ໃນວັນທີ 11 ກໍລະກົດ 2025, ທ່ານ ທອງສະຫວັນ ພົມວິຫານ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຕ່າງປະເທດຂອບການຮ່ວມມືແມ່ນ້ໍາຂອງ-ສ.ເກົາຫລີ ຄັ້ງທີ 13 ທີ່ ກົວລາລຳເປີ, ປະເທດມາເລເຊຍ, ໂດຍການເປັນປະທານຮ່ວມຂອງ ທ່ານ Bui Thanh Son, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງ ປະເທດ ສສ ຫວຽດນາມ ແລະ ທ່ານ Park Yoonjoo, ຮອງລັດຖະມົນຕີກະຊວງການຕ່າງປະເທດ ແຫ່ງ ສ.ເກົາຫລີ, ຊຶ່ງມີບັນດາລັດຖະມົນຕີ ແລະ ຫົວໜ້າຄະນະຜູ້ແທນຈາກບັນດາປະເທດສະມາຊິກແມ່ນໍ້າຂອງ ຄື: ກຳປູເຈຍ, ສປປ ລາວ, ມຽນມາ, ໄທ ແລະ ສສ.ຫວຽດນາມ ເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອທົບທວນຄືນຄວາມຄືບໜ້າໃນການຈັດຕັ້ງປະຕິບັດບັນດາແຜນງານ ແລະ ໂຄງການຕ່າງໆ ພາຍໃຕ້ແຜນປະຕິບັດງານຂອບການຮ່ວມມືແມ່ນໍ້າຂອງ-ສ. ເກົາຫລີ 2021-2025 (Plan of Action 2021-2025) ໂດຍປິ່ນອ້ອມ 7 ຂົງເຂດການຮ່ວມມືບູລິມະສິດ ຄື: 1). ວັດທະນະທໍາ ແລະ ການທ່ອງທ່ຽວ, 2). ການພັດທະນາຊັບພະຍາກອນມະນຸດ, 3). ກະສິກໍາ ແລະ ການພັດທະນາຊົນນະບົດ, 4). ພື້ນຖານໂຄງລ່າງ, 5). ເຕັກໂນໂລຊີ ແລະ ການສື່ສານ, 6). ດ້ານສິ່ງແວດລ້ອມ ແລະ 7). ສິ່ງທ້າທາຍດ້ານຄວາມໝັ້ນຄົງແບບໃໝ່. ພ້ອມກັນນັ້ນ, ກອງປະຊຸມຍັງໄດ້ປຶກສາຫາລື ກ່ຽວກັບ ທິດທາງການຮ່ວມມືໃນຕໍ່ໜ້າ ເຊັ່ນ: ຮ່າງແຜນປະຕິບັດງານຂອບການຮ່ວມມືແມ່ນ້ຳຂອງ-ສ.ເກົາຫລີ ສະບັບໃໝ່ 2026-2030 ແລະ ແຜນການຈັດກອງປະຊຸມສຸດຍອດແມ່ນ້ຳຂອງ-ສ.ເກົາຫລີ ຄັ້ງທີ 3 ໃນທ້າຍປີ 2025. ໃນໄລຍະຜ່ານມາ, ສປປ ລາວ ໄດ້ຮັບການສະໜັບສະໜູນໂຄງການພາຍໃຕ້ກອງທຶນຂອບການຮ່ວມມືແມ່ນ້ຳຂອງ-ສ. ເກົາຫລີ (Mekong-Republic of Korea Cooperation Fund – MKCF) ຈຳນວນ 9 ໂຄງການ ມູນຄ່າທັງໝົດ 3.6 ລ້ານກວ່າໂດລາສະຫະລັດ. ແລະໃນປີ 2025 ນີ້, ສ. ເກົາຫລີ ໄດ້ອະນຸມັດໂຄງການພາຍໃຕ້ກອງທຶນຂອບການຮ່ວມມືດັ່ງກ່າວ ຈຳນວນ 02 ໂຄງການ ມູນຄ່າ 949.000 ກວ່າໂດລາສະຫະລັດ ເຂົ້າໃນການຈັດຕັ້ງປະຕິບັດໂຄງການສົ່ງເສີມການຜະລິດກາເຟໃນອະນຸພາກພື້ນແມ່ນ້ຳຂອງ ຂອງ ສປປ ລາວ ແລະ ສສ.ຫວຽດນາມ ແລະ ໂຄງການພັດທະນາກະສິກຳ ແລະ ການປະມົງຂອງຊຸມຊົມຂອງ ມະຫາວິທະຍາໄລ ແຂວງສະຫວັນນະເຂດ, ເຊິ່ງໄດ້ເລີ່ມຈັດຕັ້ງປະຕິບັດນັບແຕ່ເດືອນມີນາ 2025 ເປັນຕົ້ນມາ.
ໃນກອງປະຊຸມຄັ້ງນີ້, ທ່ານ ລັດຖະມົນຕີກະຊວງການຕ່າງປະ ເທດ ແຫ່ງ ສປປ ລາວ ໄດ້ສະແດງຄວາມຊົມເຊີຍ ແລະ ຂອບໃຈຕໍ່ລັດຖະບານ ສ. ເກົາຫລີ ທີ່ໄດ້ສືບຕໍ່ປະກອບສ່ວນໃນການພັດທະນາເສດຖະກິດ-ສັງຄົມ ຢູ່ ໃນພາກພື້ນແມ່ນ້ຳຂອງ, ລວມທັງ ສປປ ລາວ. ພ້ອມທັງສະເໜີ ໃຫ້ ສ. ເກົາຫລີ ສືບຕໍ່ສົ່ງເສີມ ແລະ ຮັດແໜ້ນການຮ່ວມມື ລະຫວ່າງ ສ. ເກົາຫລີ ແລະ ປະເທດສະມາຊິກແມ່ນ້ຳຂອງໃນຕໍ່ໜ້າ.
ຂ່າວ,ພາບ: ກົມການຂ່າວ ກະຊວງການຕ່າງປະເທດ.