ບຸກທະລຸການບໍລິການຜ່ານປະຕູດຽວຕາມເສັ້ນທາງລົດໄຟລາວ-ຈີນ
ເມື່ອບໍ່ດົນມານີ້, ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ໄດ້ເດີນທາງໄປຢ້ຽມຢາມເຮັດວຽກຢູ່ ສປ ຈີນ ໂດຍໄດ້ພົບປະເຮັດວຽກກັບ ທ່ານ ສີ ຈິ້ນຜິງ ເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນ, ປະທານປະເທດ ແຫ່ງ ສປ ຈີນ ທີ່ນະຄອນຫຼວງປັກກິ່ງ.
ໃນການພົບປະຄັ້ງນີ້, ສອງຝ່າຍໄດ້ເປິກສາຫາລື ແລະ ຕົກລົງຫຼາຍບັນຫາສໍາຄັນ, ໜຶ່ງໃນນັ້ນແມ່ນການລົງນາມສັນຍາວ່າດ້ວຍການຈັດຕັ້ງປະຕິບັດວຽກງານ “ກວດກາປະຕູດຽວ, ຄັ້ງດຽວ” ຢູ່ດ່ານສະຖານີລົດໄຟສາກົນ ລາວ-ຈີນ (ບໍ່ເຕ່ນ-ບໍ່ຫານ) ສິ່ງນີ້ຖືເປັນການພັດທະນາທີ່ສໍາຄັນລະຫວ່າງ ລາວ ແລະ ຈີນ ໃນການເຊື່ອມໂຍງເຊື່ອມຈອດດ້ານລະບຽບການ ເພື່ອເຮັດໃຫ້ການບໍລິການຜ່ານດ່ານສາກົນຂອງສອງປະເທດຕາມເສັ້ນທາງລົດໄຟລາວ-ຈີນ ມີຄວາມສະດວກສະບາຍສໍາລັບຜູ້ໂດຍສານ ແລະ ການຂົນສົ່ງສິນຄ້າຂ້າມຊາດ.
ເສັ້ນທາງລົດໄຟລາວ-ຈີນ ເລີ່ມເປີດນໍາໃຊ້ຢ່າງເປັນທາງການໃນວັນທີ 3 ທັນວາ ປີ 2021, ມີໄລຍະທາງຈາກນະຄອນຫຼວງວຽງຈັນຂອງລາວໄປຫານະຄອນຄຸນໝິງ ແຂວງຢຸນນານຂອງຈີນ ຍາວ 1.039 ກິໂລແມັດ, ເປັນໂຄງການສໍາຄັນທີ່ຢູ່ພາຍໃຕ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ (BRI)”. ເນື່ອງຈາກມີຂໍ້ຈໍາກັດທາງດ້ານພູມສາດ, ສອງຝ່າຍໄດ້ຕົກລົງຈັດຕັ້ງດ່ານກວດກາສາກົນກ່ອນເຂົ້າປະເທດຂອງກັນ ແລະ ກັນຢູ່ 2 ສະຖານີ ຄື: ດ່ານກວດກາສາກົນຢູ່ສະຖານີບໍ່ເຕ່ນຂອງລາວ ແລະ ດ່ານກວດກາສາກົນຢູ່ສະຖານີບໍ່ຫານຂອງຈີນ ຊຶ່ງຕັ້ງຢູ່ເຂດຊາຍແດນຂອງສອງປະເທດ ມີໄລຍະຫ່າງກັນຫຼາຍກວ່າ 12 ກິໂລແມັດ ແລະ ເຊື່ອມຕໍ່ກັນດ້ວຍອຸມົງຂ້າມຊາຍແດນ ທີ່ເອີ້ນວ່າ: “ອຸມົງມິດຕະພາບ ລາວ-ຈີນ”.
