ສາຍການບິນ Vietjet ແລະ Airways Aviation ຜູ້ນໍາດ້ານການສຶກສາການບິນທົ່ວໂລກ ໄດ້ລົງນາມໃນສັນຍາຮ່ວມມືຍຸດທະສາດ ເພື່ອຝຶກອົບຮົມບຸກຄະລາກອນທີ່ມີຄຸນນະພາບສູງໃຫ້ແກ່ອຸດສາຫະກໍາການບິນທົ່ວໂລກ. ພິທີລົງນາມຈັດຂຶ້ນໃນວັນທີ 24 ຕຸລາ 2025 ຢູ່ຫວຽດນາມ, ພາຍໃຕ້ການໃຫ້ກຽດເຂົ້າຮ່ວມເປັນສັກຂີພະຍານຂອງທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ພ້ອມດ້ວຍຜູ້ຕາງໜ້າຂັ້ນສູງຈາກລັດຖະບານ ແລະ ນັກທຸລະກິດຂອງທັງສອງປະເທດ ຫວຽດນາມ ແລະ ແຟັງລັງ.
ພາຍໃຕ້ສັນຍາດັ່ງກ່າວ, Airways Aviation ຈະຮ່ວມມືກັບສະຖາບັນການບິນ Vietjet (VJAA) ຈັດຕັ້ງປະຕິບັດໂຄງການຝຶກອົບຮົມນັກບິນຕາມມາດຕະຖານສາກົນໃນທະວີບເອີຣົບ. ໂຄງການເຫຼົ່ານີ້ຈະປະຕິບັດຕາມລະບຽບການຂອງອົງການການບິນພົນລະເຮືອນສາກົນ (ICAO), ອົງການຄວາມປອດໄພການບິນຂອງສະຫະພາບເອີຣົບ (EASA) ແລະ ອົງການການບິນພົນລະເຮືອນຂອງຫວຽດນາມ (CAAV). ຫຼັກສູດສະເພາະດ້ານ MPL (ໃບອະນຸຍາດນັກບິນທີ່ປະຈຳການຫຼາຍຄົນ) ແລະ CPL (ໃບອະນຸຍາດນັກບິນການຄ້າ) ມີຈຸດປະສົງເພື່ອສ້າງນັກບິນຮຸ່ນໃໝ່ທີ່ມີຄຸນນະພາບໃນລະດັບສາກົນ ເພື່ອສະໜັບສະໜູນການຂະຫຍາຍຕົວທົ່ວໂລກ ແລະ ຍຸດທະສາດການເຕີບໂຕແບບຍືນຍົງຂອງ Vietjet.
Vietjet ດໍາເນີນການບິນຢ່າງຫ້າວຫັນໃນຕະຫຼາດພາຍໃນຫວຽດນາມ ແລະ ຕະຫຼາດສາກົນ, ລວມທັງລາວ ດ້ວຍຖ້ຽວບິນປະຈໍາວັນທີ່ເຊື່ອມຕໍ່ນະຄອນຫຼວງວຽງຈັນກັບນະຄອນຫຼວງຮ່າໂນ້ຍ ແລະ ນະຄອນໂຮ່ຈີມີ່ງ ໃນຖານະເປັນກຸ່ມການບິນສາກົນ, Vietjet ຍັງສືບຕໍ່ຂະຫຍາຍເຄືອຂ່າຍຖ້ຽວບິນຂອງຕົນ, ດຶງດູດພອນສະຫວັນລະດັບສູງສຸດ, ສະໜອງການບໍລິການ ແລະ ຜະລິດຕະພັນລະດັບໂລກ. ສາຍການບິນຍັງຄົງມີການດໍາເນີນງານທີ່ແຂງແຮງໃນທົ່ວພາກພື້ນອາຊີ-ປາຊີຟິກ ແລະ ກໍາລັງກະກຽມຂະຫຍາຍຕົວເພີ່ມຕື່ມໃນຕະຫຼາດໃຫຍ່ຢູ່ທະວີບເອີຣົບ ແລະ ອາເມຣິກາ.
ໃນຖານະຄູ່ຮ່ວມຝຶກອົບຮົມທີ່ໄດ້ຮັບການຮັບຮອງຈາກ IATA ໃນຫວຽດນາມ, VJAA ໄດ້ຝຶກອົບຮົມນັກບິນ, ພະນັກງານຕ້ອນຮັບ, ວິສະວະກອນ, ພະນັກງານຄວບຄຸມການບິນ, ແລະ ຜູ້ຊ່ຽວຊານດ້ານການບິນອື່ນໆ ເກືອບ 400.000 ຄົນ, ໄດ້ສ້າງຄວາມເຂັ້ມແຂງໃຫ້ແກ່ຄວາມຝັນໃນການຄອງທ້ອງຟ້າ ແລະ ຂັບເຄື່ອນການເຕີບໂຕແບບຍືນຍົງຂອງອຸດສາຫະກໍາ. Airways Aviation ເປັນສະຖາບັນຝຶກອົບຮົມການບິນທີ່ໄດ້ຮັບການຍອມຮັບໃນທົ່ວໂລກ ມີການດໍາເນີນງານຢ່າງເຂັ້ມແຂງໃນທົ່ວເອີຣົບ, ຕາເວັນອອກກາງ, ອາຊີ, ແລະ ອົດສະຕຣາລີ, ດ້ວຍປະສົບການມາຫຼາຍກວ່າ 45 ປີ.