ຈີນ ກຽມພ້ອມກ້າວເຂົ້າສູ່ແຜນພັດທະນາ 5 ປີ ຄັ້ງທີ 15 ດ້ວຍຄຸນນະພາບໃໝ່ທີ່ສູງຂຶ້ນກວ່າເກົ່າ
ເມື່ອບໍ່ດົນມານີ້, ກອງປະຊຸມຄົບຄະນະຄັ້ງທີ 4 ຂອງຄະນະກຳມະການສູນກາງພັກຄອມມູນິດຈີນ ສະໄໝທີ 20 ຈັດຂຶ້ນຢູ່ນະຄອນຫຼວງປັກກິ່ງ ຖືເປັນກອງປະຊຸມສໍາຄັນທີ່ທົ່ວໂລກຕ່າງໃຫ້ຄວາມສົນໃຈ ເພາະເປັນກອງປະຊຸມທີ່ເນັ້ນໃສ່ເປິກສາຫາລືກ່ຽວກັບແຜນພັດທະນາເສດຖະກິດ-ສັງຄົມ ແຫ່ງຊາດ 5 ປິ ຄັ້ງທີ 15 ຂອງຈີນ (2026- 2030) ຫຼືເອີ້ນຫຍໍ້ວ່າ: ແຜນພັດທະນາ 5 ປີ ຄັ້ງທີ 15, ເພາະການຈັດຕັ້ງປະຕິບັດແຜນພັດທະນາ 5 ປີ ຄັ້ງທີ 14 ຈະສິ້ນສຸດໃນປີ 2025.
ກອງປະຊຸມຄົບຄະນະຄັ້ງນີ້ໄດ້ເນັ້ນໜັກວ່າ: ການພັດທະນາເສດຖະກິດ-ສັງຄົມຂອງຈີນໃນໄລຍະແຜນພັດທະນາ 5 ປີ ຄັ້ງທີ 15 ຕ້ອງປະຕິບັດຕາມຫຼັກການທີ່ຍຶດໝັ້ນການນໍາພາລວມຂອງພັກຄອມມູນິດຈີນ ໂດຍຖືເອົາປະຊາຊົນຢູ່ເໜືອກວ່າທຸກສິ່ງຢ່າງ, ການພັດທະນາທີ່ມີຄຸນນະພາບສູງ, ການປະຕິຮູບທີ່ເລິກເຊິ່ງກວ່າເກົ່າໃນທຸກດ້ານ, ປະສົມປະສານລະຫວ່າງຕະຫຼາດທີ່ມີປະສິດທິພາບ ແລະ ລັດຖະບານທີ່ມີປະສິດທິພາບ, ຍຶດໝັ້ນປະສານງານການພັດທະນາ, ຄວາມໝັ້ນຄົງ ແລະອື່ນໆ.
ກອງປະຊຸມໄດ້ກໍານົດເປົ້າໝາຍການສ້າງແຜນພັດທະນາເຊັ່ນ: ຕ້ອງບັນລຸຜົນສໍາເລັດທີ່ສໍາຄັນໃນການພັດທະນາທີ່ມີຄຸນນະພາບສູງ, ຍົກລະດັບການເພິ່ງຕົນເອງໃນດ້ານວິທະຍາສາດເຕັກໂນໂລຊີໃຫ້ສູງຂຶ້ນຢ່າງຈະແຈ້ງ, ການປະຕິຮູບເລິກເຊິ່ງໃນທຸກດ້ານບັນລຸຄວາມກ້າວໜ້າໃໝ່ທີ່ຍິ່ງໃຫຍ່ກວ່າເກົ່າ, ເປີດປະຕິສູ່ພາຍນອກໃນລະດັບສູງ ແລະອື່ນໆ ເພື່ອເຮັດໃຫ້ເສດຖະກິດຈີນສືບຕໍ່ເຕີບໂຕຢ່າງຕໍ່ເນື່ອງໃນ 5 ປີຕໍ່ໜ້າ ແລະ ພາຍໃນປີ 2035 ຈີນຈະບັນລຸການກ້າວກະໂດດທີ່ສໍາຄັນທັງໃນດ້ານຄວາມເຂັ້ມແຂງດ້ານເສດຖະກິດ, ຄວາມເຂັ້ມແຂງດ້ານວິທະຍາສາດເຕັກໂນໂລຊີ, ຄວາມເຂັ້ມແຂງດ້ານການປ້ອງກັນປະເທດ, ລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນເພີ່ມຂຶ້ນໃນລະດັບດຽວກັບປະເທດພັດທະນາປານກາງ, ປະຊາຊົນມີຊີວິດທີ່ມີຄວາມສຸກ, ນັບມື້ດີຂຶ້ນກວ່າເກົ່າ ແລະອື່ນໆ.