ນັບແຕ່ເປີດບໍລິການລົດໄຟ ລາວ-ຈີນ ເປັນຕົ້ນມາ, ການກວດກາຜູ້ໂດຍສານລະຫວ່າງປະເທດຕ້ອງໄດ້ປະຕິບັດຢູ່ທັງສອງດ່ານສາກົນຂອງສອງປະເທດ. ໝາຍຄວາມວ່າ ຕ້ອງໄດ້ຂຶ້ນ ແລະ ລົງຢູ່ທັງສອງສະຖານີເພື່ອດໍາເນີນການກວດກາຕ່າງໆ ຕາມລະບຽບການຂອງສອງປະເທດ. ເບື້ອງຕົ້ນຕ້ອງໃຊ້ເວລາເຖິງ 3 ຊົ່ວໂມງຈຶ່ງສໍາເລັດ, ຕໍ່ມາໄດ້ປັບຕາຕະລາງເວລາ ແລະ ເປີດຊ່ອງທາງກວດສອບເພີ່ມຕື່ມ ເຮັດໃຫ້ຫຼຸດລົງເຫຼືອ 2 ຊົ່ວໂມງ. ສ່ວນການຂົນສົ່ງສິນຄ້າຜ່ານທາງລົດໄຟລາວ-ຈີນ ຕ້ອງຄ່ຽນຖ່າຍຕາມການກວດກາຜ່ານດ່ານຢູ່ສອງປະເທດ ແລະ ຈອດຢູ່ເຂດຊາຍແດນເປັນເວລາ 4 ຊົ່ວໂມງ ເຮັດໃຫ້ມີຊ່ອງຫວ່າງທີ່ຕ້ອງໄດ້ສືບຕໍ່ປັບປຸງເພື່ອໃຫ້ການຜ່ານດ່ານວ່ອງໄວຂຶ້ນກວ່າເກົ່າ.
ຍ້ອນເຫັນໄດ້ຄວາມສໍາຄັນຂອງເສັ້ນທາງລົດໄຟ ລາວ-ຈີນ ທີ່ເປັນເສັ້ນທາງຄໍາ, ສອງລັດຖະບານ ລາວ ແລະ ຈີນ ໄດ້ເອົາໃຈໃສ່ຊີ້ນໍາຢ່າງຕໍ່ເນື່ອງເພື່ອເຮັດໃຫ້ການບໍລິການຜູ້ໂດຍສານ ແລະ ການຂົນສົ່ງສິນຄ້າຂ້າມຊາຍແດນຜ່ານລົດໄຟດັ່ງກ່າວມີຄວາມສະດວກສະບາຍກວ່າເກົ່າ. ດັ່ງນັ້ນ, ໃນຊຸມປີມໍ່ໆ ມານີ້, ຄະນະຮັບຜິດຊອບຂອງສອງຝ່າຍ ໄດ້ປະຕິບັດຕາມຄວາມເຫັນສໍາຄັນທີ່ການນໍາຂັ້ນສູງຂອງສອງປະເທດ, ຍຶດໝັ້ນທັດສະນະອັນຍາວນານ, ເອົາໃຈໃສ່ປະຊາຊົນເປັນອັນດັບ ໜຶ່ງ ແລະ ນໍາເອົາແນວຄິດດ້ານນະວັດຕະກໍາມາໃຊ້, ພ້ອມທັງຖອດຖອນບົດຮຽນຈາກການປະຕິບັດຕົວຈິງໃນໄລຍະຜ່ານມາ.
ໃນທີ່ສຸດຄວາມພະຍາຍາມຂອງສອງຝ່າຍກໍເປັນຈິງ ເມື່ອສັນຍາວ່າດ້ວຍການປະຕິບັດວຽກງານ “ກວດກາປະຕູດຽວ, ຄັ້ງດຽວ” ຢູ່ດ່ານສະຖານີລົດໄຟສາກົນ ລາວ-ຈີນ (ບໍ່ເຕ່ນ-ບໍ່ຫານ) ໄດ້ຮັບການລົງນາມຮ່ວມກັນຂອງສອງຝ່າຍລາວ ແລະ ຈີນ ໃນໂອກາດທີ່ ທ່ານ ທອງລຸນ ສີສຸລິດ ເດີນທາງຢ້ຽມຢາມເຮັດວຽກຢູ່ ສປ ຈີນ ໃນຄັ້ງນີ້.
