ຄະນະກໍາມະການຄຸ້ມຄອງໄພພິບັດ ນະຄອນຫຼວງວຽງຈັນ ຖະແຫຼງຂ່າວກ່ຽວກັບການຕອບໂຕ້ ແລະ ຟື້ນຟູໄພພິບັດພະຍຸໝາກເຫັບຕົກ ຢູ່ເມືອງສີໂຄດຕະບອງ ແລະ ເມືອງ ນາຊາຍທອງ

ຄະນະກໍາມະການຄຸ້ມຄອງໄພພິບັດ ນະຄອນຫຼວງວຽງຈັນ ນໍາໂດຍ ທ່ານ ສາລະພິດ ສູນວໍລະວົງ, ກໍາມະການພັກນະຄອນຫຼວງວຽງຈັນ, ຫົວໜ້າພະແນກແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ, ຮອງປະທານຜູ້ປະຈໍາການຄະນະກໍາມະການຄຸ້ມຄອງໄພພິບັດ ນະຄອນຫຼວງວຽງຈັນ ພ້ອມດ້ວຍຄະນະ ຈັດພິທີຖະແຫຼງຂ່າວກ່ຽວກັບການຕອບໂຕ້ ແລະ ຟື້ນຟູໄພພິບັດພະຍຸໝາກເຫັບຕົກ ຢູ່ເມືອງສີໂຄດຕະບອງ ແລະ ເມືອງ ນາຊາຍທອງ ໃນວັນທີ 8 ເມສາ 2026 ທີ່ຫ້ອງວ່າການນະຄອນຫຼວງວຽງຈັນ.

ທ່ານ ສາລະພິດ ສູນວໍລະວົງ ແຈ້ງໃຫ້ຮູ້ວ່າ: ພາຍຫຼັງເກີດໄພພິບັດ, ຄະນະຄຸ້ມຄອງໄພພິບັດນະຄອນຫຼວງວຽງຈັນ ໄດ້ສົມທົບກັບອົງການປົກຄອງແຕ່ລະບ້ານ ເລັ່ງເກັບກຳຂໍ້ມູນຈໍານວນບ້ານ ແລະ ຫຼັງຄາເຮືອນ ທີ່ໄດ້ຮັບຜົນກະທົບເບື້ອງຕົ້ນ ພ້ອມທັງວາງແຜນຕອບໂຕ້ສຸກເສີນຮີບດ່ວນ, ພົບປະປະຊາຊົນຜູ້ທີ່ໄດ້ຮັບຜົນກະທົບ ແນໃສ່ລະດົມຈິດໃຈໃຫ້ມີຄວາມເຂັ້ມແຂງ ໂດຍສະເພາະໄດ້ເລັ່ງໃສ່ບັນຫາຮີບດ່ວນ ເປັນຕົ້ນໄຟຟ້າ, ອິນເຕີເນັດ, ນໍ້າປະປາ, ນໍ້າໃຊ້ຄົວເຮືອນ, ຂີ້ເຫຍື້ອ, ສິ່ງເສດເຫຼືອຂອງກະເບື້ອງ ສັງກະສີ ແລະ ເຄື່ອງອຸປະໂພກ ບໍລິໂພກຕ່າງໆທີ່ຈຳເປັນ, ປຸກລະດົມການຊ່ວຍເຫຼືອທາງດ້ານແຮງງານ ຈາກກໍາລັງປ້ອງກັນຊາດ-ປ້ອງກັນຄວາມສະຫງົບ, ຊາວໜຸ່ມສູນກາງ ແລະ ຊາວໜຸ່ມຈາກຂະແໜງການອ້ອມຂ້າງນະຄອນຫຼວງ ເລັ່ງສ້ອມແປງຫຼັງຄາເຮືອນໃຫ້ປະຊາຊົນ. ໃນນີ້ໄດ້ຈັດບູລິມະສິດໃນການຊ່ວຍເຫຼືອເບື້ອງຕົ້ນ ເຊິ່ງໄດ້ແຍກອອກເປັນ 3 ປະເພດ ຄື: ຄອບຄົວທີ່ໄດ້ຮັບຜົນກະທົບ ທັງເປັນຄອບຄົວທີ່ທຸກຍາກຈະໄດ້ຮັບການຊ່ວຍເຫຼືອເປັນບູລິມະສິດທີ 1 ຄອບຄົວທີ່ໄດ້ຮັບຜົນກະທົບແຕ່ເປັນຄອບຄົວທີ່ມີເສດຖະກິດປານກາງ ສາມາດຊ່ວຍຕົນເອງໄດ້ ຈະໄດ້ຮັບການຊ່ວຍເຫຼືອເປັນບູລິມະສິດທີ 2 ແລະ ຄອບຄົວທີ່ໄດ້ຮັບຜົນກະທົບ ແຕ່ເປັນຄອບຄົວທີ່ມີເສດຖະກິດດີ ແລະ ສາມາດຊ່ວຍຕົນເອງໄດ້ຈະໄດ້ຮັບການຊ່ວຍເຫຼືອເປັນບູລິມະສິດທີ 3, ນອກນີ້ ຄະນະກໍາມະການຄຸ້ມຄອງໄພພິບັດນະຄອນຫຼວງວຽງຈັນ ຍັງໄດ້ຈັດກອງປະຊຸມວາງແຜນຕອບໂຕ້ເຕັມຮູບແບບ ໂດຍມອບໝາຍໃຫ້ກໍາມະການພັກນະຄອນ ຫຼວງວຽງຈັນ ເພື່ອລົງຊີ້ນໍາ-ນໍາພາ ແລະ ຜ່ານການຈັດຕັ້ງປະຕິບັດໃນການຕອບໂຕ້ ແລະ ຟື້ນຟູ ຈາກພາ ຍຸໝາກເຫັບຕົກຢູ່ສອງເມືອງດັ່ງກ່າວ ຄະນະຄຸ້ມຄອງໄພພິບັດນະຄອນຫຼວງວຽງຈັນ ຂໍຢັ້ງຢືນວ່າ: ການ ຈັດຕັ້ງປະຕິບັດມີຄວາມຄືບໜ້າເປັນສ່ວນໃຫຍ່.

