ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສນຍ ຈັດສຳມະນາກ່ຽວກັບການສ້າງ ແລະ ກວດການິຕິກຳ

ໃນລະຫວ່າງວັນທີ 27-28 ມັງກອນ 2020ນີ້ ທີ່ໂຮງແຮມຄຣາວພລາຊາ, ນະຄອນຫຼວງວຽງຈັນ, ຫ້ອງວ່າການສຳນັກງານນາຍົກລັດຖະມົນຕີ (ກົມນິຕິກຳ) ໄດ້ຈັດກອງປະຊຸມສຳມະນາ ກ່ຽວກັບການເພີ່ມທະວີຄວາມອາດສາມາດໃນການສ້າງ ແລະ ກວດການິຕິກຳ (Seminar on Strength Skill of Drafting and Reviewing Legislative) ຂຶ້ນ, ໂດຍການສະໜັບສະໜູນຈາກ ສະຖາບັນຄົ້ນຄວ້າ ແລະ ຝຶກອົບຮົມຍຸຕິທຳ ກະຊວງຍຸຕິທຳ ປະເທດຍີ່ປຸ່ນ ແລະ ອົງການຮ່ວມມືສາກົນ ຍີ່ປຸ່ນ (JICA), ພາຍໃຕ້ການເປັນປະທານຂອງທ່ານ ບຸນເກີດ ສັງສົມສັກ, ລັດຖະມົນຕີປະຈຳສຳນັກງານນາຍົກລັດຖະມົນຕີ; ໂດຍມີທ່ານຮອງລັດຖະມົນຕີ, ແລະ ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຜູ້ຊີ້ນໍາກົມນິຕິກໍາ, ທ່ານອາດີດປະທານຄະນະກໍາມາທິການກົດໝາຍສະພາແຫ່ງຊາດ; ທ່ານອາດີດຮອງລັດຖະມົນຕີກະຊວງຍຸຕິທຳ, ພ້ອມດ້ວຍບັນດາວິທະຍາກອນ ແລະ ພະນັກງານວິຊາການ ຈາກກະຊວງ-ອົງການທຽບເທົ່າຕ່າງໆ ແລະ ຜູ້ຕາງໜ້າບັນດາກົມ ແລະ ຫໍປະຊຸມແຫ່ງຊາດ ທີ່ຂຶ້ນກັບຫ້ອງວ່າການສຳນັກງານນາຍົກລັດຖະມົນຕີ ເຂົ້າຮ່ວມ.
ໃນພິທີເປີດ, ທ່ານ ບຸນເກີດ ສັງສົມສັກ, ລັດຖະມົນຕີ ປະຈຳ ສນຍ ໄດ້ກ່າວວ່າ: ກອງປະຊຸມສຳມະນາໃນຄັ້ງນີ້ ຖືກຈັດຂຶ້ນໃນທ່າມກາງບັນຍາກາດ ທີ່ສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມື ລະຫວ່າງ ສອງລັດ ແລະ ປະຊາຊົນສອງຊາດ ລາວ ແລະ ຍີ່ປຸ່ນ ໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ.


ໃນຊຸມປີຜ່ານມາ, ລັດຖະບານ ຍີ່ປຸ່ນ ໄດ້ໃຫ້ການຊ່ວຍເຫຼືອແກ່ ສປປ ລາວ ໃນຫຼາຍດ້ານ ເປັນຕົ້ນແມ່ນ ໂຄງການຮ່ວມມືການພັດທະນາວິຊາການດ້ານກົດໝາຍ ແລະ ຍຸຕິທຳ, ໂຄງການພັດທະນາຊັບພະຍາກອນມະນຸດໃນຂົງເຂດຍຸຕິທຳ ໄລຍະທີ 1, ໄລຍະທີ 2 ແລະ ໂຄງການຮ່ວມມື ແລະ ການພັດທະນາຢ່າງຢືນຍົງ.