“ກວດກາປະຕູດຽວ, ຄັ້ງດຽວ” ໝາຍເຖິງເຈົ້າໜ້າທີ່ກ່ຽວຂ້ອງຂອງລາວ ແລະ ຈີນ ຈະຮ່ວມກັນປະຕິບັດໜ້າທີ່ຂອງຕົນເພື່ອກວດກາການຂາເຂົ້າ-ຂາອອກຢູ່ດ່ານກວດກາຈຸດດຽວກັນ, ໃນນີ້ ຈະດໍາເນີນການກວດກາຜູ້ໂດຍສານທັງຂາເຂົ້າ ແລະ ຂາອອກຂອງລົດໄຟທີ່ມາຈາກຝ່າຍຈີນຢູ່ດ່ານສາກົນບໍ່ເຕ່ນ ແລະ ກວດກາຜູ້ໂດຍສານທັງຂາອອກ ແລະ ຂາເຂົ້າຂອງລົດໄຟທີ່ໄປຈາກຝ່າຍລາວຢູ່ດ່ານສາກົນບໍ່ຫານ ເຮັດໃຫ້ຜູ້ໂດຍສານຂອງລົດໄຟລາວ-ຈີນ ບໍ່ຈຳເປັນຕ້ອງລົງກວດກາຜ່ານດ່ານຊາຍແດນຂອງທັງສອງປະເທດອີກຕໍ່ໄປ, ເຊິ່ງຄາດວ່າຈະໃຊ້ເວລາໃນການກວດກາບໍ່ຮອດ 30 ນາທີ ກໍສໍາເລັດ.
ສ່ວນການຂົນສົ່ງສິນຄ້າຜ່ານທາງລົດໄຟ ລາວ-ຈີນ ທີ່ຕ້ອງຄ່ຽນຖ່າຍຕາມ “ການກວດກາຜ່ານດ່ານຢູ່ສອງປະເທດ” ແລະ ຕ້ອງໃຊ້ເວລາເຖິງ 4 ຊົ່ວໂມງ, ເມື່ອປະຕິບັດຕາມ “ການກວດກາປະຕູດຽວ, ຄັ້ງດຽວ” ຈະສາມາດປ່ອຍການຂົນສົ່ງສິນຄ້າໄດ້ດີກວ່າເກົ່າຫຼາຍກວ່າ 30% ເຊິ່ງຈະສ້າງຄວາມສະດວກສະບາຍຫຼາຍກວ່າເກົ່າໃຫ້ແກ່ການຂົນສົ່ງໝາກໄມ້ ແລະ ຜັກແຊ່ເຢັນ ກໍຄື ການຄ້າເອເລັກໂຕຣນິກຂ້າມຊາດລະຫວ່າງຈີນ-ລາວ-ໄທ.
ວຽກງານ “ກວດກາປະຕູດຽວ, ຄັ້ງດຽວ” ຢູ່ດ່ານສະຖານີລົດໄຟສາກົນ ລາວ-ຈີນ (ບໍ່ເຕັນ-ບໍ່ຫານ) ບໍ່ແມ່ນການຫຼຸດຜ່ອນການຄວບຄຸມ, ແຕ່ແມ່ນການຫັນປ່ຽນການກວດກາແບບຕາມລຳດັບໃຫ້ກາຍເປັນການກວດກາແບບໄປພ້ອມກັນ ຄື: ສອງຝ່າຍຊົມໃຊ້ຂໍ້ມູນຮ່ວມກັນ, ບັນລຸ “ການກວດກາຜ່ານເຄື່ອງຈັກຄັ້ງດຽວ ແລະ ສອງປະເທດຊົມໃຊ້ຂໍ້ມູນການກວດກາຮ່ວມກັນ” ເຊິ່ງຊ່ວຍຫຼຸດຜ່ອນເວລາລໍຖ້າຂອງຜູ້ໂດຍສານ ແລະ ຄວາມວ່ອງໄວຂອງການຂົນສົ່ງສິນຄ້າຊ້າມຊາດ, ທັງເປັນການຊ່ວຍຍົກລະດັບຄວາມແມ່ນຢຳໃນການກະກັດກັ້ນຄວາມສ່ຽງຕ່າງໆ ອີກດ້ວຍ.
