ຕອນບ່າຍຂອງວັນທີ 18 ກັນຍາ 2026 ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ, ທ່ານ ທອງສະຫວັນ ພົມວິຫານ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຮັບຕ້ອນການເຂົ້າຢ້ຽມຂ່ຳນັບຂອງ ທ່ານ ນາງ ຄາທາຣີນາ ວີເຊີ (Katharina Wieser), ເອກອັກຄະລັດຖະທູດວິສາາມັນຜູ້ມີອໍານາດເຕັມ ແຫ່ງ ສາທາລະນະລັດ ໂອຕຣິດ ປະຈຳ ສປປ ລາວ, ຊຶ່ງມີສໍານັກງານສະຖານເອກອັກຄະລັດຖະທູດ ຕັ້ງຢູ່ ນະຄອນຫຼວງບາງກອກ, ປະເທດໄທ ໃນໂອກາດເຂົ້າຮ່ວມກອງປະຊຸມທົບທວນສົນທິສັນຍາ ວ່າດ້ວຍການເກືອດຫ້າມລະເບີດລູກຫວ່ານ ຮອບວຽນທີ 3 ຈັດຂຶ້ນໃນວັນທີ 14-18 ກັນຍາ 2026.
ໃນໂອກາດນີ້, ທ່ານຮອງນາຍົກລັດຖະມົນຕີ ທອງສະຫວັນ ພົມວິຫານ ໄດ້ສະແດງຄວາມຂອບໃຈທີ່ ທ່ານທູດ ໄດ້ໃຫ້ກຽດເປັນຕົວແທນປະເທດໂອຕຣິດ ເຂົ້າຮ່ວມກອງປະຊຸມທົບທວນສົນທິສັນຍາ ວ່າດ້ວຍການເກືອດຫ້າມລະເບີດລູກຫວ່ານ ຮອບວຽນທີ 3 ໃນຄັ້ງນີ້ ພ້ອມທັງ ຕີລາຄາສູງຕໍ່ສາຍພົວພັນ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ສາທາລະນະລັດ ໂອຕຣິດ ນັບຕັ້ງແຕ່ທີ່ສອງປະເທດໄດ້ສ້າງຕັ້ງສາຍພົວພັນການທູດຮ່ວມກັນ ໃນວັນທີ 1 ກັນຍາ 1967, ຊຶ່ງປີໜ້າກໍຈະຄົບຮອບ 60 ປີ ແຫ່ງການສ້າຕັ້ງສາຍພົວພັນການທູດດັ່ງກ່າວ ແລະ ທັງສອງຝ່າຍ ກໍໄດ້ເຫັນດີເປັນເອກະພາບທີ່ຈະຈັດກິດຈະກໍາຕ່າງໆຮ່ວມກັນ ເພື່ອສະຫຼອງວັນສໍາຄັນດັ່ງກ່າວໃຫ້ມີຂະບວນການຢ່າງຟົດຟື້ນ. ນອກຈາກນີ້, ສອງຝ່າຍ ຍັງໄດ້ເຫັນດີທີ່ຈະສືບຕໍ່ຊຸກຍູ້ ແລະ ສົ່ງເສີມການຮ່ວມມືທາງດ້ານເສດຖະກິດ ໂດຍສະເພາະໃນຂົງເຂດການຄ້າ, ການລົງທຶນ ແລະ ການທ່ອງທ່ຽວໃຫ້ໄດ້ຮັບການຂະຫຍາຍຕົວຍິ່ງໆຂຶ້ນ ເພື່ອນຳຜົນປະໂຫຍດສູງສຸດມາສູ່ປະຊາຊົນຂອງທັງສອງຊາດ.