ນອກຈາກນັ້ນ, ການສຳມະນາໃນຄັ້ງນີ້ ຍັງເປັນການຈັດຕັ້ງຜັນຂະຫຍາຍຜົນການຢ້ຽມຢາມພົບປະ, ການແລກປ່ຽນບົດຮຽນປະສົບການ, ແລະ ທັງເປັນການເພີ່ມທະວີ ແລະ ຮັດແໜ້ນສາຍພົວພັນຮ່ວມມື, ຄວາມສາມັກຄີລະຫວ່າງ ກະຊວງຍຸດຕິທຳຂອງທັງສອງປະເທດ ທີ່ມີມູນເຊື້ອຊ່ວຍເຫຼືອເຊິ່ງກັນ ແລະ ກັນຕະຫຼອດມາ, ຊຶ່ງສະແດງອອກໃນໄລຍະຜ່ານມາ ສອງຝ່າຍ ແມ່ນໄດ້ມີການເຄື່ອນໄຫວແລກປ່ຽນບົດຮຽນ ແລະ ປະສົບການເຊິ່ງກັນ ແລະ ກັນມາແລ້ວ ໃນວຽກງານການເປັນເສນາທີການ, ບໍລິການ ແລະ ຮັບໃຊ້ໃຫ້ ລັດຖະບານ ແລະ ນາຍົກລັດຖະມົນຕີຂອງແຕ່ລະປະເທດ.

ໃນໂອກາດດຽວກັນນີ້, ນອກຈາກການແລກປ່ຽນບົດຮຽນ-ປະສົບການທາງດ້ານນິຕິກຳ ແລະ ພຶດຕິກຳຕົວຈິງຂອງສອງປະເທດແລ້ວ, ຊ່ຽວຊານທາງດ້ານກົດໝາຍ ຂອງ ສປປ ລາວ ຈະໄດ້ສະເໜີບົດຮຽນທາງດ້ານການສ້າງ ແລະ ການກວດກາຄວາມສອດຄ່ອງຂອງນິຕິກຳ ຢູ່ຂັ້ນສູນກາງ ແລະ ທ້ອງຖິ່ນຢູ່ປະເທດລາວ, ພ້ອມທັງ ບົດຮຽນດ້ານລະບົບການບັງຄັບໃຊ້ກົດໝາຍ (ອຳນາດລັດ ນິຕິບັນຍັດ, ຕຸລາການ, ບໍລິຫານ), ແລະ ບົດຮຽນດ້ານການສ້າງລັດທີ່ປົກຄອງດ້ວຍກົດ ໝາຍຢູ່ ສປປ ລາວ.
ພ້ອມກັນນີ້, ຍັງຈະມີຊ່ຽວຊານດ້ານກົດໝາຍ ຈາກສະຖາບັນຄົ້ນຄວ້າ ແລະ ຝຶກອົບຮົມຍຸຕິທຳ ຍີ່ປຸ່ນ, ກະຊວງຍຸຕິທໍາ ປະເທດຍີ່ປຸ່ນ ຈະມາແລກປ່ຽນປະສົບການ, ຂໍ້ຄິດເຫັນ ແລະ ບົດຮຽນດ້ານລະບົບການສ້າງ ແລະ ກວດກາຄວາມສອດຄ່ອງນິຕິກຳ ຂອງປະເທດຍີ່ປຸ່ນ, ແລກປ່ຽນປະສົບການຈາກການຊ່ວຍເຫຼືອບັນດາປະເທດກຳລັງພັດທະນາ ກ່ຽວກັບ ຫົວຂໍ້ການສ້າງ ແລະ ກວດກາຄວາມສອດຄ່ອງຂອງນິຕິກຳ, ລະບົບການສຶກສາ ແລະ ການເຜີຍແຜ່ກົດໝາຍຂອງປະເທດຍີ່ປຸ່ນ.
