ທ່ານ ສີຈິ້ນຜິງ ປະທານປະເທດຈີນເຄີຍກ່າວວ່າ: “ການພັດທະນາສີຂຽວເປັນສີສັນທາດແທ້ແຫ່ງການພັດທະນາທີ່ມີຄຸນນະພາບສູງ, ກຳລັງການຜະລິດໃນຄຸນນະພາບໃໝ່ກໍແມ່ນກຳລັງການຜະລິດສີຂຽວ.”
ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກຄອມມູນິດຈີນ ເມື່ອປີ 2012 ເປັນຕົ້ນມາ, ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ ໄດ້ກ່າວເນັ້ນໜັກມາຫຼາຍເທື່ອໃຫ້ກ້າວເດີນຕາມເສັ້ນທາງການພັດທະນາຕາມທິດສີຂຽວ ແລະກາກບອນຕ່ຳ ທັງຮຽກຮ້ອງໃຫ້ເລັ່ງບົ່ມເພາະ ແລະພັດທະນາອຸດສາຫະກຳສີຂຽວ ແລະກາກບອນຕ່ຳໃຫ້ເຕີບໃຫຍ່ຂະຫຍາຍຕົວ, ຕັ້ງໜ້າພັດທະນາເຕັກໂນໂລຊີສີຂຽວ, ຜະລິດຕະພັນສີຂຽວ, ຍົກສູງລະດັບການຫັນປ່ຽນສູ່ເສດຖະກິດສີຂຽວ, ເສີມສ້າງທ່າແຮງແລະກຳລັງບົ່ມຊ້ອນດ້ານການພັດທະນາ.
ໃນໄລຍະປະຕິບັດແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 14 (2021-2025), ຈີນໄດ້ບັນລຸເປົ້າໝາຍການປະກອບສ່ວນຢ່າງເປັນເຈົ້າການເພື່ອຮັບມືກັບການປ່ຽນແປງຂອງດິນຟ້າອາກາດ ຮອດ ປີ 2030 ກ່ອນກຳນົດເວລາໃນດ້ານຍອດປະລິມານກຳລັງຕິດຕັ້ງໄຟຟ້າພະລັງງານລົມ ແລະ ໄຟຟ້າພະລັງງານແສງຕາເວັນ, ໄດ້ສຳເລັດການສ້າງ ແລະ ປັບປຸງມາດຕະຖານລະບາຍມົນລະພິດ 32 ປະການ, ໄດ້ບັນລຸການຄຸ້ມຄອງ ແລະ ຄວບຄຸມຢ່າງມີປະສິດທິຜົນຕໍ່ປະລິມານການລະບາຍກາກບອນດີອົກຊິດຫຼາຍກວ່າ 60%ຂອງທົ່ວປະເທດ…ຂໍ້ມູນຕົວເລກລະອຽດເຫຼົ່ານີ້ໄດ້ພິສູດໃຫ້ເຫັນຢ່າງຊັດເຈນວ່າ ຈີນກຳລັງຖືເອົາການປະຕິຮູບ ແລະປະດິດສ້າງເປັນແຮງຂັບເຄື່ອນ, ຕໍ່ຍອດການພັດທະນາທີ່ມີຄູນນະພາບສູງໃຫ້ມີລັກສະນະແບບສີຂຽວຫຼາຍກວ່າເກົ່າ.
ວັນທີ 31 ມັງກອນ 2024, ເວລາກ່າວຄຳປາໄສໃນການຮ່ຳຮຽນລວມໝູ່ຄັ້ງທີ 11 ຂອງກົມການເມືອງສູນກາງພັກຄອມມູນິດຈີນສະໄໝທີ 20, ທ່ານ ສີຈິ້ນຜິງ ໄດ້ກ່າວວ່າ: “ຕ້ອງປູກຈິດສຳນຶກໃຫ້ໜັກແໜ້ນ ແລະ ປະຕິບັດຕົວຈິງຕາມແນວຄິດພູຂຽວນ້ຳໃສກໍແມ່ນພູເງິນພູຄຳ, ເດັດດ່ຽວກ້າວເດີນຕາມເສັ້ນທາງສິ່ງແວດລ້ອມທຳມະຊາດເປັນບູລິມະສິດ ແລະ ການພັດທະນາຕາມທິດສີຂຽວ.”
