາຂອງແຂວງ, ເພີ່ມມູນຄ່າການສົ່ງອອກແລະເສີມຂະຫຍາຍສາຍພົວພັນ ລາວ-ຈີນ. ການມີສ່ວນຮ່ວມຂອງນັກລົງທຶນຈີນຊ່ວຍສ້າງເສັ້ນທາງເສດຖະກິດທີ່ມີຊີວິດຊີວາ ລະຫວ່າງສອງປະເທດ ພ້ອມການແລກປ່ຽນເຕັກໂນໂລຊີ ແລະ ຄວາມຮູ້.
ທ່ານ ອາລຸນໄຊ ສູນນະລາດ ກ່າວຕື່ມອີກວ່າ, ນິຄົມອຸດສາຫະກໍາການປະມົງປາສະຫຍາວແມ່ນໍ້າຂອງ ໄດ້ສ້າງລາຍຮັບຈາກການສົ່ງອອກ ແລະ ສ້າງວຽກເຮັດງານທຳໃຫ້ຊາວບ້ານ ຊ່ວຍພັດທະນາຊີວິດການເປັນຢູ່ຂອງຊຸມຊົນທ້ອງຖິ່ນ, ເສີມສ້າງຄວາມໝັ້ນຄົງດ້ານພູມປັນຍາ ແລະ ຄວາມສາມັກຄີລະຫວ່າງປະເທດ. ເຂດອຸດສາຫະກຳປາສະຫວາຍ ບໍ່ພຽງແຕ່ເປັນແຫຼ່ງພັດທະນາເສດຖະກິດທ້ອງຖິ່ນ ແຕ່ຍັງເປັນການເສີມຂະຫຍາຍສາຍພົວພັນ ລາວ-ຈີນ ຕາມແນວທາງຍຸດທະສາດຂອງລັດຖະບານທັງສອງຝ່າຍ.
ຂ່າວ: CMG FM93
