ແຫລ່ງຂ່າວຈາກເມືອງປາກແຊງ ແຂວງຫລວງພະບາງ ໃຫ້ຮູ້ວ່າ: ໃນຄໍ່າຄືນຂອງວັນທີ 14 ຫາ 15 ກໍລະກົດ 2025 ນີ້ ໄດ້ມີຝົນຕົກໜັກຕິດຕໍ່ກັນຫລາຍຊົ່ວໂມງ ເຮັດໃຫ້ເກີດມີປະລິມານນ້ຳຫ້ວຍເພີ່ມຂຶ້ນຜິດປົກກະຕິ ແລະ ໄຫລຊຸເຂົ້າຖ້ວມເຮືອນຂອງປະຊາຊົນ 5 ຄອບຄົວ, ລວມທັງເນື້ອທີ່ທຳການຜະລິດ ຢູ່ບ້ານສະຄີງ ເມືອງປາກແຊງເສຍຫາຍຫລາຍສົມຄວນ.
ຄະນະກຳມະການຄຸ້ມຄອງໄພພິບັດຂັ້ນເມືອງ ລາຍງານໃຫ້ຮູ້ວ່າ: ຜົນເສຍຫາຍຄັ້ງນີ້, ມີເນື້ອທີ່ນາ, ວັດຖຸມີຄ່າ ແລະ ສັດລ້ຽງຂອງປະຊາຊົນ ຈໍານວນໜຶ່ງ ຖືກນໍ້າຖ້ວມ-ພັດໄຫລໄປກັບນ້ຳ. ນອກນັ້ນ, ເສັ້ນທາງຫລວງຂອງແຂວງເລກທີ່ 2505 ແຕ່ສາມແຍກປາກເຊືອງ ຫາເມືອງປາກແຊງຖືກນ້ຳເຊາະເຈື່ອນເປ່ເພລາຍຈຸດ, ສະເພາະເຂດບ້ານສະຄີງ ເສັ້ນທາງໄດ້ຖືກຕັດຂາດ ເປັນຂຸມເລິກ ເຮັດໃຫ້ການສັນຈອນບໍ່ສາມາດຜ່ານໄດ້ນັບທັງລົດຈັກ ແລະ ລົດໃຫຍ່.
ຕໍ່ເຫດການຄັ້ງນີ້, ຄະນະກຳມະການຄຸ້ມຄອງໄພພິບັດຂັ້ນເມືອງ ໄດ້ລົງຕິດຕາມຜົນເສຍຂອງປະຊາຊົນ ທັງໄດ້ລະດົມກຳລັງທະຫານ-ຕໍາຫລວດ ເຂົ້າຊ່ວຍປະຊາຊົນຢ່າງທັນເຫດການ ເພື່ອກອບກູ້ເອົາວັດຖຸສິ່ງຂອງທີ່ຈຳເປັນ ທັງຍ້າຍອອກໄປເກັບມ້ຽນໄວ້ບ່ອນທີ່ປອດໄພກ່ອນ ແລະ ຊ່ວຍອະນາໄມເຮືອນຂອງປະຊາຊົນ ທີ່ຖືກນ້ຳຖ້ວມ, ອະນາໄມຮ່ອງລະບາຍນ້ຳ ເພື່ອລະບາຍນ້ຳອອກຈາກປາກທໍ່. ສ່ວນເສັ້ນທາງທີ່ຖືກຕັດຂາດ ພວມເລັ່ງຕັດທາງເວັ້ນ ເພື່ອໃຫ້ໄດ້ມີການສັນຈອນຊົ່ວຄາວ ເພື່ອເປັນການແກ້ໄຂຊີວິດການເປັນຢູ່ ຂອງປະຊາຊົນທີ່ຖືກຜົນກະທົບ. ພ້ອມນີ້, ຄະນະກຳມະການຄຸ້ມຄອງໄພພິບັດຂັ້ນເມືອງ ຍັງໄດ້ມອບເຄື່ອງຊ່ວຍເຫລືອສຸກເສີນ ເພື່ອແກ້ໄຂຄວາມຈຳເປັນໃນເບື້ອງຕົ້ນ, ສ່ວນຜົນເສຍຫາຍ ຍັງຢູ່ໃນໄລຍະການເກັບກຳຂໍ້ມູນ.
ຂ່າວ: ສົມສັກ ເຮືອງມະນີ