ແຜນພັດທະນາ 5 ປີ ຄັ້ງທີ 15 ຂອງຈີນ ແມ່ນໄລຍະສໍາຄັນຍິ່ງສໍາລັບການວາງຮາກຖານ ແລະ ການຊຸກຍູ້ສັງຄົມນິຍົມທັນສະໄໝຂອງຈີນໃນທຸກດ້ານ. ແຜນພັດທະນາດັ່ງກ່າວ ຈຶ່ງມີບົດບາດສໍາຄັນທີ່ສືບທອດຜົນສໍາເລັດອັນເກົ່າໄປສູ່ຜົນສໍາເລັດໃໝ່ທີ່ໃຫຍ່ຫຼວງກວ່າເກົ່າໃນຂະບວນການບັນລຸສັງຄົມນິຍົມທັນສະໄໝໂດຍພື້ນຖານຂອງຈີນ. ໂດຍລວມແລ້ວຍຸດທະສາດການພັດທະນາຂອງແຜນພັດທະນານີ້ ມີສອງດ້ານທີ່ມີຄວາມໂດດເດັ່ນເປັນພິເສດ ຄື: ດ້ານນະວັດຕະກໍາ ຫຼື ການປະດິດສ້າງໃໝ່ ແລະ ການຍຶດໝັ້ນຖືເອົາປະຊາຊົນຢູ່ເໜືອທຸກສິ່ງຢ່າງ.
ການມຸ່ງເນັ້ນໃສ່ດ້ານການປະດິດສ້າງໃໝ່ ຈະກວມເອົາການສ້າງລະບົບອຸດສາຫະກໍາທີ່ທັນສະໄໝ, ການສ້າງ ແລະ ເສີມຂະຫຍາຍຄວາມເຂັ້ມແຂງໃຫ້ແກ່ອຸດສາຫະກໍາຈະເລີນ ໃໝ່ ແລະ ອຸດສາຫະກໍາແຫ່ງອະນາຄົດ, ເລັ່ງລັດພັດທະນາຄວາມສາມາດເພິ່ງຕົນເອງດ້ານວິທະຍາສາດເຕັກໂນໂລຊີໃນລະດັບສູງ ແລະ ການເສີມສ້າງຄວາມເຂັ້ມແຂງດ້ວຍຕົນເອງເພື່ອນໍາໄປສູ່ການພັດທະນາກໍາລັງການຜະລິດທີ່ມີຄຸນນະພາບໃໝ່, ການສ້າງຕະຫຼາດພາຍໃນທີ່ເຂັ້ມແຂງ ແລະ ເລັ່ງສ້າງຮູບແບບການພັດທະນາໃໝ່. ການມຸ່ງໜ້າສູ່ “ການປະດິດສ້າງໃໝ່” ກໍຄື ການເຊື່ອມໂຍງດິຈິຕອນ ແລະ ຄວາມທັນສະໄໝ ຈະເຮັດໃຫ້ຈີນເຂົ້າໃຈເຖິງຄວາມຄິດລິເລີ່ມໃນການພັດທະນາຢ່າງແທ້ຈິງ.