ນີ້ຖືເປັນການປັບປຸງທີ່ສໍາຄັນ, ທັງສອດຄ່ອງກັບຄວາມຕ້ອງການຂອງຜູ້ໂດຍສານ ກໍຄື ການຂົນສົ່ງສິນຄ້າຂ້າມປະເທດທີ່ຕ້ອງການຄວາມສະດວກສະບາຍ, ວ່ອງໄວ ແລະ ປອດໄພ, ທັງຊ່ວຍຫຼຸດຜ່ອນຈໍານວນພະນັກງານ ແລະ ເຄື່ອງມືອຸປະກອນຊໍ້າຊ້ອນ ເຊິ່ງເປັນການປະຢັດຊັບພະຍາກອນຢ່າງມີປະສິດທິຜົນ. ຂະນະດຽວກັນ ນີ້ບໍ່ພຽງແຕ່ເປັນການຜ່ານດ່ານທີ່ວ່ອງໄວກວ່າເກົ່າ ເທົ່ານັ້ນ, ຍັງເປັນການປະຕິບັດຕົວຈິງທີ່ເຮັດໃຫ້ກົດໝາຍ, ລະບຽບການ, ຄວາມໄວ້ເນື້ອເຊື່ອໃຈ ແລະ ຜົນປະໂຫຍດຂອງສອງປະເທດເຊື່ອມໂຍງເຂົ້າກັນ ແລະ ເຮັດໃຫ້ການໄປມາຫາສູ່ກັນລະຫວ່າງປະຊາຊົນສອງປະເທດກ້າວເຂົ້າສູ່ລວງເລິກຢ່າງໜັກແໜ້ນ.
ເຊື່ອແນ່ວ່າ: ການປະຕິບັດວຽກງານ “ກວດກາປະຕູດຽວ, ຄັ້ງດຽວ” ຢູ່ດ່ານສະຖານີລົດໄຟສາກົນ ລາວ-ຈີນ (ບໍ່ເຕັນ-ບໍ່ຫານ) ຈະຍິ່ງເພີ່ມການອໍານວຍຄວາມສະດວກໃນການບໍລິການ, ຊຸກຍູ້ສົ່ງ ເສີມການແລກປ່ຽນ ຊື້-ຂາຍສິນຄ້າ, ການລົງທຶນ, ການທ່ອງທ່ຽວຢູ່ພາຍໃນແຂວງພາກເໜືອ ກໍຄືໃນປະເທດລາວໃຫ້ມີການຂະຫຍາຍຕົວ, ໂດຍສະເພາະເປັນປະເທດເຊື່ອມໂຍງພາກພື້ນກັບປະເທດລຸ່ມແມ່ນໍ້າຂອງ, ສ້າງສິ່ງເອື້ອອຳນວຍຄວາມສະດວກໃຫ້ແກ່ພົນລະເມືອງລາວ, ຈີນ ແລະ ພົນລະເມືອງປະເທດທີສາມເດີນທາງ ເຂົ້າ-ອອກ ຜ່ານດ່ານສາກົນທາງລົດໄຟແຫ່ງນີ້, ໄປພ້ອມໆ ກັບການຂົນສົ່ງສິນຄ້າຂ້າມຊາດທີ່ສະດວກ ແລະ ວ່ອງໄວກວ່າແຕ່ກ່ອນ, ທັງສ້າງໂອກາດໃນດ້ານການຄ້າ ແລະ ການລົງທຶນລະຫວ່າງລາວ ແລະ ຈີນ ກັບປະເທດຕ່າງໆ ນັບມື້ເພີ່ມຂຶ້ນເຊັ່ນດຽວກັນ ເຊິ່ງຈະເຮັດໃຫ້ເສັ້ນ ທາງລົດໄຟລາວ-ຈີນ ສືບຕໍ່ເປັນເສັ້ນທາງຄໍາທີ່ຊຸກຍູ້ການພັດທະນາເສດຖະກິດຂອງລາວ ແລະ ຈີນ ກໍຄືຂອງພາກພື້ນຕະຫຼອດໄປ.
ໂດຍ: BT, ວສລ