ວັນທີ 11 ຕຸລາ 2025 ທີ່ເດີ່ນປະຕູໄຊ, ກະຊວງການຕ່າງປະເທດ ໄດ້ຈັດກິດຈະກໍາ “ຍ່າງເພື່ອສຸຂະພາບ” ເພື່ອຂໍ່ານັບຮັບຕ້ອນ ແລະ ສະເຫຼີມສະຫຼອງວັນການທູດລາວ ຄົບຮອບ 80 ປີ (12 ຕຸລາ 1945-12 ຕຸລາ 2025) ໂດຍການໃຫ້ກຽດເຂົ້າຮ່ວມເປັນແຂກກິດຕິມະສັກຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ພ້ອມດ້ວຍຮອງນາຍົກລັດຖະມົນຕີ, ຮອງປະທານສະພາແຫ່ງຊາດ, ລັດຖະມົນຕີ, ຮອງລັດຖະມົນຕີ, ບັນດາທູຕານຸທູດ ແລະ ຜູ້ຕາງໜ້າອົງການຈັດຕັ້ງມະຫາຊົນ ປະຈໍາລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ໄດ້ຍົກໃຫ້ເຫັນຄວາມໝາຍສໍາຄັນຂອງວຽກງານການທູດລາວ ຊຶ່ງຕິດພັນຢ່າງສະໜິດແໜ້ນກັບຂະບວນການປະຕິວັດປົດປ່ອຍຊາດ, ເປັນການລະນຶກເຖິງຄຸນງາມຄວາມດີ ແລະ ຜົນງານອັນລໍ້າຄ່າຂອງປະຊາຊົນລາວວິລະຊົນ ຜູ້ໄຝ່ຫາຄວາມເປັນເອກະລາດແຫ່ງຊາດ ແລະ ຮັກຫອມສັນຕິພາບ ໄດ້ປະກາດເອກະລາດ ແລະ ແນວທາງນະໂຍບາຍການຕ່າງປະເທດຂອງຕົນ ໃຫ້ປະຊາຄົມໂລກໄດ້ຮັບຮູ້, ພ້ອມທັງຍົກໃຫ້ເຫັນເຖິງຂະບວນວິວັດແຫ່ງການເຄື່ອນໄຫວການທູດ ກໍຄື ບັນດາຜົນສໍາເລັດ ຂອງຂະແໜງການຕ່າງປະເທດ ທີ່ຍາດມາໄດ້ໃນຕຫຼອດໄລຍະ 8 ທົດສະວັດຜ່ານມາ ທັງໃນຂອບສອງຝ່າຍ ແລະ ຫຼາຍຝ່າຍ ໂດຍສະເພາະການເປີດກວ້າງການຮ່ວມມື ແລະ ຍົກລະດັບສາຍພົວພັນຄູ່ຮ່ວມຍຸດທະສາດກັບຫຼາຍປະເທດ ລວມທັງການປະກອບສ່ວນຢ່າງຕັ້ງໜ້າ ເຂົ້າໃນວຽກງານສາກົນ ຢ່າງມີຄວາມຮັບຜິດຊອບ ດ້ວຍຫຼາຍຮູບການ ໃນເວທີອົງການສະຫະປະຊາຊາດ, ອາຊຽນ, ຂອບການຮ່ວມມືພາກພື້ນ ແລະ ອະນຸພາກພື້ນຕ່າງໆ ໂດຍສືບຕໍ່ຍຶດໝັ້ນແນວທາງການຕ່າງປະເທດອັນສະເໝີຕົ້ນສະເໝີປາຍຂອງ ສປປ ລາວ “ສັນຕິພາບ, ເອກະລາດ, ມິດຕະພາບ ແລະ ການຮ່ວມມື”, ຕາມທິດນໍາ ເພີ່ມມິດຫຼຸດຜ່ອນສັດຕູ ແລະ ມີການພົວພັນແບບຫຼາຍທິດ, ຫຼາຍຝ່າຍ ແລະ ຫຼາຍລະດັບ ເພື່ອສ້າງສະພາບແວດລ້ອມທີ່ເອື້ອອໍານວຍ ໃຫ້ແກ່ການສົ່ງເສີມສັນຕິພາບ, ຄວາມໝັ້ນຄົງ ແລະ ການຮ່ວມມືເພື່ອການພັດທະນາທີ່ກວ້າງຂວາງຢູ່ພາຍໃນປະເທດ, ປະກອບສ່ວນເຂົ້າໃນພາລະກິດລວມຂອງພາກພື້ນ ແລະ ສາກົນ, ເພີ່ມທະວີການເຄື່ອນໄຫວການທູດການເມືອງຕິດພັນກັບການທູດເສດຖະກິດ, ເອົາໃຈໃສ່ສົ່ງເສີມການຮ່ວມມືດ້ານການຄ້າ, ການລົງທຶນກັບຕ່າງປະເທດ ໃຫ້ນັບມື້ນັບກວ້າງຂວາງຫຼາຍຂຶ້ນ ໂດຍອີງໃສ່ທ່າແຮງ ແລະ ຈຸດພິເສດດ້ານພູມສາດຂອງປະເທດ, ກໍາເອົາກາລະໂອກາດຈາກປະເທດທີ່ບໍ່ມີຊາຍແດນຕິດຈອດກັບທະເລ ໃຫ້ກາຍເປັນສູນກາງການເຊື່ອມໂຍງເຊື່ອມຈອດຂອງອະນຸພາກພື້ນ, ສືບຕໍ່ເພີ່ມທະວີການເຄື່ອນໄຫວວຽກງານການທູດປະຊາຊົນ ບົນພື້ນຖານການເຄົາລົບເອກະລາດ, ອໍານາດອະທິປະໄຕເຊິ່ງກັນ ແລະ ກັນ, ຕ່າງຝ່າຍຕ່າງໄດ້ຮັບຜົນປະໂຫຍດ, ອໍານວຍຄວາມສະດວກໃຫ້ປະຊາຊົນ ໃນການເດີນທາງໄປມາຫາສູ່ໃຫ້ມີຄວາມສະດວກສະບາຍ ເພື່ອສົ່ງເສີມວຽກງານການ ທ່ອງທ່ຽວໃຫ້ເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນເຂົ້າໃນການຊຸກຍູ້ເສດຖະກິດຂອງທ້ອງຖິ່ນໃຫ້ເຕີບໂຕຢ່າງໝັ້ນທ່ຽງ ແລະ ຍືນຍົງ ແນໃສ່ນໍາພາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາ ກໍຄື ບັນເປົ້າໝາຍປີ 2030 ເພື່ອການພັດທະນາແບບຍືນຍົງ (SDG).
ນອກຈາກກິດຈະກໍາຍ່າງເພື່ອສຸຂະພາບແລ້ວ, ໃນພິທີຍັງໄດ້ເປີດໂອກາດໃຫ້ ຜູ້ເຂົ້າຮ່ວມໄດ້ຖາມ-ຕອບຄວາມຮູ້ຮອບຕົວກ່ຽວກັບວັນການທູດລາວ, ການຈັດກິດຈະກໍາຄັ້ງນີ້ແມ່ນມີຜົນສໍາເລັດຢ່າງຈົບງາມ.