ໃນໂອກາດດຽວກັນ, ສອງຝ່າຍໄດ້ປຶກສາຫາລື ແລະ ທົບທວນຄືນ ກ່ຽວກັບການເສີມຂະຫຍາຍການຮ່ວມມືເພື່ອການພັດທະນາໃນຂະແໜງການຕ່າງໆ ເຊັ່ນ: ການພັດທະນາພື້ນຖານໂຄງລ່າງ ແລະ ພະລັງງານສະອາດ ໂດຍຜ່ານການສະໜັບສະໜູນ ແລະ ຂອບການຮ່ວມມືຂອງສະຫະພາບເອີຣົບ, ອາຊຽນ-ໂອຕຣິດ ແລະ ອົງການຈັດຕັ້ງສາກົນອື່ນໆ, ຊຶ່ງເປັນການປະກອບສ່ວນອັນສຳຄັນເຂົ້າໃນການພັດທະນາເສດຖະກິດສັງຄົມ ຂອງ ສປປ ລາວ ເພື່ອພັດທະນາຊີວິດການເປັນຢູ່ຂອງປະຊາຊົນໃຫ້ໄດ້ຮັບການປັບປຸງດີຂຶ້ນຢ່າງຕໍ່ເນື່ອງ. ພ້ອມດຽວກັນນີ້, ສອງຝ່າຍກໍຍັງເຫັນດີທີ່ຈະສືບຕໍ່ເສີມຂະຫຍາຍ ແລະ ຮັດແໜ້ນສາຍພົວພັນ ແລະ ການຮ່ວມມືອັນດີງາມ ລະຫວ່າງ ສອງປະເທດປະເທດໃຫ້ມີຄວາມແໜ້ນແຟ້ນຂຶ້ນກວ່າເກົ່າ ເພື່ອນໍາເອົາຜົນປະໂຫຍດສູງສຸດມາສູ່ປະຊາຊົນສອງຊາດ ພ້ອມທັງຢືນຢັນທີ່ຈະສືບຕໍ່ໃຫ້ການສະໜັບສະໜູນເຊິ່ງກັນແລະກັນໃນເວທີພາກພື້ນ ແລະ ສາກົນ. ນອກຈາກນີ້, ຝ່າຍລາວ ກໍໄດ້ແຈ້ງໃຫ້ຊາບ ກ່ຽວກັບ ການກະກຽມອອກຈາກສະຖານະພາບປະເທດດ້ອຍພັດທະນາໃນທ້າຍປີ 2026 ທີ່ຈະມາເຖິງ ແລະ ໄດ້ສະເໜີໃຫ້ ໂອຕຣິດ ສືບຕໍ່ໃຫ້ການຊ່ວຍເຫຼືອ ແລະ ສະໜັບສະໜູນ ສປປ ລາວ ຄືດັ່ງຜ່ານມາ ລວມທັງການໃຫ້ສິດທິພິເສດທາງດ້ານການຄ້າ ແລະ ການຊ່ວຍເຫຼືອນະໂຍບາຍທີ່ກ່ຽວຂ້ອງອື່ນໆ ແກ່ ສປປ ລາວ ໃນໄລຍະຂ້າມຜ່ານ ເພື່ອຮັບປະກັນໃຫ້ເປັນໄປຢ່າງໂລ່ງລ່ຽນ, ມີຄຸນນະພາບ ແລະ ຍືນຍົງ.
ໃນຖານະເປັນເຈົ້າພາບ ແລະ ປະທານ ກອງປະຊຸມທົບທວນສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຮອບວຽນທີ 3, ສປປ ລາວ ໄດ້ສະແດງຄວາມຂອບໃຈຢ່າງຈິງໃຈ ຕໍ່ການເຂົ້າຮ່ວມ ແລະ ການສະໜັບສະໜູນຂອງຄະນະຜູ້ແທນໂອຕຣິດ ໃນຄັ້ງນີ້. ພ້ອມດຽວກັນນັ້ນ, ສອງຝ່າຍກໍໄດ້ສະແດງຄວາມເຊື່ອໝັ້ນວ່າ ກອງປະຊຸມຄັ້ງນີ້ຈະໄດ້ຮັບຜົນສໍາເລັດຢ່າງຈົບງາມ.