ງານວາງສະແດງສິນຄ້າ ລາວ-ໄທ, ໄທ-ລາວ ເພື່ອສະຫຼອງກະຖິນມະຫາສາມັກຄີລະຫວ່າງສອງຊາດປະຈຳປີ 2025 ຈັດຂຶ້ນຢ່າງເປັນທາງການ ໃນຕອນແລງວັນທີ 14 ຕຸລາ 2025 ທີ່ສູນການຄ້າສະຫວັນໄອເຕັກ ນະຄອນໄກສອນ ພົມວິຫານ ແຂວງສະຫວັນນະເຂດ ພາຍໃຕ້ການເປັນປະທານຂອງທ່ານ ໂພໄຊ ໄຂຄຳພິທູນ ຮອງເຈົ້າແຂວງສະຫວັນນະເຂດ, ມີທ່ານ ອະພິຊາດ ເພັດຣັດ ອຸປະນາຍົກ ສະມາຄົມໄທ-ລາວ ເພື່ອມິດຕະພາບ, ທ່ານ ບົວໄລ ພານຸວົງ ເລຂາທິການສະມາຄົມລາວ-ໄທ ເພື່ອມິດຕະພາບ ພ້ອມດ້ວຍແຂກຮັບເຊີນເຂົ້າຮ່ວມ.
ການຈັດງານວາງສະແດງສິນຄ້າລາວ-ໄທ,ໄທ-ລາວ ເພື່ອສະຫຼອງກະຖິນມະຫາສາມັກຄີລະຫວ່າງສອງຊາດປະຈຳປີ 2025 ແລະ ເພື່ອຮັດແໜ້ນຄວາມສາມັກຄີລະຫວ່າງສອງຊາດ ໃຫ້ນັບມື້ແໜ້ນແຟ້ນຍິ່ງຂຶ້ນ.
ສ່ວນວັນສົມໂພດກະຖິນ ຈະຈັດຂຶ້ນໃນວັນທີ 18 ຕຸລາ 2025 ເລີ່ມແຕ່ເວລາ 17 ໂມງເປັນຕົ້ນໄປ, ເວລາ 19 ໂມງ ພິທີສະຫຼອງກະຖິນ, ຊົມການສະແດງສິລະປະລາວ-ໄທ ແລະ ພິທີມອບຜ້າຫົ່ມ, ຢາປົວພະຍາດ ແລະອື່ນໆ.
ວັນທີ 19 ຕຸລາ 2025 ພິທີເຊີນກະຖິນ ເພື່ອທອດຖວາຍທີ່ວັດສຸນັນທາຣາມ ນະຄອນໄກສອນພົມວິຫານ ແຂວງສະຫວັນນະເຂດ.
ຈຶ່ງຂໍເຊີນທຸກທ່ານຮ່ວມເປັນສ່ວນໜຶ່ງໃນງານທອດຖວາຍມະຫາກະຖິນໃນຄັ້ງນີ້.
ຂ່າວ-ພາບ : ວສລ