ຊຸມປີມໍ່ໆມານີ້, ຄຽງຄູ່ກັບນັກທ່ອງທ່ຽວຕ່າງປະເທດເຂົ້າມາທ່ຽວຢູ່ຈີນເພີ່ມຂຶ້ນຢ່າງຕໍ່ເນື່ອງ, ການເຂົ້າເມືອງຈີນເພື່ອທ່ອງທ່ຽວທັງຈັດຊື້ສິນຄ້າ ພວມກາຍເປັນທ່າອ່ຽງໃໝ່ໃນດ້ານການບໍລິໂພກ, ຕົວຢ່າງ: ສາມາດທ່ອງທ່ຽວປະເທດຈີນທີ່ມີຫຼາກຫຼາຍສີສັນຍ້ອນມີນະໂຍບາຍຍົກເວັ້ນວີຊາ, ຈັດຊື້ສິນຄ້າຢູ່ທ້ອງຖິ່ນຍັງສາມາດຄືນເງິນພາສີຢູ່ກັບທີ່ ແລະອື່ນໆ. ຄຽງຄູ່ກັບຈີນປັບປຸງນະໂຍບາຍການທ່ອງທ່ຽວໃຫ້ດີຂຶ້ນຢ່າງຕໍ່ເນື່ອງ, “ການທ່ຽວເມືອງຈີນ” ມີມົນສະເໜ່ເພີ່ມຂຶ້ນຢ່າງຕໍ່ເນື່ອງ, ນັກທ່ອງທ່ຽວຕ່າງປະເທດນັບມື້ນັບຫຼາຍໄດ້ເລີ່ມນິຍົມຈັດຊື້ສິນຄ້າຢູ່ຈີນໄປພ້ອມກັບການທ່ຽວຊົມທິວທັດທີ່ສວຍງາມຂອງຈີນ.
ການສະໜັບສະໜູນດ້ານນະໂຍບາຍແມ່ນໜຶ່ງໃນປັດໄຈສຳຄັນທີ່ຊຸກຍູ້ກະແສນິຍົມການເຂົ້າເມືອງຈີນເພື່ອທ່ອງທ່ຽວທັງຈັດຊື້ສິນຄ້າ. ປີ 2025, ລັດຖະບານຈີນໄດ້ປັບປຸງນະໂຍບາຍເພື່ອຄືນເງິນພາສີໃນຕອນອອກເມືອງໃຫ້ສົມບູນຕື່ມອີກ ໂດຍໄດ້ປັບຫຼຸດຈໍານວນພື້ນຖານທີ່ສາມາດຄືນເງິນພາສີຈາກ 500 ຢວນລົງມາເປັນ 200 ຢວນ, ທັງໄດ້ປັບຈຳນວນເງິນສູງສຸດໃນການຄືນເງິນສົດພາສີຈາກ 1 ໝື່ນຢວນຂຶ້ນເປັນ 2 ໝື່ນຢວນ, ການປັບປຸງນະໂຍບາຍດັ່ງກ່າວໄດ້ຍົກສູງຄວາມຕ້ອງການຈັດຊື້ສິນຄ້າຂອງນັກທ່ອງທ່ຽວຕ່າງປະເທດ, ນັກທ່ອງທ່ຽວຕ່າງປະເທດຈຳນວນໜຶ່ງຍັງພົບເຫັນວ່າ ລາຄາສິນຄ້າຢູ່ຈີນພຽງເທົ່າກັບເຄິ່ງໜຶ່ງຂອງລາຄາຢູ່ປະເທດຕົນ, ການຈັດຊື້ສິນຄ້າແທນລູກຄ້າໃນປະເທດຕົນໄດ້ກາຍເປັນທ່າອ່ຽງໃໝ່ດ້ານການບໍລິໂພກ. ພ້ອມກັນນັ້ນ, ການຊຸກຍູ້ຄວາມສະດວກສະບາຍໃນດ້ານການຊຳລະເງິນ ໄດ້ສະໜອງການສະໜັບສະໜູນຢ່າງແຂງແຮງໃຫ້ແກ່ການເຂົ້າເມືອງຈີນເພື່ອທ່ອງທ່ຽວ ແລະ ຈັດຊື້ສິນຄ້າ. ປັດຈຸບັນ, ການຊໍາລະເງິນຜ່ານວິແຊັດ ແລະ ອາລີເພ ໄດ້ເປີດໃຫ້ບໍລິການທີ່ຜູກຕິດກັບບັດທະນາຄານສາກົນ, ຈຳນວນການບໍລິໂພກສະເລ່ຍຕໍ່ມື້ຂອງນັກທ່ອງທ່ຽວຕ່າງປະເທດໄດ້ເພີ່ມຂຶ້ນ 136% ເມື່ອທຽບໃສ່ໄລຍະດຽວກັນຂອງປີ 2024, ຍອດມູນຄ່າການບໍລິໂພກຢູ່ແຂວງກວາງຕຸ້ງໄດ້ເພີ່ມຂຶ້ນທົບເທົ່າ. ການປະດິດສ້າງຮູບແບບການຊຳລະເງິນແບບນີ້ບໍ່ພຽງແຕ່ໄດ້ເພີ່ມຄວາມສະດວກສະບາຍໃນການຈັດຊື້ສິນຄ້າເທົ່ານັ້ນ, ແຕ່ຍັງໄດ້ຊຸກຍູ້ສົ່ງເສີມຄວາມກະຕືລືລົ້ນດ້ານການບໍລິໂພກຂອງນັກທ່ອງທ່ຽວຕ່າງປະເທດຕື່ມອີກ.