ໃນຕອນທ້າຍ, ທ່ານ ປະທານກອງປະຊຸມສຳມະນາ ຍັງໄດ້ເນັ້ນໜັກ ແລະ ຮຽກຮ້ອງມາຍັງ ວິທະຍາກອນ ແລະ ສຳມະນາກອນທັງໝົດ ຈົ່ງເອົາໃຈໃສ່ສຸມສະຕິປັນຍາ ແລະ ຍົກສູງຄວາມຮູ້ຄວາມສາມາດ ແລະ ຄວາມຮັບຜິດຊອບຂອງຕົນ ເຂົ້າໃນການແລກປ່ຽນຄຳຄິດຄຳເຫັນ, ປະສົບການ, ພຶດຕິກຳຕົວຈິງ ແລະ ຊ່ວຍເຫຼືອເຊິ່ງກັນ ແລະ ກັນ ເພື່ອໃຫ້ສາມາດບັນລຸເປົ້າໝາຍທີ່ໄດ້ຕັ້ງໄວ້.

ຂ່າວ,​ພາບ: ກົມປະຊາສຳພັນ ສນຍ

ກອງປະຊຸມລັດຖະບານສະໄໝສາມັນ ປະຈໍາເດືອນມັງກອນ 2020 ໄດ້ໄຂຂຶ້ນຢ່າງເປັນທາງການໃນວັນທີ 22 ແລະ ປິດລົງໃນຕອນບ່າຍວັນທີ 23 ມັງກອນ ທີ່ສໍານັກງານນາຍົກລັດຖະມົນຕີ, ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ໂດຍມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານທ່ານອື່ນໆ ພ້ອມດ້ວຍແຂກທີ່ຖືກເຊີນ ເຂົ້າຮ່ວມຢ່າງພ້ອມພຽງ. ກອງປະຊຸມ ໄດ້ພິຈາລະນາບັນຫາສໍາຄັນຕ່າງໆ ດັ່ງນີ້:

  1. ກອງປະຊຸມ ໄດ້ຮັບຟັງການລາຍງານຫຍໍ້ຈາກຂະແໜງການທີ່ກ່ຽວຂ້ອງກ່ຽວກັບ ສະພາບພົ້ນເດັ່ນຂອງພາກພື້ນ ແລະ ສາກົນ, ການສົ່ງເສີມການຜະລິດເປັນສິນຄ້າຂອງປະຊາຊົນ, ການເຝົ້າລະວັງພະຍາດຕິດແປດຕ່າງໆ, ອັດຕາແລກປ່ຽນເງິນຕາ ແລະ ການຄຸ້ມຄອງລາຄາສິນຄ້າ, ສະພາບການປ່ຽນແປງຂອງດິນຟ້າອາກາດ ແລະ ສະພາບຫາງສຽງສັງຄົມ. ຕໍ່ບັນຫາດັ່ງກ່າວ, ກອງປະຊຸມ ໄດ້ພ້ອມກັນຄົ້ນຄວ້າ ແລະ ມີຄວາມເປັນເອກະພາບສູງ ເພື່ອກໍານົດມາດຕະການແກ້ໄຂ ເປັນຕົ້ນ:
  • ໃຫ້ກະຊວງການຕ່າງປະເທດເປັນເຈົ້າການສືບຕໍ່ຕິດຕາມຢ່າງໃກ້ຊິດ, ກຽມພ້ອມຮັບມືຮອບດ້ານກັບບັນຫາຕ່າງໆ ທີ່ອາດຈະເກີດຂຶ້ນ ເພື່ອສືບຕໍ່ຮັກສາຄວາມສະຫງົບ ແລະ ຄວາມມີສະຖຽນລະພາບທາງດ້ານການເມືອງ ໃຫ້ໜັກແໜ້ນ ແລະ ໝັ້ນຄົງ ແລະ ມີການລາຍງານລັດຖະບານ ຢ່າງເປັນປົກກະຕິ;