ປີ 2024, ການສິ້ນເປືອງພະລັງງານຕໍ່ຫົວໜ່ວຍລວມຍອດຜະລິດຕະພັນພາຍໃນ ຫຼື GDP ຂອງຈີນໄດ້ຫຼຸດລົງ 11,6% ເມື່ອທຽບໃສ່ໄລຍະປະຕິບັດແຜນການ 5 ປີຄັ້ງທີ 13(2016-2020), ໝາຍຄວາມວ່າ ການສິ້ນເປືອງພະລັງານໃນການສ້າງ GDP ແຕ່ລະ 100 ຢວນແມ່ນໄດ້ຫຼຸດລົງ 11,6% ຫຼືເທົ່າກັບການຫຼຸດຜ່ອນການລະບາຍກາກບອນດີອົກຊິດ 1,1 ຕື້ໂຕນ.
ເດືອນພຶດສະພາປີ 2024, ໃນເວລາລົງເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງຊ່ານຕົ່ງ, ທ່ານ ສີຈິນຜິງ ໄດ້ຊີ້ນຳວ່າ: “ຕ້ອງອອກແຮງຊຸກຍູ້ການຫັນປ່ຽນຮູບແບບການພັດທະນາຕາມທິດສີຂຽວ ແລະກາກບອນຕ່ຳ, ຊຸກຍູ້ການປະດິດສ້າງດ້ານວິທະຍາສາດເຕັກໂນໂລຊີ ແລະ ການພັດທະນາອຸດສາຫະກຳສີຂຽວທີ່ເປັນມິດກັບສິ່ງແວດລ້ອມ.”
ນັບມາຮອດທ້າຍປີ2024, ທົ່ວປະເທດຈີນ ໄດ້ບົ່ມເພາະໂຮງງານສີຂຽວລະດັບຊາດ 6.430 ແຫ່ງ, ເຂດນິຄົມອຸດສາຫະກຳສີຂຽວ 491 ແຫ່ງ, ໃນນີ້, ມູນຄ່າການຜະລິດຂອງໂຮງງານສີຂຽວລະດັບຊາດໄດ້ກວມອັດຕາສ່ວນຫຼາຍກວ່າ 20%.
ວັນທີ 31 ມັງກອນ 2024, ເວລາກ່າວຄຳປາໄສໃນການຮ່ຳຮຽນລວມໝູ່ຄັ້ງທີ 11 ຂອງກົມການເມືອງສູນກາງພັກຄອມມູນິດຈີນສະໄໝທີ 20, ທ່ານ ສີຈິ້ນຜິງ ໄດ້ກ່າວເນັ້ນໜັກວ່າ: “ຕ້ອງພັດທະນາອຸດສາຫະກຳການຜະລິດສີຂຽວໃຫ້ເຂັ້ມແຂງ, ພັດທະນາຂະແໜງບໍລິການສີຂຽວ, ພັດທະນາພະລັງງານສີຂຽວໃຫ້ເຕີບໃຫຍ່ຂະຫຍາຍຕົວ, ພັດທະນາອຸດສາຫະກຳ ແລະຕ່ອງໂສ້ການສະໜອງແບບສີຂຽວ ແລະກາກບອນຕ່ຳ.”
ໃນໄລຍະປະຕິບັດແຜນການ 5 ປີຄັ້ງທີ 14, ຈີນໄດ້ປະຖິ້ມການໃຊ້ລົດລະບາຍມົນລະພິດສູງ ເກືອບ 20.000.000 ຄັນ. ນັບມາຮອດທ້າຍປີ 2024, ທົ່ວປະເທດຈີນມີປະລິມານລົດພະລັງງານໃໝ່ບັນລຸເຖິງ 31.400.000 ຄັນ, ກວມຍອດປະລິມານລົດຍົນເຖິງ 8,9%, ໄດ້ເພີ່ມຂຶ້ນຫຼາຍກວ່າ 5 ເທົ່າເມື່ອທຽບໃສ່ໄລຍະປະຕິບັດແຜນການ 5 ປີຄັ້ງທີ 13.
ວັນທີ 18 ທັນວາ 2015, ໃນກອງປະຊຸມວຽກງານເສດຖະກິດຂັ້ນສູນກາງຂອງຈີນ, ທ່ານ ສີຈິ້ນຜິງ ໄດ້ຊີ້ອອກວ່າ: “ຕ້ອງກ້າວເດີນໄປຕາມເສັ້ນທາງການພັດທະນາຕາມທິດສີຂຽວ, ກາກບອນຕ່ຳ ແລະ ໝູນວຽນຢ່າງເດັດດ່ຽວໜຽວແໜ້ນ, ສ້າງລະບົບອຸດສາຫະກຳສີຂຽວ ແລະ ສະພາບພື້ນທີ່ສີຂຽວ.”
