ເພື່ອເປັນເອກະພາບໃນການສອບເສັງ ຈົບຊັ້ນມັດທະຍົມຕົ້ນ (ມ7) ໃນທົ່ວປະເທດ, ພະແນກສຶກສາທິການ ແລະກິລາແຂວງຫຼວງພະບາງ ກໍໄດ້ເປີດການສອບເສັງ ຂຶ້ນໃນຕອນເຊົ້າວັນທີ 18 ມິຖຸນາ 2025 ໃຫ້ກຽດຮ່ວມເປີດຫົວບົດ ມີທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ທ່ານ ປອ ສຸລິເດດ ແກ້ວບົວລະເພັດ ຫົວໜ້າພະແນກສຶກສາທິການ ແລະກິລາແຂວງ, ມີແຂກຖືກເຊີນ, ຮອງເຈົ້ານະຄອນ, ຫົວໜ້າຫ້ອງການສຶກສານະຄອນ, ຄູ-ອາຈານ ແລະ ນັກຮຽນຊັ້ນ ມ7 ເຂົ້າຮ່ວມ.
ທ່ານ ປອ ສຸລິເດດ ແກ້ວບົວລະເພັດ ກ່າວວ່າ: ໃນສົກ 2024-2025 ທົ່ວແຂວງຫຼວງພະບາງ ມີໂຮງຮຽນມັດທະຍົມສົມບູນ ທັງໝົດ 44 ແຫ່ງ, ໃນນີ້ ພາກເອກະຊົນ 2 ແຫ່ງ, ມີ ນັກຮຽນ ຊັ້ນມ7 ທີ່ມີເງື່ອນໄຂສອບເສັງທັງໝົດ 2,491 ຄົນ, ຍິງ 1,052 ຄົນ, ມີສູນສອບເສັງທັງໝົດ 29 ສູນ, ມີຈໍານວນຫ້ອງສອບເສັງທັງໝົດ 123 ຫ້ອງ.
ສຳລັບໃນເທດສະບານ ນະຄອນຫຼວງພະບາງ ໄດ້ຈັດເປັນສູນດຽວ ໂດຍກຳນົດເອົາໂຮງຮຽນມັດທະຍົມສົມບູນສັນຕິພາບ ເປັນສູນສອບເສັງ ມີ 10 ໂຮງຮຽນ, ມີນັກສອບເສັງທັງໝົດ 974 ຄົນ. ໃນນີ້ມີນັກຮຽນຫ້ອງສອງພາສາ(ລາວ-ຝຣັ່ງ)ຈາກມັດທະຍົມສົມບູນປະຊາທິປະໄຕ 66 ຄົນ, ຍິງ 36 ຄົນ, ການສອບເສັງຈະໄດ້ດຳເນີນເປັນເວລາ 3 ວັນ(18-20 ມິຖຸນາ 2025), ມີວິຊາສອບເສັງທັງໝົດ 5 ວິຊາຄື: ວິຊາພາສາລາວ-ວັນນະຄະດີ, ວິຊາຄະນິດສາດ, ກຸ່ມວິຊາວິທະຍາສາດທຳມະຊາດ(ຟີຊີກສາດ, ເຄມີສາດ ແລະຊີວະວິທະຍາ), ກຸ່ມວິຊາ ວິທະຍາສາດ-ສັງຄົມ(ພູມສາດ, ປະຫວັດສາດ ແລະສຶກສາພົນລະເມືອງ) ແລະວິຊາ ພາສາອັງກິດ.
ຈາກນັ້ນ ທ່ານ ບຸນເລື່ອມ ມະນີວົງ ກໍ່ໃຫ້ກຽດກ່າວເປີດ ແລະ ຕັດຊອງຫົວບົດສອບເສັງວິຊາທຳອິດຄື ວິຊາພາສາລາວ-ວັນນະຄະດີ ຊັ້ນ ມ7 ທົ່ວແຂວງລວງພະບາງ ຂຶ້ນຢ່າງເປັນທາງການ.