  • ໃຫ້ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ພາກສ່ວນກ່ຽວຂ້ອງ ເອົາໃຈໃສ່ເພີ່ມທະວີຄວາມເປັນເຈົ້າການຕິດຕາມ ສະພາບປະກົດການຫຍໍ້ທໍ້ທາງສັງຄົມ, ປຸ້ນຈີ້ຊີງຊັບ, ຂີ້ລັກງັດແງະ, ການລັກລອບຄ້າຂາຍສິ່ງຜິດກົດໝາຍ, ການເກີດອຸປະຕິເຫດຕາມທ້ອງຖະໜົນ ແລະ ອັກຄີໄພທີ່ອາດເກີດຂຶ້ນ, ພ້ອມທັງກຳນົດມາດຕະການ ແກ້ໄຂປະກົດການຫຍໍ້ທໍ້ຕ່າງໆ ໃຫ້ເຂັ້ມງວດ, ເດັດຂາດ ແລະ ທັນການ;
  • ໃຫ້ກະຊວງອຸດສາຫະກໍາ ແລະ ການຄ້າ ສົມທົບກັບກະຊວງກະສິກໍາ ແລະ ປ່າໄມ້ ສືບຕໍ່ຊຸກຍູ້ ແລະ ສົ່ງເສີມການຜະລິດສິນຄ້າພາຍໃນ, ໂດຍສະເພາະແມ່ນ ສິນຄ້າປະເພດສະບຽງອາຫານ ໃຫ້ສາມາດຕອບສະໜອງພຽງພໍກັບຄວາມຮຽກຮ້ອງຕ້ອງການ ພ້ອມທັງ ວາງມາດຕະການໃນການຄຸ້ມຄອງການນຳເຂົ້າສິນຄ້າອຸປະໂພກ-ບໍລິໂພກ, ການກຳນົດລາຄາສິນຄ້າໃນທ້ອງຕະຫຼາດໃຫ້ມີຄວາມເໝາະສົມ ແລະ ສົມເຫດສົມຜົນ, ເດັດຂາດບໍ່ໃຫ້ມີການສວຍໂອກາດ ຂຶ້ນລາຄາສິນຄ້າໂດຍສະເພາະ ໃນຊ່ວງເທດສະການຕ່າງໆ;
  • ໃຫ້ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ກະຊວງກະສິກໍາ ແລະ ປ່າໄມ້ ເປັນເຈົ້າການສົມ ທົບກັບພາກສ່ວນກ່ຽວຂ້ອງ ຕິດຕາມການປ່ຽນແປງສະພາບດິນຟ້າອາກາດ ເອົາໃຈໃສ່ຊຸກຍູ້ການສະໜອງນໍ້າເຂົ້າໃນການ ຜະລິດການປູກພືດລະດູແລ້ງ ແລະ ຕິດຕາມເຝົ້າລະວັງການແຜ່ລະບາດຂອງພະຍາດສັດ ແລະ ແຈ້ງເຕືອນໃຫ້ປະຊາຊົນ ຮັບຊາບ ຢ່າງເປັນປົກກະຕິ;
  • ໃຫ້ກະຊວງສາທາລະນະສຸກ ສົມທົບກັບພາກສ່ວນກ່ຽວຂ້ອງ ຕິດຕາມເຝົ້າລະວັງ ແລະ ສະກັດກັ້ນການລະບາດ ຂອງພະຍາດທາງເດີນຫາຍໃຈ ໄວຣັດຊະນິດໃໝ່ ພ້ອມທັງ ແຈ້ງເຕືອນ, ແນະນໍາໃຫ້ປະຊາຊົນຮັບຊາບ ແລະ ເຂົ້າໃຈເຖິງວິທີປ້ອງກັນ.