ນັບມາຮອດເດືອນກໍລະກົດປີ 2024, ຄວາມສາມາດການສົ່ງໄຟຟ້າຂອງໂຄງການສົ່ງໄຟຟ້າຈາກພາກຕາເວັນຕົກ ໄປສູ່ພາກຕາເວັນອອກຂອງຈີນໄດ້ບັນລຸຫຼາຍກວ່າ 300 ລ້ານກິໂລວັດ, ເຊິ່ງໄດ້ຕອບສະໜອງກັບຄວາມຕ້ອງການຊົມໃຊ້ໄຟຟ້າປະມານ 20% ຂອງເຂດພາກກາງ ແລະ ພາກຕາເວັນອອກຂອງຈີນ. ທະເລຊາຍ ແລະ ແດນເຮື້ອກັນດານພາກຕາເວັນຕົກໄດ້ຈັດຕັ້ງກັງຫັນລົມ ແລະ ແຜງຜະລິດໄຟຟ້າແສງຕາເວັນເປັນຈຳນວນຫຼວງຫຼາຍຢ່າງກວ້າງຂວາງ ເຊິ່ງໄດ້ກາຍເປັນ “ແຫຼ່ງພະລັງງານໄຟຟ້າສີຂຽວ”.
ວັນທີ 17 ກໍລະກົດ 2023, ເວລາກ່າວຄຳປາໄສໃນກອງປະຊຸມອະນຸລັກສິ່ງແວດລ້ອມທຳມະຊາດທົ່ວປະເທດຈີນ, ທ່ານ ສີຈິ້ນຜິງ ໄດ້ກ່າວວ່າ: “ອອກແຮງສົ່ງເສີມທັດສະນະຄະຕິການດຳລົງຊີວິດ ແລະ ຮູບການບໍລິໂພກແບບລຽບງ່າຍ, ເໝາະສົມ, ສີຂຽວ, ກາກບອນຕ່ຳ, ສິວິໄລ ແລະມີສຸຂະພາບດີ, ເຮັດໃຫ້ການອອກເດີນທາງແບບສີຂຽວ, ການປະຢັດນ້ຳ ແລະໄຟຟ້າ, ‘ການເຄື່ອນໄຫວກ້ຽງຈານ’ ເພື່ອຕ້ານການຟູມເຟື້ອຍອາຫານການກິນ, ການຄັດແຍກປະເພດຂີ້ເຫຍື້ອ ແລະອື່ນໆ ກາຍເປັນຄວາມຊິນເຄີຍ.”
ພາຍໃຕ້ການຊຸກຍູ້ຈາກນະໂຍບາຍ “ປັບປ່ຽນອຸປະກອນໃໝ່ຢ່າງຂະໜາດໃຫຍ່ ແລະ ການຊື້ເຄື່ອງບໍລິໂພກແບບເກົ່າແລກໃໝ່”, ໃນຈຳນວນເຄື່ອງໃຊ້ໄຟຟ້າໃນເຮືອນ 8 ປະເພດໃຫຍ່ເຊັ່ນ: ຕູ້ເຢັນ, ຈັກຊັກເຄື່ອງ, ໂທລະພາບ, ຄອມພິວເຕີ ແລະອື່ນໆທີ່ໄດ້ຮັບເງິນອຸດໜູນຈາກນະໂຍບາຍເກົ່າແລກໃໝ່, ຍອດມູນຄ່າການຈຳໜ່າຍຜະລິດຕະພັນທີ່ປະສິດທິພາບການນຳໃຊ້ພະລັງງານລະດັບໜຶ່ງຫຼືໄດ້ມາດຕະຖານສາກົນໄດ້ກວມຫຼາຍກວ່າ 90%.
ທຸກມື້ນີ້, ການບໍລິໂພກຜະລິດຕະພັນສີຂຽວຢູ່ຈີນກຳລັງຟົດຟື້ນ, ກຳລັງການຜະລິດສີຂຽວພວມເລັ່ງບົ່ມເພາະຢູ່, ໃນຂະນະທີ່ສ້າງທ່າແຮງໃໝ່ໃນດ້ານການພັດທະນາອຸດສາຫະກຳນັ້ນ ໄດ້ເພີ່ມພະລັງແຮງຂັບເຄື່ອນຢ່າງເຂັ້ມແຂງໃຫ້ແກ່ການພັດທະນາທີ່ມີຄຸນນະພາບສູງ.