ໃນຕອນບ່າຍວັນທີ 14 ມັງກອນ 2026 ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ຈັດພິທີປະກາດການຈັດຕັ້ງ ໂດຍໃຫ້ກຽດເປັນປະທານ ຂອງທ່ານ ປອ ບົວຄົງ ນາມມະວົງ, ລັດຖະມົນຕີ, ຫົວໜ້າ ຫສນຍ; ມີບັນດາທ່ານຮອງລັດຖະມົນຕີ, ຮອງຫົວໜ້າ ຫສນຍ; ບັນດາທ່ານຫົວໜ້າ-ຮອງຫົວໜ້າກົມ, ຕາງໜ້າຄະນະຈັດຕັ້ງສູນກາງພັກ ພ້ອມດ້ວຍພະນັກງານ-ລັດຖະກອນ ຫສນຍ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໃນໂອກາດນີ້, ທ່ານ ທົງສັກ ກົມມະເມືອງ, ຮອງຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ໄດ້ຂຶ້ນຜ່ານນິຕິກຳ ກ່ຽວກັບການແຕ່ງຕັ້ງ ແລະ ຍົກຍ້າຍ ຄື: ແຕ່ງຕັ້ງ ທ່ານ ປອ ຄຳຜາ ພິມມະສອນ ແລະ ທ່ານ ວິແກ້ວ ບຸບຜາວັນ ເປັນຮອງລັດຖະມົນຕີ, ຮອງຫົວໜ້າ ຫສນຍ; ແຕ່ງຕັ້ງທ່ານ ສອນປະເສີດ ດາລາວົງ ເປັນຜູ້ຊ່ວຍ (ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ); ແຕ່ງຕັ້ງທ່ານ ຄົມສັນ ໄຊຍະສານ ເປັນຫົວໜ້າກົມຈັດຕັ້ງ; ແຕ່ງຕັ້ງທ່ານ ນິມມະວົງ ອິນທະວົງ ເປັນຫົວໜ້າກົມກວດກາ; ແຕ່ງຕັ້ງທ່ານ ສົມຄວນ ມາສຸວັນ ເປັນຫົວໜ້າກົມປະຊາສຳພັນ; ແຕ່ງຕັ້ງທ່ານ ປອ ປາດຖະໜາ ສຸກອາລຸນ ເປັນຫົວໜ້າກົມນິຕິກຳ; ແຕ່ງຕັ້ງທ່ານ ສອນສະໄໝ ວໍລະສານ ເປັນຫົວໜ້າກົມຊົນເຜົ່າ ແລະ ສາສະໜາ; ແລະ ຍົກຍ້າຍທ່ານ ນາງ ສຸລິກັນ ພົມມະຈັນ ຫົວໜ້າກົມຈັດຕັ້ງ ໄປຮັບໜ້າທີ່ໃໝ່ ຢູ່ຫໍປະຊຸມແຫ່ງຊາດ. ຫຼັງຈາກນັ້ນ ກໍ່ໄດ້ມີພິທີມອບນິຕິກຳດັ່ງກ່າວ ໃຫ້ແກ່ບັນດາທ່ານ ທີ່ໄດ້ຮັບການແຕ່ງຕັ້ງ ແລະ ຍົກຍ້າຍ ໃນຄັ້ງນີ້.
ໃນຕອນທ້າຍ, ທ່ານ ລັດຖະມົນຕີ, ຫົວໜ້າ ຫສນຍ ກໍ່ໄດ້ໃຫ້ກຽດໂອ້ລົມຕໍ່ພິທີ ໂດຍໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາທ່ານ ທີ່ໄດ້ຮັບການແຕ່ງຕັ້ງ, ສັບຊ້ອນ ແລະ ຮັບເຂົ້າມາສັງກັດຢູ່ ຫສນຍ; ພ້ອມທັງ ສະເໜີໃຫ້ບັນດາທ່ານ ທີ່ເຂົ້າຮ່ວມ ຮັບຮູ້ ແລະ ເຂົ້າໃຈວ່າ ການບູລະນະການຈັດຕັ້ງ, ການແຕ່ງຕັ້ງ, ສັບຊ້ອນພະນັກງານ ແມ່ນກົດເກນພາວະວິໄສ, ທຸກໆການຈັດຕັ້ງກໍ່ລ້ວນແຕ່ມີການເຄື່ອນເໜັງ, ປັບປຸງໄປຕາມແຕ່ລະໄລຍະ, ຕາມໜ້າທີ່ການເມືອງຂອງການປະຕິວັດ, ພະນັກງານ ກໍ່ມີການຊັບຊ້ອນແຕ່ງຕັ້ງ ໄປຕາມຄວາມຮຽກຮ້ອງຕ້ອງການຂອງ ໜ້າທີ່ວຽກງານ, ໃຫ້ແທດເໝາະກັບຄຸນສົມບັດ, ລະດັບຄວາມຮູ້-ຄວາມສາມາດ ແລະ ປະສົບການຕົວຈິງຂອງແຕ່ລະຄົນ, ເປັນການປະຕິບັດມະຕິ, ຄຳສັ່ງແລະ ການມອບໝາຍຂອງຂັ້ນເທິງ ກໍ່ຄືຫຼັກກການລວມສູນປະຊາທິປະໄຕ ໂດຍມີການຄົ້ນຄວ້າເປັນເອກະພາບພາຍໃນ ເພື່ອເປັນກຳລັງແຮງຂັບເຄື່ອນວຽກງານ ຫສນຍ ໃຫ້ສືບຕໍ່ເຕີບໃຫຍ່, ເຂັ້ມແຂງ ແລະ ມີຄຸນນະພາບ ບໍ່ຢຸດຢັ້ງ. ອັນສຳຄັນ, ທ່ານ ຍັງໄດ້ມີຄໍາເຫັນເນັ້ນໜັກ ໃຫ້ເອົາໃຈໃສ່ໃນຕໍ່ໜ້າຕື່ມບາງດ້ານ ເປັນຕົ້ນ: ພ້ອມກັນຍົກສູງຄວາມຮັບຜິດຊອບທາງດ້ານການເມືອງ ກໍຄື ການນຳພາວຽກງານວິຊາສະເພາະຂອງຕົນໃຫ້ສູງຂຶ້ນກວ່າເກົ່າ, ມີຄວາມເສຍສະຫຼະ ເພື່ອສ່ວນລວມ; ຈັດຕັ້ງປະຕິບັດວຽກງານ ຕາມຫຼັກການລວມສູນປະຊາທິປະໄຕ, ຕົກລົງເປັນໝູ່ຄະນະ, ມອບບຸກຄົນຮັບຜິດຊອບ; ເອົາໃຈໃສ່ເຕົ້າໂຮມຄວາມສາມັກຄີພາຍໃນໃຫ້ແໜ້ນແຟ້ນ, ເຮັດໃຫ້ບັນຍາກາດໃນການເຮັດວຽກ ເປັນຂະບວນການຢ່າງຕັ້ງໜ້າ; ສຸມໃສ່ເຜີຍແຜ່ເຊື່ອມຊຶມມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ໂດຍສະເພາະ ໂຄງການການເມືອງ, ລາຍງານການເມືອງ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ X ແລະ ເອກະສານ 40 ປີ ແຫ່ງການປ່ຽນແປງໃໝ່ ໃຫ້ເລິກເຊິ່ງ; ພ້ອມກັນກວດກາຄືນບັນດາເນື້ອໃນມະຕິກອງປະຊຸມໃຫຍ່ຜູ້ແທນ ຄັ້ງທີ VI ຂອງຂອງອົງຄະນະພັກ ຫສນຍ ເພື່ອຜັນຂະຫຍາຍໃຫ້ເປັນອັນລະອຽດ, ແບ່ງງານແບ່ງຄວາມຮັບຜິດຊອບ ໃຫ້ຈະແຈ້ງ; ຂຸ້ນຂ້ຽວສ້າງແຜນດຳເນີນງານ ໃນຂົງເຂດວຽກງານຂອງຕົນ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານ ໃຫ້ແທດເໝາະຕົວຈິງ; ສຸມໃສ່ສັງລວມຜົນງານພົ້ນເດັ່ນການຈັດຕັ້ງປະຕິບັດວຽກງານ ໃນໄລຍະ 5 ປີຜ່ານມາ ຂອງລັດຖະບານ ຊຸດທີ IX ເພື່ອພິຈາລະນາຮັບຮອງເອົາຄະນະລັດຖະບານ ຊຸດທີ X ໃນກອງປະຊຸມສະໄໝສາມັນ ເທື່ອທີ I ຂອງສະພາແຫ່ງຊາດ ຊຸດທີ X; ເອົາໃຈໃສ່ປັບປຸງກົນໄກ-ແບບແຜນວິທີເຮັດວຽກ ແລະ ແຜນດຳເນີນງານ ຂອງບັນດາໜ້າວຽກຂອງລັດຖະບານ; ສືບຕໍ່ເຊື່ອມຊຶມກຳແໜ້ນດຳລັດ ວ່າດ້ວຍໂຄງປະກອບການຈັດຕັ້ງ ແລະ ການເຄື່ອນໄຫວຂອງ ຫສນຍ ຕິດພັນກັບວຽກວິຊາສະເພາະຂອງຕົນ ຢ່າງເປັນປົກກະຕິ ໂດຍສະເພາະ 3 ພາລະບົດບາດ, 33 ໜ້າທີ່, 12 ສິດ, 4 ຫຼັກການ ແລະ 3 ແບບແຜນວິທີເຮັດວຽກ; ສືບຕໍ່ປັບປຸງການຈັດຕັ້ງ ທີ່ຕິດພັນກັບການຄົ້ນຄວ້າບັນດານະໂຍບາຍ ໂດຍມີການພິຈາລະນາ ຢ່າງລະອຽດ ແລະ ຮອບດ້ານ; ເອົາໃຈໃສ່ສ້າງເງື່ອນໄຂ-ກົນໄກສະໜັບສະໜູນ, ອູ້ມຊູຊ່ວຍເຫຼືອ ແລະ ອຳນວຍຄວາມສະດວກ ເຊິ່ງກັນ ແລະ ກັນ ໃຫ້ສາມາດເຄື່ອນໄຫວວຽກງານໄດ້ໂລ່ງລ່ຽນ, ວ່ອງໄວ, ເຮັດໃຫ້ການປະຕິບັດພາລະບົດບາດ ແລະ ໜ້າທີ່ຂອງຕົນ ມີປະສິດທິພາບ ແລະ ປະສິດທິຜົນສູງ.
ຂ່າວ ແລະ ພາບ: ກົມປະຊາສຳພັນ ຫສນຍ.