  1. ກອງປະຊຸມ ໄດ້ຮັບຟັງການລາຍງານກ່ຽວກັບ ການຜັນຂະຫຍາຍຜົນຂອງກອງປະຊຸມຄັ້ງທີ່ 42 ຂອງຄະນະ ກໍາມະການຮ່ວມມືທະວີພາຄີ ລະຫວ່າງ ລາວ-ຫວຽດນາມ, ຜ່ານການຮັບຟັງ ແລະ ການປະກອບຄໍາເຫັນ ຂອງສະມາຊິກ  ລັດຖະບານ, ກອງປະຊຸມ ໄດ້ມີທິດຊີ້ນໍາ ໃຫ້ບັນດາກະຊວງ,  ອົງການທຽບເທົ່າກະຊວງ ແລະ ພາກສ່ວນທີ່ກ່ຽວຂ້ອງຈັດຕັ້ງຜັນຂະຫຍາຍ ຂໍ້ຕົກລົງວ່າດ້ວຍແຜນການຮ່ວມມື ປະຈຳປີ 2020 ລະຫວ່າງລັດຖະບານ ແຫ່ງ ສປປ ລາວ ແລະ ສສ ຫວຽດນາມ ໂດຍໃຫ້ຫັນເປັນແຜນວຽກ, ແຜນງານ ແລະ ມີການແບ່ງຄວາມຮັບຜິດຊອບໃຫ້ຈະແຈ້ງ ໂດຍໃຫ້ເອົາໃຈໃສ່ເປັນພິເສດ ໃນການຈັດຕັ້ງປະຕິບັດວຽກງານ ແລະ ບັນດາໂຄງການຕ່າງໆ ໃຫ້ໄດ້ຮັບຜົນດີ.
  2. ກອງປະຊຸມ ໄດ້ຮັບຟັງການລາຍງານກ່ຽວກັບຜົນການຢ້ຽມຢາມ ສປ ຈີນ ຢ່າງເປັນທາງການຂອງທ່ານນາຍົກ ລັດຖະມົນຕີແຫ່ງ ສປປ ລາວ ໃນວັນທີ 5-9 ມັງກອນ 2020. ຜ່ານການຮັບຟັງ ແລະ ການປະກອບຄໍາເຫັນຂອງສະມາຊິກລັດຖະບານ, ກອງປະຊຸມໄດ້ມີທິດຊີ້ນຳໃຫ້ຂະແໜງການກ່ຽວຂ້ອງ ຈົ່ງເອົາໃຈໃສ່ຕິດຕາມ, ຊຸກຍູ້ ແລະ ແກ້ໄຂບັນດາຂອດຄົງຄ້າງຕ່າງໆ ເພື່ອຜັນຂະຫຍາຍ ແລະ ຈັດຕັ້ງປະຕິບັດ ບັນດາເນື້ອໃນເອກະສານ, ໂຄງການ ແລະ ກິດຈະກຳການຮ່ວມມືຕ່າງໆທີ່ໄດ້ຕົກລົງກັນ ໃຫ້ມີປະສິດທິຜົນ.
  3. ກອງປະຊຸມໄດ້ຮັບຟັງບົດລາຍງານການຍົກລະດັບການພົວພັນຮ່ວມມືສອງຝ່າຍ ລະຫວ່າງ ສປປ ລາວ ແລະ ສະຫະພັນ ຣັດເຊຍ ໃນສະພາບການໃໝ່ ແລະ ເຫັນດີໃຫ້ແຕ່ງຕັ້ງ ຄະນະຮັບຜິດຊອບຈັດຕັ້ງ ການສະເຫຼີມສະຫຼອງ 60 ປີ ສາຍພົວພັນການທູດ ລາວ-ຣັດເຊຍ ເຊິ່ງຈະຄົບຮອບໃນເດືອນຕຸລາ 2020 ໂດຍມີກະກຽມບັນດາກິດຈະກໍາການສະເຫຼີມ ສະຫຼອງໃຫ້ດີ ເຊັ່ນ: ການຫວນຄືນປະຫວັດສາດສາຍພົວພັນຮ່ວມມື ລະຫວ່າງ ສອງຊາດ ລາວ-ຣັດເຊຍ, ​ການແລກປ່ຽນດ້ານສິນລະປະວັນນະຄະດີ ແລະ ອື່ນໆ.
