ຕອນເຊົ້າວັນທີ 11 ເດືອນສິງຫາ 2025 ວິທະຍຸກະຈາຍສຽງແຫ່ງຊາດລາວ ຈັດງານເສວະນາໃນຫົວຂໍ້: ສິ່ງທ້າທາຍ ແລະ ທິດທາງພັດທະນາວຽກງານ ວິທະຍຸໃນຍຸກດິຈິຕອນ ພາຍໃຕ້ການເປັນປະທານຂອງທ່ານ ບົວໄລ ພານຸວົງ ຜູ້ອຳນວຍການໃຫ່ຍວິທະຍຸກະຈາຍສຽງແຫ່ງຊາດລາວ ມີອະດີດຮອງລັດຖະມົນຕີ ພ້ອມດ້ວຍ ຫົວໜ້າກົມ, ຮອງກົມ, ແຂກຮັບເຊີນ, ຜູ້ອຳນວຍການວິທະຍຸທ້ອງຖິ່ນໃນທົ່ວປະເທດ ແລະ ນັກຂ່າວຈາກບັນດາແຂວງ ແລະ ນະຄອນຫຼວງເຂົ້າຮ່ວມ
ທ່ານ ບົວໄລ ພານຸວົງ ມີຄຳເຫັນວ່າ: ການກຳເນີດເກີດຂຶ້ນ ແລະ ພັດທະນາມາເປັນເວລາ 65 ປີ ຂອງວິທະຍຸກະຈາຍສຽງແຫ່ງຊາດລາວ ໄດ້ມີບາດກ້າວພັດທະນາຢ່າງຕັ້ງໜ້າ. ນັບແຕ່ມື້ກຳເນີດເກີດຂຶ້ນມາເຖິງປັດຈຸບັນ ວິທະຍຸກະຈາຍສຽງແຫ່ງຊາດລາວ ແມ່ນເປັນອາວຸດອັນແຫຼມຄົມຂອງພັກ ເພື່ອໂຄສະນາປຸກລະດົມຈິດໃຈຮັກຊາດ ປະກອບສ່ວນໃນພາລະກິດປົດປ່ອຍປະເທດຊາດຢ່າງສະຫງ່າງາມ ແລະ ສືບຕໍ່ຜັນຂະຫຍາຍມູນເຊື້ອອັນດີງາມຂອງຕົນເຂົ້າໃນພາລະກິດລວມແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ; ວິທະຍຸກະຈາຍສຽງແຫ່ງຊາດລາວ ເປັນພາຫະນະສື່ມວນຊົນທີ່ກະຈາຍຄື້ນໄປໄດ້ກ້ວາງໄກເຖິງເຂດຫ່າງໄກສອກຫຼີກ ແລະ ໄປເຖິງຫຼາຍປະເທດໃນໂລກ, ທັງເປັນເວທີສະແດງຄຳຄິດຄຳເຫັນຂອງມະຫາຊົນ ໄດ້ກາຍເປັນສາຍໄຍຜູກພັນລະຫວ່າງພັກ-ລັດກັບປະຊາຊົນ. ໃນສະພາບທີ່ມີການປ່ຽນແປງທາງດ້ານເຕັກໂນໂລຊີ ແລະ ສື່ອອນລາຍມາແຮງ ເຮັດໃຫ້ພຶດຕິກຳ ຄວາມນິຍົມຕິດຕາມຂໍ້ມູນຂ່າວສານຂອງຜູ້ບໍລິໂພກສື່ປ່ຽນໄປ ສະນັ້ນ, ພວກເຮົາມີຄວາມຈຳເປັນຕ້ອງໄດ້ຄົ້ນຄ້ວາຢ່າງພາວະວິໃສ ໃນການພັດທະນາວຽກງານວິທະຍຸໃນຕໍ່ໜ້າ ຄວນຈະປັບປຸງດ້ານເຕັກນິກຄືແນວໃດ ຮູບແບບການຜະລິດລາຍການ, ການຜະລິດຂ່າວ ແລະ ລາຍງານຂ່າວຈະດຳເນີນຄືແນວໃດນັ້ນເປັນບັນຫາທີ່ຈະຕ້ອງໄດ້ຄົ້ນຄ້ວາ ພິຈາລະນາຮ່ວມກັນຕໍ່ໜ້າ.
ທ່ານ ບົວໄລ ພານຸວົງ ມີຄຳເຫັນຕື່ມວ່າ: ການຈັດງານເສວະນາຄັ້ງນີ້ ເພື່ອຮັບຟັງການປະກອບຄຳຄິດເຫັນ ຂອງບັນດາວິທະຍຸທັງສູນກາງ ແລະ ທ້ອງຖິ່ນ ເພື່ອນຳໄປຄົ້ນຄວ້າ ພິຈາລະນາ ແລະ ກຳນົດເປັນທິດທາງ, ວິທີການພັດທະນາວຽກງານວິທະຍຸໃນຕໍ່ໜ້າໃນຍຸກດິຈິຕອນ ໃຫ້ມີຄວາມເຂັ້ມແຂງ ຕອບສະໜອງໄດ້ຕາມຄວາມຮຽກຮ້ອງຕ້ອງການໃນໄລຍະໃໝ່.