ສໍາຫຼັບການຍຶດໝັ້ນຖືເອົາປະຊາຊົນຢູ່ເໜືອທຸກສິ່ງຢ່າງ ແມ່ນໜຶ່ງໃນຫຼັກການທີ່ຕ້ອງປະຕິບັດໃນການພັດທະນາເສດຖະກິດ-ສັງຄົມໄລຍະແຜນພັດທະນາ 5 ປີ ຄັ້ງທີ 15 ຂອງຈີນ. ກອງປະຊຸມຄົບຄະນະ ໄດ້ສະເໜີໃຫ້ເພີ່ມຄວາມພະຍາຍາມຄຸ້ມຄອງ ແລະ ພັດທະນາຄຸນນະພາບຊີວິດຂອງປະຊາຊົນບັນດາເຜົ່າໃຫ້ດີຂຶ້ນຢ່າງບໍ່ຢຸດຢັ້ງ, ພ້ອມທັງໄດ້ເນັ້ນໜັກກ່ຽວກັບ “ການລົງທຶນໃສ່ປະຊາຊົນ” ໂດຍຊີ້ໃຫ້ເຫັນວ່າ: ການຂະຫຍາຍຕົວຂອງຄວາມຕ້ອງການພາຍໃນຂອງຈີນ ຈໍາເປັນຕ້ອງປະສົມປະສານກັບການພັດທະນາຊີວິດການເປັນຢູ່ຂອງປະຊາຊົນກັບການຊຸກຍູ້ສົ່ງເສີມການບໍລິໂພກ, ການປະສົມປະສານການລົງທຶນໃສ່ສິນຄ້າກັບການລົງທຶນໃສ່ປະຊາຊົນຕ້ອງປະຕິບັດຢ່າງໃກ້ຊິດກັນ ເພື່ອເຮັດໃຫ້ໝາກຜົນຂອງການສ້າງສາຄວາມທັນສະໄໝສາມາດສ້າງຜົນປະໂຫຍດໃຫ້ແກ່ປະຊາຊົນທຸກຖ້ວນໜ້າຫຼາຍກວ່າ ແລະ ຍຸຕິທຳກວ່າເກົ່າ. ສິ່ງເຫຼົ່ານີ້ໄດ້ສະທ້ອນໃຫ້ເຫັນຢ່າງຈະແຈ້ງວ່າ ຄວາມທັນສະໄໝແບບຈີນແມ່ນໃຫ້ຄວາມສໍາຄັນກັບຊີວິດການເປັນຢູ່ຂອງປະຊາຊົນຢູ່ເໜືອທຸກສິ່ງຢ່າງ.
ແຜນພັດທະນາ 5 ປີ ຄັ້ງທີ 15 ຈະນໍາໄປຄົ້ນຄວ້າພິຈາລະນາ ແລະ ຮັບຮອງເອົາຢ່າງເປັນທາງການໃນກອງປະຊຸມສອງສະພາ (ກອງປະຊຸມສະພາປະຊາຊົນແຫ່ງຊາດຈີນ ແລະ ກອງປະຊຸມສະພາເປິກສາການເມືອງປະຊາຊົນແຫ່ງຊາດຈີນ) ທີ່ຈະຈັດຂຶ້ນຢູ່ນະຄອນຫຼວງປັກກິ່ງໃນຕົ້ນປີ 2026 ເຮັດໃຫ້ທົ່ວໂລກຕ່າງໃຫ້ຄວາມສົນໃຈ ແລະ ຕິດຕາມຢ່າງຕໍ່ເນື່ອງ ເພາະນອກຈາກແຜນພັດທະນາດັ່ງກ່າວ ຈະເຮັດໃຫ້ເສດຖະກິດ-ສັງຄົມຂອງຈີນ ນັບມື້ເຕີບໂຕຢ່າງໝັ້ນທ່ຽງດ້ວຍຄຸນນະພາບໃໝ່ ແລະ ໃນລະດັບສູງກວ່າເກົ່າແລ້ວ, ຍັງຈະສົ່ງຜົນດີຕໍ່ຫຼາຍປະເທດຢູ່ໃນໂລກທີ່ມີການພົວພັນຮ່ວມມືກັບຈີນ ເພາະໃນແຜນພັດທະນາ 5 ປີຄັ້ງທີ 15, ຈີນຈະເປີດປະຕູສູ່ພາຍນອກໃນລະດັບສູງກວ່າເກົ່າ, ຈະແບ່ງປັນໂອກາດ ແລະ ຮ່ວມກັນພັດທະນາກັບປະເທດຕ່າງໆຢູ່ໃນໂລກ ເພື່ອສ້າງສະພາບໃໝ່ແຫ່ງການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ ໂດຍອາໄສຈີນທີ່ເປັນປະເທດຕະຫຼາດໃຫຍ່ຂອງໂລກ, ເປັນປະເທດທີ່ມີຂະໜາດເສດຖະກິດໃຫຍ່ເປັນອັນດັບສອງຂອງໂລກ ແລະ ການພັດທະນາຫຼາຍດ້ານຂອງຈີນແມ່ນຢູ່ອັນດັບຕົ້ນໆຂອງໂລກ. ສິ່ງນີ້ໄດ້ສະທ້ອນໃຫ້ເຫັນເຖິງຄວາມຕ້ອງການ ແລະ ຄວາມເອົາໃຈໃສ່ຂອງຈີນຢ່າງຕັ້ງໜ້າໃນການເສີມສ້າງການຮ່ວມມືສາກົນໄປສູ່ຄຸນນະພາບໃໝ່ໃຫຍ່ຫຼວງກວ່າເກົ່າ ບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດ ແລະ ຮ່ວມກັນພັດທະນາໃຫ້ຈະເລີນກ້າວໜ້າ.
ໃນນີ້ ເວົ້າສະເພາະ ລາວ ເປັນປະເທດເພື່ອນມິດຍຸດທະສາດ ແລະ ເປັນປະເທດຄູ່ຮ່ວມຊາຕາກໍາກັບຈີນ ທີ່ພວມຢູ່ໃນໄລຍະສຸດທ້າຍຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 9 ແລະ ກະກຽມແຜນພັດທະນາເສດ ຖະກິດ-ສັງຄົມ ແຫ່ງຊາດ 5 ປີ ຄັ້ງທີ 10 ເພື່ອນໍາໄປຄົ້ນຄວ້າ ແລະ ຮັບຮອງເອົາໃນຕົ້ນປີ 2026 ສາມາດຖອດຖອນບົດຮຽນຫຼາຍຢ່າງຈາກຜົນສໍາເລັດໃນການຈັດຕັ້ງປະຕິບັດແຜນພັດທະນາ 5 ປີ ແລະ ການສ້າງແຜນພັດທະນາ 5 ປີຂອງຈີນທີ່ພວມດໍາເນີນຢູ່ ເພາະສອງປະເທດຈີນ ແລະ ລາວລ້ວນແຕ່ໄດ້ວາງແຜນພັດທະນາເສດຖະກິດ-ສັງຄົມ 5 ປີ, ທາດແທ້ ແມ່ນຊົມໃຊ້ໂອກາດການພັດທະນາຮ່ວມກັນ. ຈີນຈະຍົກລະດັບການເປີດປະຕູສູ່ພາຍນອກຕື່ມອີກໃນໄລຍະແຜນພັດທະນາ 5 ປີຄັ້ງທີ 15 ບວກກັບທ່າແຮງບົ່ມຊ້ອນດ້ານການພັດທະນາຂອງລາວ, ຈະເຮັດໃຫ້ການພັດທະນາຂອງສອງປະເທດສາມາດສ້າງຜົນປະໂຫຍດໃຫ້ກັນ ແລະ ກັນ, ຈາກການເຊື່ອມຕໍ່ດ້ານພື້ນຖານໂຄງລ່າງຮອດການເຊື່ອມຕໍ່ດ້ານນະໂຍບາຍ ແລະ ລະບຽບການຕ່າງໆ, ຈາກການຮ່ວມມືດ້ານອຸດສາຫະກຳຮອດການປັບປຸງຊີວິດການເປັນຢູ່ຂອງປະຊາຊົນ, ການຮ່ວມມືລະຫວ່າງສອງປະເທດພວມໄດ້ຢວ່າງບາດກ້າວໄປສູ່ຂົງເຂດທີ່ກວ້າງຂວາງກວ່າເກົ່າ ແລະ ລະດັບສູງຢ່າງເລິກເຊິ່ງກວ່າເກົ່າ .
ໂດຍ BT, ວສລ