ທ່ານ ສາລະພິດ ສູນວໍລະວົງ ກ່າວຕື່ມວ່າ: ການຈັດຕັ້ງປະຕິບັດການຕອບໂຕ້ ແລະ ການຟື້ນຟູ ຂອງຄະນະກໍາມະການຄຸ້ມຄອງໄພພິບັດນະຄອນຫຼວງວຽງຈັນ ແລະ ເມືອງ ໃນໄລຍະຜ່ານມາ ໄດ້ສຸມໃສ່ແກ້ໄຂຊ່ວຍເຫຼືອປະຊາຊົນທີ່ໄດ້ຮັບຜົນກະທົບ, ຢູ່ເມືອງສີໂຄດຕະບອງ ມີ 10 ບ້ານ, 6.386 ຫຼັງຄາເຮືອນ; ເມືອງນາຊາຍທອງ 8 ບ້ານ, 1.502 ຫຼັງຄາເຮືອນ; ເຫດການໄພພິບັດໃນຄັ້ງນີ້ ສ້າງຜົນກະທົບຕໍ່ທີ່ຢູ່ອາໄສຂອງປະຊາຊົນຈໍານວນທັງໝົດ 7.888 ຫຼັງຄາເຮືອນ, ໂຮງຮຽນ 11 ແຫ່ງ, ວັດ 3 ແຫ່ງ, ຫ້ອງການບ້ານ 1 ຫຼັງ, ສຸກສາລາບ້ານ 1 ແຫ່ງ, ສູນຜະລິດຢາວັກຊິນ 1 ແຫ່ງ, ລົດໃຫຍ່ເປ່ເພ 53 ຄັນ, ປະຊາຊົນໄດ້ຮັບບາດເຈັບ 9 ຄົນ ແລະ ຄ້າຍທະຫານກອງພັນໃຫຍ່ ຈໍ 11 ໄດ້ຮັບຜົນເສຍຫາຍຈໍານວນ 109 ຫຼັງຄາເຮືອນ, ມາຮອດປັດຈຸບັນ ລວມລາຍຮັບການຊ່ວຍເຫຼືອທີ່ໄດ້ຈາກງົບປະມານ ແລະ ການປະກອບສ່ວນຈາກສັງຄົມ ເປັນເງິນສົດທັງໝົດ 14 ຕື້ 45 ລ້ານກີບ, ໃນນີ້ໄດ້ເບີກຈ່າຍຮັບໃຊ້ເຂົ້າໃນວຽກງານແກ້ໄຂສຸກເສີນ ແລະ ມອບເງິນສົດໃຫ້ກັບຄອບຄົວຂອງຜູ້ປະສົບໄພທີ່ຫຍຸ້ງຍາກ ເພື່ອໄດ້ໄປຊື້ວັດຖຸອຸປະກອນທີ່ຈຳເປັນ 3,985,025,000 ກີບ (ສາມຕື້ເກົ້າຮ້ອຍແປດສິບຫ້າລ້ານຊາວຫ້າພັນກີບ) ສ່ວນທີ່ຍັງເຫຼືອແມ່ນຍັງຈະໄດ້ສືບຕໍ່ນໍາໃຊ້ເຂົ້າໃນການແກ້ໄຂຊ່ວຍເຫຼືອຄອບຄົວຜູ້ຖືກຜົນກະທົບ ເພື່ອການຟື້ນຟູຜົນເສຍຫາຍຕ່າງໆ.

ຂ່າວ-ພາບ: ບຸນຍັງ ພຸດສະຫວັດ