  4.  ກອງປະຊຸມໄດ້ຮັບຟັງການລາຍງານກ່ຽວກັບ ການຫັນເປັນທັນສະໄໝ ໃນການຊໍາລະສະສາງ ແລະ ການເກັບລາຍຮັບເຂົ້າງົບປະມານ ຜ່ານລະບົບໂທລະສັບມືຖື “Mobile Money”, ຜ່ານການຮັບຟັງ ແລະ ການປະກອບຄໍາເຫັນຂອງສະມາຊິກລັດຖະບານ, ກອງປະຊຸມລັດຖະບານໄດ້ມີທິດຊີ້ນໍາ ໃຫ້ແຕ່ງຕັ້ງຄະນະສະເພາະກິດ ໂດຍມອບໃຫ້ ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ເປັນຫົວໜ້າຄະນະ ມີບັນດາລັດຖະມົນຕີ ແລະ ຮອງລັດຖະມົນຕີກະຊວງທີ່ກ່ຽວຂ້ອງ ເປັນຄະນະ ແລະ ມີໜ່ວຍງານປະຕິບັດວຽກ ແລະ ລົງເລິກທາງດ້ານວິຊາການ ໂດຍໃຫ້ລົງເລິກຄົ້ນຄວ້າພາລະບົດບາດ ແລະ ກຳນົດໄລຍະເວລາໃນການຈັດຕັ້ງປະຕິບັດວຽກງານດັ່ງກ່າວ ພ້ອມທັງ ສ້າງແຜນແມ່ບົດການຫັນໄປສູ່ເສດຖະ ກິດດີຈີຕອນແຫ່ງຊາດ ແລະ ສ້າງແຜນແມ່ບົດການຫັນໄປສູ່ການຊໍາລະສະສາງ ແບບດີຈີຕອນ; ຈາກນັ້ນ ກໍ່ໃຫ້ນໍາມາລາຍງານຄວາມໜ້າຄືບໜ້າໃນການຈັດຕັ້ງປະຕິບັດວຽກງານດັ່ງກ່າວ ຕໍ່ກອງປະຊຸມລັດຖະບານສະໄໝສາມັນປະຈໍາເດືອນ ມີນາ 2020 ທີ່ຈະມາເຖິງ.
  5. ກອງປະຊຸມໄດ້ພິຈາລະນາ ແລະ ເຫັນດີຮັບຮອງເອົາ ຮ່າງດໍາລັດວ່າດ້ວຍກອງທຶນສົ່ງເສີມ ແລະ ພັດທະນາພະລັງ

ງານຊົນນະບົດ. ກອງປະຊຸມໄດ້ເຫັນດີດ້ານຫຼັກການຮັບຮອງເອົາຮ່າງດຳລັດສະບັບດັ່ງກ່າວ ແລະ ໄດ້ຊີ້ນໍາໃຫ້ກະຊວງພະລັງງານ ແລະ ບໍ່ແຮ່ ສົມທົບກັບພາກສ່ວນທີ່ກ່ຽວຂ້ອງ ປັບປຸງຕື່ມຕາມການປະກອບຄໍາເຫັນຂອງສະມາຊິກລັດຖະບານ ເປັນຕົ້ນ ແມ່ນບາງເນື້ອໃນຂອງບາງມາດຕາ ໃຫ້ຄົບຖ້ວນ, ລະອຽດ, ຈະແຈ້ງ, ຮັດກຸມ ແລະ ແທດຕົວຈິງ ໂດຍສະເພາະ ແຫຼ່ງລາຍຮັບ ແລະ ການນໍາໃຊ້ກອງທຶນສົ່ງເສີມ ແລະ ພັດທະນາພະລັງງານ; ການຄຸ້ມຄອງບໍລິຫານກອງທຶນສົ່ງເສີມ ແລະ ພັດທະນາພະລັງງານ; ການເປີດບັນຊີ, ການກວດສອບ ແລະ ການລາຍງານ ແລະ ອື່ນໆ. ພາຍຫຼັງປັບປຸງສໍາເລັດແລ້ວ ໃຫ້ສົມທົບກັບ ຫ້ອງວ່າການສໍານັກງານນາຍົກລັດຖະມົນຕີ ກວດກາຮຽບຮຽງຄືນ ແລ້ວສະເໜີທ່ານນາຍົກລັດຖະມົນຕີ ລົງລາຍເຊັນປະກາດໃຊ້ ຢ່າງເປັນທາງການ.

