ສູນຂ່າວພະລັງງານ ແລະ ບໍ່ແຮ່ ລາຍງານວ່າ: ກອງປະຊຸມໄດ້ຈັດຂຶ້ນໃນຕອນບ່າຍ ວັນທີ 16 ມິຖຸນາ 2025 ຢູ່ຫ້ອງປະຊຸມໃຫຍ່ ລັດວິສາຫະກິດໄຟຟ້າລາວ ພາຍໃຕ້ການເປັນປະທານຂອງ ທ່ານ ໂພໄຊ ໄຊຍະສອນ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງພະລັງງານ ແລະ ບໍ່ແຮ່.
ທ່ານ ຈັນສະແຫວງ ບຸນຍົງ ກຳມະການຄະນະປະຈຳພັກ, ຮອງລັດຖະມົນຕີ ໄດ້ລາຍງານຫຍໍ້ການເຄື່ອນໄຫວວຽກງານພະລັງງານ ແລະ ບໍ່ແຮ່ ຕະຫລອດໄລຍະຜ່ານມາ.
ຈາກນັ້ນ ທ່ານ ນາງ ແສງເດືອນ ວົງອິນ ກຳມະການຄະນະປະຈຳພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ໄດ້ລາຍງານບັນດານິຕິກຳຕ່າງໆຂອງຄະນະປັບປຸງກົງຈັກການຈັດຕັ້ງຂັ້ນສູນກາງ ໃນນີ້ລວມມີນິຕິກຳກ່ຽວກັບການຮັບຮອງເອົາການຍົກຍ້າຍບຸກຄະລາກອນ ແລະ ກົງຈັກການຈັດຕັ້ງຂອງກະຊວງພະລັງງານ ແລະ ບໍ່ແຮ່ ໂຮມເຂົ້າກັບກະຊວງອຸດສາຫະກຳ ແລະ ການຄ້າ ແລະ ການອອກການຮັບອູດໜູນບຳນານຂອງພະນັກງານຂັ້ນສູນກາງນຳພາຈຳນວນ 10 ທ່ານ ໃນນີ້ປະກອບມີຂັ້ນຫົວໜ້າກົມຈຳນວນ 4 ທ່ານ ຄື:
1). ທ່ານ ສຸຂັນສັກ ສີສຸກ ກຳມະການຄະນະພັກກະຊວງ, ເລຂາໜ່ວຍພັກ,ຫົວໜ້າກົມທໍລະນີສາດ ແລະ ແຮ່ທາດ,
2). ທ່ານ ບົວເທບ ມາໄລຄຳ ກຳມະການຄະນະພັກກະຊວງ, ເລຂາໜ່ວຍພັກ, ຫົວໜ້າກົມຄຸ້ມຄອງຄວາມປອດໄພອຸດສາຫະກຳພະລັງງານ,
3) ທ່ານ ສົມພິດ ແກ້ວວິຈິດ ກຳມະການຄະນະພັກກະຊວງ, ເລຂາໜ່ວຍພັກ, ຫົວໜ້າກົມທຸລະກິດພະລັງງານ
4). ທ່ານ ຈັນໂທ ມີລັດຕະນະແພງ ກຳມະການຄະນະພັກກະຊວງ, ເລຂາໜ່ວຍພັກ, ຫົວໜ້າກົມສົ່ງເສີມ ແລະ ປະຢັດພະລັງງານ.
ນອກຈາກນີ້ຍັງມີຂັ້ນຮອງຫົວໜ້າກົມຈຳນວນ 6 ທ່ານຄື:
1). ທ່ານ ນາງ ເລືອງ ພົມສຸວັນ ຮອງຫົວໜ້າກົມກວດກາ,
2) ທ່ານ ປອ ວົງຄຳ ຈະເລີນສຸກ ຮອງຫົວໜ້າກົມຄຸ້ມຄອງບໍ່ແຮ່,
3). ທ່ານ ຫຸ້ມພັນ ວົງພະຈັນ ຮອງຫົວໜ້າກົມຄຸ້ມຄອງພະລັງງານ,
4) ທ່ານ ທຳມະໜູນ ນາຄະວິດ ຮອງຫົວໜ້າກົມຄຸ້ມຄອງພະລັງງານ,
5) ທ່ານ ວົງທອງ ທິມະຫາໄຊ ຮອງຫົວໜ້າກົມຄຸ້ມຄອງບໍ່ແຮ່
6) ທ່ານ ປອ ພູໂຂງ ແສງວິໄລ ຮອງຫົວໜ້າກົມຄຸ້ມຄອງຄວາມປອດໄພອຸດສາຫະກຳພະລັງງານ.
ຕອນທ້າຍຂອງກອງປະຊຸມ ທ່ານ ລັດຖະມົນຕີ ໄດ້ມີຄຳເຫັນໂອ້ລົມ ກ່ອນອື່ນ ທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ພະນັກງານ, ລັດຖະກອນທັງໝົດພາຍໃນກະຊວງ ໂດຍສະເພາະບັນດາ ທ່ານ ນອນໃນເປົ້າໝາຍອອກພັກການຮັບອູດໜູນບຳນານ ທີ່ໄດ້ອຸທິດເຫືອແຮງ, ສະຕິປັນຍາ ແລະ ຄວາມຮູ້, ຄວາມສາມາດຂອງຕົນ ເຂົ້າໃນການພັດທະນາວຽກງານພະລັງງານ ແລະ ບໍ່ແຮ່ ໂດຍສະເພາະຕະຫລອດໄລຍະ 19 ປີທີ່ກະຊວງພະລັງງານ ແລະ ບໍ່ແຮ່ ໄດ້ຮັບການສ້າງຕັ້ງມາແຕ່ປີ 2006 ເປັນຕົ້ນມາ.
ພ້ອມກັນນີ້ ທ່ານ ລັດຖະມົນຕີ ຍັງໄດ້ຊີນຳໃຫ້ ຄະນະພັກ, ຄະນະນຳແຕ່ລະຂັ້ນ ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານ, ລັດຖະກອນຂອງຕົນຮັບຮູ້, ເຂົ້າໃຈຢ່າງເລິກເຊິ່ງຕໍ່ນະໂຍບາຍຂອງພັກ, ລັດຖະບານ ໃນການປັບປຸງກົງຈັກການຈັດຕັ້ງຄັ້ງນີ້ ແລະ ພ້ອມກັນປະຕິບັດໜ້າທີ່ອັນໃໝ່ໃຫ້ມີຜົນສຳເລັດທີ່ໜັກແໜ້ນກວ່າເກົ່າ.
