ສະຖາບັນເລືອດແຫ່ງຊາດ ອົງການກາແດງແຫ່ງຊາດລາວ ຮ່ວມກັບ ກະຊວງອຸດສາຫະກຳ ແລະ ການຄ້າ, ບໍລິສັດເບຍລາວ, ລັດວິສາຫະກິດໄຟຟ້າລາວ ໄດ້ຈັດກິດຈະກຳຮັບບໍລິຈາກເລືອດ ເພື່ອຊ່ວຍເຫຼືອສັງຄົມ ໃນວັນທີ 22 ກັນຍາ 2025 ທີ່ສຳນັກງານໃຫຍ່ ບໍລິສັດເບຍລາວ ເພື່ອເປັນການປະກອບສ່ວນຊຸກຍູ້ ຕໍ່ວຽກງານມະນຸດສະທຳ ແລະ ເພື່ອຊ່ວຍຊີວິດຂອງເພື່ອນມະນຸດດ້ວຍກັນ.
ທ່ານ ຈັນສະແຫວງ ບຸນຍົງ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ກ່າວວ່າ: ການຈັດກິດຈະກຳບໍລິຈາກເລືອດຄັ້ງນີ້, ເປັນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ອົງຄະນະພັກກະຊວງອຸດສາຫະກຳ ແລະ ການຄ້າ, ປະກອບສ່ວນເຂົ້າໃນການສະເຫຼີມສະຫຼອງ ຄົບຮອບ 50 ປີ ຂອງການສ້າງຕັ້ງກະຊວງອຸດສາຫະກຳ ແລະ ການຄ້າ, ທັງເປັນການປະກອບສ່ວນຊຸກຍູ້ວຽກງານມະນຸດສະທຳ ແລະ ເພື່ອຊ່ວຍຊີວິດຂອງເພື່ອນມະນຸດດ້ວຍກັນ. ພ້ອມນີ້, ທ່ານຍັງໄດ້ເຊີນຊວນ ບຸກຄົນທີ່ມີຄວາມພ້ອມທາງດ້ານຮ່າງກາຍ, ມີສຸຂະພາບແຂງແຮງ, ຜູ້ທີ່ມີເງື່ອນໄຂ ຈົ່ງພ້ອມກັນສະໝັກໃຈຮ່ວມບໍລິຈາກເລືອດຢູ່ສູນເລືອດແຫ່ງຊາດ, ສູນເລືອດແຂວງ ເພື່ອໃຫ້ມີເລືອດພຽງພໍ, ປອດໄພ ແລະ ຕອບສະໜອງໃຫ້ໄດ້ທັນເວລາ.
ໂອກາດນີ້, ທ່ານ ເຮນຣິກ ຈູລ ແອນເດີແຊນ ຜູ້ອຳນວຍການໃຫຍ່ ບໍລິສັດເບຍລາວ ຈຳກັດ ໄດ້ກ່າວວ່າ: ການບໍລິຈາກເລືອດ ແມ່ນມີຄວາມສຳຄັນ ເຊິ່ງສາມາດຊ່ວຍເຫຼືອຊີວິດເພື່ອນມະນຸດດ້ວຍກັນ, ທັງເປັນການປະກອບສ່ວນຊ່ວຍເຫຼືອສັງຄົມ ໂດຍບໍ່ຫວັງຜົນຕອບແທນ. ເລືອດມີຄວາມສຳຄັນຕໍ່ກັບຮ່າງກາຍຂອງຄົນ, ສາມາດຫລຸດຜ່ອນອັດຕາການຕາຍໄດ້. ໃນໄລຍະຜ່ານມາ, ບໍລິສັດ ເບຍລາວ ໄດ້ໃຫ້ການສະໜັບສະໜູນ, ຊ່ວຍເຫຼືອກິດຈະກຳບໍລິຈາກເລືອດໃນຮູບແບບຕ່າງໆ ເປັນຕົ້ນ ມອບລົດຕູ້ໃຫ້ສະຖາບັນເລືອດ ເພື່ອນຳໃຊ້ເຂົ້າໃນວຽກງານ ກິດຈະກຳຮັບບໍລິການເລືອດ, ສ້າງຂະບວນການບໍລິຈາກເລືອດ ເຊິ່ງສາມາດລະດົມພະນັກງານ ເຂົ້າຮ່ວມບໍລິຈາກເລືອດໄດ້ປະມານ 500 ຖົງ/ປີ.
ທ່ານ ຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ ອົງການກາແດງແຫ່ງຊາດລາວ ໄດ້ກ່າວວ່າ: ກິດຈະກຳໃນຄັ້ງນີ້ມີຜູ້ບໍລິຈາກເລືອດຈຳນວນ 69 ຖົງ. ທ່ານໃຫ້ຮູ້ຕື່ມວ່າ : ເລືອດເປັນສິ່ງໜຶ່ງທີ່ສຳຄັນ ແລະ ຂາດບໍ່ໄດ້ ເຂົ້າໃນການປິ່ນປົວ. ສະນັ້ນ, ການປຸກລະດົມຂົນຂວາຍ ການບໍລິຈາກເລືອດແມ່ນມີຄວາມຈຳເປັນທີ່ສຸດ ເຊິ່ງການບໍລິຈາກເລືອດຂອງທ່ານ ແມ່ນການຕໍ່ຊີວິດ, ຕໍ່ລົມຫາຍໃຈໃຫ້ກັບເພື່ອນມິດ, ຕໍ່ລົມຫາຍໃຈໃຫ້ກັບຄົນເຈັບ ເປັນຕົ້ນ ການຜ່າຕັດ, ອຸບັດເຫດ, ແມ່ຍິງຖືພາ, ການເກີດລູກທີ່ມີອາການສົນ, ມະເຮັງ, ໄຂ່ຫລັງຊຸດໂຊມ ແລະ ອື່ນໆ ເຊິ່ງການມີເລືອດສໍາຮອງຢູ່ໃນສະຖາບັນເລືອດແຫ່ງຊາດ, ສູນເລືອດແຂວງ ແລະ ບັນດາໜ່ວຍເກັບຮັກສາເລືອດຂັ້ນເມືອງ ແມ່ນມີຄວາມຈຳເປັນຫລາຍ ເພື່ອຕອບສະໜອງເລືອດທີ່ປອດໄພໃຫ້ແກ່ຄົນເຈັບໃຫ້ທັນເວລາ.
ຂ່າວ : ອຳໄພວັນ