ການນຳຂັ້ນສູນກາງ ແລະ ການນຳແຂວງຊຽງຂວາງ ເຂົ້າຮ່ວມໃຊ້ສິດປ່ອນບັດເລືອກຕັ້ງ ຢູ່ແຂວງຊຽງຂວາງ

ແຫລ່ງຂ່າວຈາກ ແຂວງຊຽງຂວາງ ໃຫ້ຮູ້ວ່າ: ‎ ໃນຕອນເຊົ້າຂອງວັນທີ 22 ກຸມພາ 2026 ນີ້, ນັບວ່າເປັນປາງບຸນໃຫຍ່, ບັນຍາກາດການປ່ອນບັດເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ X ແລະ ສະພາປະຊາຊົນຂັ້ນແຂວງ (ສສຂ) ແຂວງຊຽງຂວາງ ຊຸດທີ V ຢູ່ທີ່ຈຸດປ່ອນບັດສະໂມສອນເມືອງແປກ ຊຶ່ງເປັນຈຸດປ່ອນບັດໃຫຍ່ ແລະ ສຳຄັນຂອງແຂວງ ໄດ້ດຳເນີນໄປດ້ວຍບັນຍາກາດຄຶກຄື້ນ ແລະ ມີຄວາມໝາຍສຳຄັນທາງດ້ານການເມືອງຢ່າງເລິກເຊິ່ງ.

‎ໃຫ້ກຽດເຂົ້າຮ່ວມໃຊ້ສິດປ່ອນບັດຢູ່ຈຸດດັ່ງກ່າວມີ ທ່ານ ກິແກ້ວ ໄຂຄຳພິທູນ ກົມການເມືອງສູນກາງພັກ, ປະທານສູນກາງແນວລາວສ້າງຊາດ ໃນນາມຜູ້ສະໝັກ ສສຊ ເຂດເລືອກຕັ້ງທີ 9 ແຂວງຊຽງຂວາງ ນ້ຳເບີ 1, ທ່ານ ພູວົງ ອຸ່ນຄຳແສນ ກຳມະການສູນກາງພັກ, ເລຂາພັກແຂວງຊຽງຂວາງ ຜູ້ສະໝັກ ສສຊ ເຂດ 9 ແຂວງຊຽງຂວາງ ນ້ຳເບີ 2 ພ້ອມດ້ວຍບັນດາການນຳຫລັກແຫລ່ງຂອງແຂວງ, ເມືອງ, ພະນັກງານ-ລັດຖະກອນ ແລະ ປະຊາຊົນພາຍໃນເຂດເທສະບານເມືອງແປກ ເຂົ້າຮ່ວມຢ່າງພ້ອມພຽງ.

‎ສຳລັບເຂດເລືອກຕັ້ງທີ 9 ແຂວງຊຽງຂວາງ, ມີຜູ້ສະໝັກຮັບເລືອກຕັ້ງ ສສຊ ຊຸດທີ X ຈຳນວນ 10 ທ່ານ, ຍິງ 3 ທ່ານ, ເລືອກເອົາ 7 ທ່ານ ແລະ ສສຂ ຊຸດທີ V ຈຳນວນ 49 ທ່ານ, ຍິງ 13 ທ່ານ, ເລືອກເອົາ 35 ທ່ານ, ມີຈຳນວນຜູ້ມີສິດປ່ອນບັດ 174.419 ທ່ານ, ມີໜ່ວຍປ່ອນບັດ 432 ໜ່ວຍ ແລະໜ່ວຍເຄື່ອນທີ່ອີກຈຳນວນໜຶ່ງ ເພື່ອອຳນວຍຄວາມສະດວກ ໃຫ້ແກ່ການປ່ອນບັດໃຫ້ມີຄວາມວ່ອງໄວ ແລະ ບໍ່ແອອັດ. ພ້ອມນີ້, ຄະນະກຳມະການໄດ້ຈັດວາງຫີບປ່ອນບັດໄວ້ຢ່າງລະອຽດ ໂດຍແບ່ງອອກເປັນແຕ່ລະໂຕະຕາມລາຍຊື່ຢ່າງເປັນລະບຽບ.

‎ພິທີໄດ້ເລີ່ມຕົ້ນດ້ວຍການກວດກາ ແລະ ເປີດຫີບປ່ອນບັດຢ່າງໂປ່ງໃສ ຕໍ່ໜ້າຜູ້ເຂົ້າຮ່ວມທຸກຊັ້ນຄົນ, ບັນດາການນຳສູນກາງ, ແຂວງ, ເມືອງ ແລະ ຜູ້ມີສິດເລືອກຕັ້ງ ໄດ້ເຂົ້າແຖວລົງທະບຽນ ແລະ ຮັບບັດເລືອກຕັ້ງ ເພື່ອເຂົ້າຫ້ອງລັບຄັດເລືອກເອົາບຸກຄົນທີ່ມີມາດຕະຖານ, ເງື່ອນໄຂຄົບຖ້ວນ ແລະ ເປັນຕົວແທນໃຫ້ແກ່ສິດຜົນປະໂຫຍດຂອງປະຊາຊົນຢ່າງແທ້ຈິງ, ຊຶ່ງຢູ່ແຕ່ລະຈຸດ ເວົ້າລວມ, ເວົ້າສະເພາະ ສະໂມສອນເມືອງແປກ ໄດ້ມີການຈັດສັນສະຖານທີ່ຢ່າງເປັນລະບຽບ, ມີການຕິດໃບລາຍຊື່ ແລະ ຮູບພາບປະຫວັດຫຍໍ້ ຂອງຜູ້ສະໝັກຮັບເລືອກຕັ້ງ ເພື່ອໃຫ້ຜູ້ມາໃຊ້ສິດໄດ້ສຶກສາຂໍ້ມູນຢ່າງລະອຽດກ່ອນຕັດສິນໃຈ.

‎ການມາປ່ອນບັດຢູ່ທົ່ວແຂວງຊຽງຂວາງ ກໍຄືຈຸດໃຫຍ່ເທສະບານໃນມື້ນີ້ ສະແດງໃຫ້ເຫັນເຖິງຄວາມສາມັກຄີເປັນປຶກແຜ່ນ ແລະ ຄວາມຕື່ນຕົວທາງດ້ານການເມືອງ ຂອງປະຊາຊົນບັນດາເຜົ່າແຂວງຊຽງຂວາງ ເພື່ອພ້ອມກັນໃຊ້ສິດຂອງຕົນ ໃນການເລືອກເອົາ ສສຊ ແລະ ສສຂ ເພື່ອເປັນຕົນແທນ ແຫ່ງສິດອຳນາດ ແລະ ຜົນປະໂຫຍດຂອງປະເທດຊາດ ກໍຄືປະຊາຊົນ ເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດ ໂດຍສະເພາະ ແຂວງຊຽງຂວາງໃຫ້ເຂັ້ມແຂງ ແລະ ຈະເລີນຮຸງເຮືອງ.