ໃນຕອນເຊົ້າຂອງ ວັນທີ 31 ກໍລະກົດ 2025, ທີ່ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ໄດ້ມີພິທີປະກາດ ການສ້າງຕັ້ງອົງຄະນະພັກອົງການກາແດງແຫ່ງຊາດລາວ ແລະ ບົ່ງຕົວແຕ່ງຕັ້ງຄະນະບໍລິຫານງານພັກ ອົງການກາແດງແຫ່ງຊາດລາວຂຶ້ນ ໂດຍໃຫ້ກຽດເປັນປະທານຂອງ ສະຫາຍ ກິແກ້ວ ໄຂຄຳພິທູນ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດວັດທະນາທຳ-ສັງຄົມ; ມີສະຫາຍ ບົວຄົງ ນາມມະວົງ, ກຳມະການສູນກາງພັກ, ລັດຖະມົນຕີ, ຫົວໜ້າ ຫສນຍ; ສະຫາຍ ຄຳລາວັນ ຈັນທະລາວັນ, ຮອງເລຂາຄະນະພັກ ຫສນຍ, ປະທານອົງການກາແດງແຫ່ງຊາດລາວ; ພ້ອມດ້ວຍບັນດາສະຫາຍຜູ້ຕາງໜ້າ ຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ກະຊວງ-ອົງການ, ພະນັກງານຫຼັກແຫຼ່ງ ຈາກ ຫສນຍ ແລະ ອົງການກາແດງແຫ່ງຊາດລາວ ເຂົ້າຮ່ວມ.
ໂດຍປະຕິບັດຕາມທັດສະນະ ຂອງພັກປະຊາຊົນປະຕິວັດລາວ ໃນການກໍ່ສ້າງກຳລັງແຮງ ແລະ ຄວາມສາມາດຍູ້ແຮງການປະຕິບັດແນວທາງປ່ຽນແປງໃໝ່, ຮອບດ້ານ, ມີຫຼັກການຂອງພັກ ເຂົ້າສູ່ລວງເລີກ; ກົງຈັກການຈັດຕັ້ງ ຂອງລະບອບການເມືອງປະຊາທິປະໄຕປະຊາຊົນ ຕ້ອງໄດ້ຮັບການປັບປຸງ, ບູລະນະຢ່າງຕໍ່ເນື່ອງ ຕາມທິດ “ກົງຈັກມີຄວາມກະທັດຮັດ, ມີຄວາມເຂັັ້ມແຂງ, ບຸກຄະລາກອນມີຄຸນນະພາບ” ເຮັດໃຫ້ການນໍາພາ-ຊີ້ນໍາ, ການບໍລິຫານຄຸ້ມຄອງ ຂະຫຍາຍຕົວຢ່າງບໍ່ຢຸດຢັ້ງ, ສາມາດເສີມຂະຫຍາຍ ແລະ ດໍາລົງບົດບາດ ໃນການຫັນແນວທາງປ່ຽນແປງໃໝ່ຂອງພັກ ມາເປັນນະໂຍບາຍ, ເປັນແຜນພັດທະນາ, ເປັນກົດໝາຍ ເພື່ອອຳນວຍຄວາມສະດວກ ໃຫ້ແກ່ການຄວບຄຸມການບໍລິຫານ, ຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ. ດັ່ງນັ້ນ, ເພື່ອຕອບສະໜອງທັດສະນະດັ່ງກ່າວຂອງພັກ ແລະ ສອດຄ່ອງກັບໜ້າທີ່ການເມືອງໃນໄລຍະໃໝ່ ຂອງອົງການກາແດງແຫ່ງຊາດລາວ, ຄະນະເລຂາທິການສູນກາງພັກ ຈຶ່ງໄດ້ຕົກລົງ ຍົກຖານະຄະນະພັກຮາກຖານອົງການກາແດງແຫ່ງຊາດລາວ ທີ່ຂຶ້ນກັບອົງຄະນະພັກຫ້ອງວ່າການສຳນັກງານນາຍົກລັດຖະມົນຕີ ສ້າງຕັ້ງເປັນເປັນອົງຄະນະພັກອົງການກາແດງແຫ່ງຊາດລາວ, ມີຖານະເທົ່າກັບຄະນະພັກກະຊວງ-ອົງການ ຂຶ້ນກັບຄະນະເລຂາທິການສູນກາງພັກ ຕາມມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 629/ຄລສພ, ລົງວັນທີ 11 ກໍລະກົດ 2025 ແລະ ບົ່ງຕົວແຕ່ງຕັ້ງຄະນະບໍລິຫານງານພັກ ອົງການກາແດງແຫ່ງຊາດລາວ ຕາມມະຕິຕົກລົງ ຂອງຄະນະເລຂາທິການສູນກາງພັກ ສະບັບເລກທີ 651/ຄລສພ, ລົງວັນທີ 21 ກໍລະກົດ 2025 ຊຶ່ງຄະນະບໍລິຫານງານພັກ ອົງການກາແດງແຫ່ງຊາດລາວ ປະກອບດ້ວຍບັນດາສະຫາຍ ຄື:
ສະຫາຍ ຄຳລາວັນ ຈັນທະລາວັນ ເປັນ ເລຂາຄະນະບໍລິຫານງານພັກ;
ສະຫາຍ ຈັນທະລາ ສຸກສາຄອນ ເປັນ ຮອງເລຂາຄະນະບໍລິຫານງານພັກ;
ສະຫາຍ ຮອງຈັນ ຈັນທະວົງ ເປັນ ຄະນະບໍລິຫານງານພັກ;
ສະຫາຍ ເຂັມເພັດ ສີວໍຣະວົງສ໌ ເປັນ ຄະນະບໍລິຫານງານພັກ;
ສະຫາຍ ນ. ໄອ່ຄຳ ສໍອິນໄຊ ເປັນ ຄະນະບໍລິຫານງານພັກ;
ໃນໂອກາດນີ້, ສະຫາຍ ກິແກ້ວ ໄຂຄໍາພິທູນ ກໍ່ໄດ້ໃຫ້ກຽດໂອ້ລົມ ຕໍ່ຜູ້ເຂົ້າຮ່ວມ ໂດຍໄດ້ເນັ້ນໜັກ ໃຫ້ຄະນະພັກ-ຄະນະນໍາ, ສະມາຊິກພັກ-ພະນັກງານລັດຖະກອນ ອົງການກາແດງແຫ່ງຊາດລາວ ເອົາໃຈໃສ່ບາງດ້ານ ເປັນຕົ້ນ ສືບຕໍ່ເອົາໃຈໃສ່ຕໍ່ວຽກງານການເມືອງ-ນໍາພາແນວຄິດ ຂອງສະມາຊິກພັກ-ພະນັກງານ ໃຫ້ມີຄວາມຮັບຮູ້, ເຂົ້າໃຈຢ່າງເລິກເຊິ່ງ ແລະ ມີຄວາມເປັນເອກະພາບສູງ ຕໍ່ການປັບປຸງກົງຈັກການຈັດຕັ້ງພັກໃນຄັ້ງນີ້; ເອົາໃຈໃສ່ປຶກສາຫາລື, ແບ່ງງານ, ແບ່ງຄວາມຮັບຜີດຊອບ ໃຫ້ບັນດາສະຫາຍ ໃນຄະນະບໍລິຫານງານພັກ ໃຫ້ລະອຽດຈະແຈ້ງ; ສືບຕໍ່ຊີ້ນໍາການປັບປຸງກົງຈັກການຈັດຕັ້ງ ຕາມທິດທີ່ກຳນົດໄວ້; ບັນດາໜ້າວຽກ, ກຸ່ມວຽກ ຕ້ອງໄດ້ຮັບການສັບຊ້ອນເຂົ້າກັນ ໃຫ້ເປັນລະບົບ ແລະ ສາມາດເຄື່ອນໄຫວວຽກງານ ມີຄວາມຕໍ່ເນື່ອງ; ຕ້ອງສ້າງໃຫ້ກົງຈັກ ທີ່ມີຄວາມບໍລິສຸດຜຸດຜ່ອງ, ປະຕິບັດໜ້າທີ່ ທີ່ຖືກມອບໝາຍ ແລະ ບໍລິການຮັບໃຊ້ປະຊາຊົນ ຢ່າງແທ້ຈິງ; ໃຫ້ພ້ອມກັນຮີບຮ້ອນກະກຽມ ແລະ ດຳເນີນກອງປະຊຸມໃຫຍ່ອົງຄະນະພັກຂອງຕົນ ໃຫ້ທັນ ແລະ ສຳເລັດຕາມກຳນົດເວລາ ໂດຍສະເພາະ ການກະກຽມເນື້ອໃນ, ການສ້າງຂະບວນການດ້ານຕ່າງໆ, ການເນີນຊີວິດການເມືອງ, ການກະກຽມບຸກຄະລາກອນ ຮັບສະໝັກເຂົ້າໃນຄະນະບໍລິຫານງານພັກ, ການກະກຽມຜູ້ແທນ ເຂົ້າຮ່ວມກອງປະຊຸມ, ລວມທັງ ການກະກຽມຜູ້ແທນອົງຄະນະພັກ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ XII ຂອງພັກ ຊຶ່ງດ້ານບຸກຄະລາກອນ ຕ້ອງຮັບປະກັນ ຕາມມາດຕະຖານ ແລະ ເງື່ອນໄຂທີິ່ກໍານົດໄວ້.
ຂ່າວໂດຍ: ອົງການກາແດງແຫ່ງຊາດລາວ.