ໃນເວລາດຽວກັນ, ຄວາມນິຍົມຊົມຊອບຂອງການເຂົ້າມເມືອງຈີນເພື່ອທ່ອງທ່ຽວ ແລະ ຈັດຊື້ສິນຄ້າກໍໄດ້ຂະຫຍາຍຕົວກວ້າງອອກຢ່າງບໍ່ຢຸດຢັ້ງ. ນອກຈາກຜະລິດຕະພັນທີ່ມີເອກະລັກທ້ອງຖິ່ນແລ້ວ, ນັກທ່ອງທ່ຽວຕ່າງປະເທດນັບມື້ນັບຫຼາຍເລີ່ມສົນໃຈນຳຜະລິດຕະພັນເອເລັກໂຕຣນິກ, ຜະລິດຕະພັນທາງວັດທະນະທຳທີ່ສ້າງສັນ ແລະ ເຄື່ອງນຸ່ງທີ່ໄດ້ຮັບຄວາມນິຍົມ ຫຼື ແຟຊັ່ນຂອງຈີນ. ຕົວຢ່າງ: ໂທລະສັບມືຖືຫົວເຫວີຍ, ຫຸ່ນຍົນທຳຄວາມສະອາດພື້ນ ແລະ ນະວັດຕະກຳອື່ນໆໄດ້ກາຍເປັນສິນຄ້າທີ່ໄດ້ຮັບຄວາມິຍົມຊົມຊອບຫຼາຍ, ໃບສັ່ງຊື້ສິນຄ້ານຳຕະຫຼາດສິນຄ້ານ້ອຍຢີ້ອູ່, ຕະຫຼາດຮົວຊຽງເປີຍເສີ່ນເຈີ້ນ ແລະອື່ນໆໄດ້ເພີ່ມຂຶ້ນ 1,5 ເທົ່າ. ນອກນີ້, ເຄື່ອງລະນຶກ ແລະ ເຄື່ອງຫັດຖະກຳທີ່ມີສີສັນພິເສດດ້ານວັດທະນະທຳຂອງຈີນກໍໄດ້ຮັບຄວາມນິຍົມຊົມຊອບຈາກນັກທ່ອງທ່ຽວຕ່າງປະເທດນັບມື້ນັບຫຼາຍຂຶ້ນ.
ນອກຈາກສູນການຄ້າຂະໜາດໃຫຍ່ແລ້ວ, ຮ້ານນ້ອຍ ແລະ ສະຖານທີ່ສຳຜັດວັດທະນະທຳທີ່ມີເອກະລັກຈຳນວນໜຶ່ງກໍໄດ້ກາຍເປັນຈຸດສຸມແຫ່ງການຈັດຊື້ສິນຄ້າ. ຕົວຢາງ: ຮ້ານ POP MART ສາຂາຫຼັກລະດັບໂລກຢູ່ນະຄອນຊຽງໄຮ້ໄດ້ດຶງດູດນັກທ່ອງທ່ຽວທີ່ເປັນຊາວໜຸ່ມຈຳນວນຫຼວງຫຼາຍຈາກຕ່າງປະເທດ, ພວກເຂົາເຈົ້າໄດ້ຈັດຊື້ກ່ອງສ່ຽງໂຊກ ແລະ ຫຸ່ນຈຳລອງ GK ເຊິ່ງເປັນຮູບແບບການບໍລິໂພກອັນໃໝ່ທີ່ໄດ້ຮັບຄວາມນິຍົມຫຼາຍໃນການທ່ອງທ່ຽວ. ຢູ່ເມືອງຈິງເຕີເຈີ້ນແຂວງຈ່ຽງຊີ່, ນັກທ່ອງທ່ຽວຕ່າງປະເທດໄດ້ສຳຜັດກັບການຜະລິດເຄື່ອງປັ້ນດິນເຜົາ ດ້ວຍການເຮັດເບົ້າຫຼໍ່ ແລະ ແຕ້ມຮູບຢ່າງມີຄວາມອົດທົນ. ຢູ່ເມືອງລິນຊ່າງແຂວງຢຸນນານ, ນັກທ່ອງທ່ຽວຕ່າງປະເທດໄດ້ຊົມການສະແດງວັດທະນະທຳຂອງເຜົ່າວາ ທັງໄດ້ຈັດຊື້ເຄື່ອງຫັດຖະກຳທີ່ມີເອກະລັກຂອງເຜົ່າດັ່ງກ່າວ. ຮູບແບບ “ການຈັດຊື້ສິນຄ້າ + ສຳຜັດກັບວັດທະນະທຳທ້ອງຖິ່ນ” ແນວນີ້ໄດ້ເຮັດໃຫ້ການທ່ອງທ່ຽວມີເນື້ອໃນທີ່ອຸດົມສົມບູນຂຶ້ນ, ທັງໄດ້ຊຸກຍູ້ການພັດທະນາອຸດສາຫະກຳວັດທະນະທຳຂອງທ້ອງຖິ່ນ.