ໃນຕອນທ້າຍຂອງກອງປະຊຸມ ທ່ານນາຍົກລັດຖະມົນຕີ ໄດ້ຊີ້ນໍາເນັ້ນໜັກໃຫ້ຄະນະລັດຖະບານ ເອົາໃຈໃສ່ຈັດຕັ້ງປະຕິບັດວຽກງານຈຸດສຸມຈໍານວນໜຶ່ງ ດັ່ງນີ້:

  • ສຳລັບແຜນວຽກຈຸດສຸມ ປີ 2020 ມີຄື:
  • ສືບຕໍ່ຮັບປະກັນສະຖຽນລະພາບທາງດ້ານເສດຖະກິດມະຫາພາກ ແລະ ແກ້ໄຂຄວາມຫຍຸ້ງຍາກທາງດ້ານເສດຖະ ກິດ-ການເງິນ ໃຫ້ມີທ່າຕັ້ງໜ້າກວ່າເກົ່າ;
  • ຈັດຕັ້ງປະຕິບັດ ຄໍາສັ່ງເລກທີ 03/ນຍ, ລົງວັນທີ 21 ມັງກອນ 2020 ວ່າດ້ວຍການປັບປຸງວຽກງານການ ບໍລິການການອອກໃບອະນຸຍາດລົງທຶນ ແລະ ການອອກໃບອະນຸຍາດດໍາເນີນທຸລະກິດ;
  • ສືບຕໍ່ແກ້ໄຂໜີ້ສິນໂຄງການລົງທຶນຂອງລັດ ໃຫ້ສໍາເລັດຕາມແຜນກໍານົດໄວ້ ເພື່ອສ້າງຄວາມສະດວກໃຫ້ທຸລະກິດມີການຂັບເຂື່ອນໃນທາງທີ່ມີປະສິດທິພາບສູງຂຶ້ນ;
  • ຍົກລະດັບ ແລະ ຄຸນນະພາບຂອງການສຶກສາ ແລະ ການບໍລິການ ດ້ານສາທາລະນະສຸກໃຫ້ດີຂຶ້ນ;
  • ສຸມໃສ່ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ (ຕິດພັນກັບການຊຸກຍູ້ປຸກລະດົມຂະບວນການຮັກຊາດ ແລະ ພັດທະນາ ໃຫ້ເຂົ້າສູ່ລວງເລິກ);
  • ຊ່ວຍເຫຼືອປະຊາຊົນ ແລະ ຟື້ນຟູເຂດ ທີ່ຖືກກະທົບຈາກໄພພິບັດ;
  • ສືບຕໍ່ຈັດຕັ້ງປະຕິບັດຄໍາສັ່ງ ເລກທີ 15/ນຍ ແລະ ຜັນຂະຫຍາຍ ແລະ ຈັດຕັ້ງປະຕິບັດ ແຜນແມ່ບົດຈັດສັນທີ່ດິນແຫ່ງຊາດ;
  • ສືບຕໍ່ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (SDG)
  • ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ, ແກ້ໄຂປະກົດການຫຍໍ້ທໍ້ທາງສັງຄົມ ເພື່ອຮັບປະກັນສະຖຽນລະພາບທາງການເມືອງ ແລະ ຄວາມສະຫງົບຂອງສັງຄົມ;
  • ສືບຕໍ່ເສີມຂະຫຍາຍວຽກງານພົວພັນຮ່ວມມືສາກົນໃນຂອບ 2 ຝ່າຍ ແລະ ຫຼາຍຝ່າຍ ທີ່ໄດ້ຕົກລົງກັບບັນດາປະເທດເພື່ອນມິດ ແລະ ອົງການສາກົນ ໃຫ້ແຕກດອກອອກຜົນໂດຍໄວ (ໂດຍເອົາໃຈໃສ່ພິເສດຕໍ່ໂຄງການຮ່ວມມືລາວ-ຫວຽດນາມ ແລະ ລາວ-ຈີນ);
  • ກະກຽມກອງປະຊຸມສຸດຍອດແມ່ນໍ້າຂອງ-ແມ່ນໍ້າລ້ານຊ້າງ (MCL) ຄັ້ງທີ 3, ກອງປະຊຸມສຸດຍອດຍຸດທະສາດການຮ່ວມມືດ້ານເສດຖະກິດ ແມ່ນໍ້າ ອີລາວະດີ-ແມ່ນໍ້າເຈົ້າພະຍາ-ແມ່ນໍ້າຂອງ (ACMECS) ຄັ້ງທີ 9; ກອງປະຊຸມສຸດຍອດ (CLMV) ຄັ້ງທີ 10 ແລະ ກອງປະຊຸມສຸດຍອດເຂດສາມຫຼ່ຽມພັດທະນາ (CLV) ທີ່ລາວຈະເປັນເຈົ້າພາບໃນເດືອນມີນາ 2020 ນີ້ ແລະ ວຽກສໍາຄັນອື່ນໆ.

