ພິທີເຊັນບົດບັນທຶກ ເຈດຈໍານົງ ວ່າດ້ວຍການສ້າງຕັ້ງສາຍພົວພັນມິດຕະພາບ ລະຫວ່າງ ແຂວງຄໍາມ່ວນ ສປປ ລາວ ແລະ ແຂວງກຸ້ຍໂຈ ສປ ຈີນ ໄດ້ຈັດຂຶ້ນໃນວັນທີ 17 ມິຖຸນາ 2025 ທີ່ສໍານັກງານອົງການປົກຄອງ ແຂວງກຸ້ຍໂຈ ໃຫ້ກຽດລົງນາມເຊັນບົດບັນທຶກໂດຍ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ແລະ ທ່ານ ຫຼີປິນຈູນ ເຈົ້າແຂວງ ກຸ້ຍໂຈ.
ເພື່ອປະຕິບັດຕາມຄວາມເຫັນດີເປັນເອກະພາບກັນຂອງການນໍາທັງສອງຝ່າຍ ໃຫ້ບັນລຸຜົນເປັນຈິງ, ເພີ່ມທະວີ ແລະ ເສີມຂະຫຍາຍຄວາມເຂົ້າໃຈ, ມິດຕະພາບລະຫວ່າງປະຊາຊົນ ສອງຊາດ ລາວ-ຈີນ, ຮັດແໜ້ນ ແລະ ພັດທະນາ ການຮ່ວມມືທີ່ເປັນມິດຕະພາບ ລະຫວ່າງ ສອງແຂວງ. ໂດຍຜ່ານການປຶກສາຫາລືກັນດ້ວຍຄວາມເປັນມິດຕະພາບ, ສອງຝ່າຍໄດ້ບັນລຸຕາມເຈດຈຳນົງ ວ່າດ້ວຍການສ້າງຕັ້ງສາຍພົວພັນແຂວງມິດຕະພາບຄື: ຍິນດີເພີ່ມທະວີການແລກປ່ຽນ ການຮ່ວມມືທີ່ເປັນມິດຕະພາບ, ຕ່າງຝ່າຍຕ່າງໄດ້ຮັບຜົນປະໂຫຍດ ແລະ ສົ່ງເສີມໂຄງການຮ່ວມມືທີ່ມີຜົນປະໂຫຍດຕໍ່ການພັດທະນາຂອງທັງສອງຝ່າຍ. ຍຶດໝັ້ນຫຼັກການຄວາມສະເໝີພາບ, ສົ່ງເສີມການແລກປ່ຽນ ແລະ ການຮ່ວມມື ລະຫວ່າງ ສອງຝ່າຍໃນຂົງເຂດຊັບພະຍາກອນແຮ່ທາດ, ການສຶກສາ, ເຕັກໂນໂລຊິກະສິກຳ, ເສດຖະກິດ-ການຄ້າ, ການທ່ອງທ່ຽວ, ການຜະລິດເກືອໂປຕາສຊ່ຽມ ແລະ ອື່ນໆ. ເພື່ອສົ່ງເສີມການພັດທະນາ ແລະ ຄວາມຈະເລີນຮຸ່ງເຮືອງຮ່ວມກັນ, ຮັກສາການຕິດຕໍ່ພົວພັນ ແລະ ປຶກສາຫາລືກັນໃນໄລຍະຍາວ, ເພີ່ມທະວີການຢ້ຽມຢາມ ແລກປ່ຽນບົດຮຽນ ລະຫວ່າງ ບຸກຄະລາກອນຂອງທັງສອງຝ່າຍ ແລະ ສົ່ງເສີມການຮ່ວມ ມືໃນຂົງເຂດຕ່າງໆ.
ໂອກາດທີ່ມີຄວາມໝາຍຄວາມສໍາຄັນນີ້ ການນໍາທັງສອງແຂວງ ຍັງໄດ້ລາຍງານສະພາບການພັດທະນາເສດຖະກິດ-ສັງຄົມ ແລະ ການແກ້ໄຂຄວາມທຸກຍາກ ລວມທັງທ່າແຮງ ພື້ນຖານໃນການພັດທະນາເສດຖະກິດຂອງແຕ່ລະແຂວງ ໃຫ້ແກ່ກັນ ແລະ ກັນ ໄດ້ຮັບຮູ້, ທັງໄດ້ສະເໜີເງື່ອນໄຂ ທ່າແຮງທາງດ້ານ ຊັບພະຍາກອນ ເພື່ອຊຸກຍຸ້ສົ່ງເສີມດ້ານການລົງທຶນຮ່ວມກັນ ລະຫວ່າງ ສອງແຂວງໃນຕໍ່ໜ້າ ຢ່າງມີຈຸດສຸມ.