ນອກນີ້, ໃນຕົວເມືອງຈຳນວນໜຶ່ງໄດ້ສ້າງຮູບແບບການບໍລິໂພກທີ່ມີເອກະລັກພິເສດ, ໄດ້ຍົກສູງແຮງຈູງໃຈສຳລັບນັກທ່ອງທ່ຽວຕ່າງປະເທດທີ່ເຂົ້າມາທ່ອງທ່ຽວ ແລະ ຈັດຊື້ສິນຄ້າຢູ່ຈີນ. ຕົວຢ່າງ: ຫຼັກສູດແຕ່ງອາຫານເສສວນຢູ່ນະຄອນເສີງຕູ່ໄດ້ປະສົມປະສານ “ການຊື້ຜັກໃນຕະຫຼາດ+ການສອນແຕ່ງກິນ+ການຊິມ ແລະ ໃຫ້ຄວາມເຫັນຕໍ່ອາຫານ” ເຊິ່ງກາຍເປັນຈຸດນິຍົມໃໝ່ດ້ານການບໍລິໂພກໃນການທ່ອງທ່ຽວວັດທະນະທຳຂອງນັກທ່ອງທ່ຽວຕ່າງປະເທດ; ໃນໄລຍະພັກວັນກຳມະກອນສາກົນ, ຢູ່ທົ່ງນາຂັ້ນໄດໂລງຈີເຂດປົກຄອງຕົນເອງເຜົ່າຈ້ວງກວາງຊີ, “ເທສະການເລີ່ມໄຖນາ” ທີ່ມີເອກະລັກພິເສດໄດ້ດຶງດູດນັກທ່ອງທ່ຽວຕ່າງປະເທດຈຳນວນຫຼວງຫຼາຍ. ຮູບແບບການບໍລິໂພກທີ່ສຳຜັດກັບວັດທະນະທຳຢ່າງເລິກເຊິ່ງແບບນີ້ ເຮັດໃຫ້ນັກທ່ອງທ່ຽວສາມາດລົງເລິກສຳຜັດກັບວັດທະນະທຳ ແລະ ວີຖີການດຳລົງຊີວິດຂອງປະຊາຊົນທ້ອງຖິ່ນໄປພ້ອມກັບການຈັດຊື້ສິນຄ້າ.
ວັນທີ 19 ພຶດສະພານີ້ເປັນ “ວັນທ່ອງທ່ຽວຈີນ” ຄັ້ງທີ 15, ກິດຈະກຳນຳສະເໜີການທ່ອງທ່ຽວສຳລັບຄົນຕ່າງປະເທດກໍແມ່ນຈຸດເດັ່ນສຳຄັນໃນກິດຈະກຳ “ວັນທ່ອງທ່ຽວຈີນ” ປີນີ້. ໃນອະນາຄົດ, ຄຽງຄູ່ກັບການຊຳລະເງິນແບບເຄື່ອນທີ່ຂ້າມຊາດໄດ້ຮັບການປັບປຸງເລື້ອຍໆ ແລະ ນະໂຍບາຍ “ຈັດຊື້ສິນຄ້າແລ້ວໄດ້ຮັບເງິນຄືນພາສີທັນທີ” ສຳລັບນັກທ່ອງທ່ຽວຕ່າງປະເທດ, ການທີ່ “ມາຈັດຊື້ສິນຄ້າຢູ່ຈີນ” ຈະກາຍເປັນທ່າອ່ຽງໃໝ່ສຳລັບນັກທ່ອງທ່ຽວຕ່າງປະເທດທີ່ມາທ່ຽວຈີນ.