  • ແຜນວຽກຈຸດສຸມປະຈໍາເດືອນ ກຸມພາ 2020

ພວກເຮົາຈະໄດ້ສຸມໃສ່ວຽກງານຈຸດສຸມຂອງລັດຖະບານ ປະຈໍາເດືອນກຸມພາ ເຊິ່ງຂໍເນັ້ນບາງວຽກຈຸດສຸມ ດັ່ງນີ້:

  • ໃຫ້ສືບຕໍ່ຮັກສາສະຖຽນລະພາບທາງດ້ານການເມືອງ ໃຫ້ມີຄວາມສະຫງົບ, ເປັນລະບຽບຮຽບຮ້ອຍ, ປ້ອງກັນ, ສະກັດກັ້ນບັນຫາປະກົດການຫຍໍ້ທໍ້ໃນສັງຄົມ ເປັນຕົ້ນແມ່ນ ການຄາດຕະກໍາ, ປຸ້ນຈີ້ຊິງຊັບ, ຂີ້ລັກງັດແງະ, ອັກຄີໄພ, ບັນ ຫາສິງເສບຕິດ ແລະ ອື່ນໆ ໃຫ້ມີມາດຕະການລະອຽດ ແລະ ເຂັ້ມງວດ ເພື່ອເຮັດໃຫ້ບັນດາປະກົດການຫຍໍ້ທໍ້ ຫຼຸດລົງເທື່ອລະກ້າວ. ພວກເຮົາຕ້ອງໄດ້ເພີ່ມຄວາມເອົາໃຈໃສ່ໃນການຄຸ້ມຄອງການສະຫຼອງວັນປີໄໝຂອງຊາວຫວຽດນາມ ແລະ ຈີນ ໃຫ້ມີຄວາມເປັນລະບຽບຮຽບຮ້ອຍ ບໍ່ໃຫ້ມີເຫດການທີ່ບໍ່ດີເກີດຂຶ້ນ, ຫ້າມບໍ່ໃຫ້ຈຸດກະໂພກທີ່ມີສຽງດັງລົບກວນ ໃນຊວງໄລຍະປີໃໝ່ ທີ່ຈະມາເຖິງ;
  • ໃຫ້ສືບຕໍ່ຕິດຕາມ ແລະ ຄຸ້ມຄອງລາຄາສິນຄ້າ ຫ້າມບໍ່ໃຫ້ພໍ່ຄ້າຊາວຂາຍສວຍໂອກາດຂຶ້ນລາຄາສິນຄ້າ. ກໍລະນີຫາກມີຜູ້ລະເມີດສວຍໂອກາດຂືຶ້ນລາຄາສິນຄ້າ ກໍ່ໃຫ້ມີມາດຕະການເຂັ້ມງວດໃນການແກ້ໄຂ ໂດຍສະເພາະໃນຊ່ວງເທດສະການຕ່າງໆ;
  • ໃຫ້ສືບຕໍ່ເອົາໃຈໃສ່ຄຸ້ມຄອງສະພາບອັດຕາແລກປ່ຽນ, ຮັກສາສະຖຽນລະພາບການເງີນ ແລະ ໄພເງິນເຟີ້ ໃຫ້ຢູ່ໃນລະດັບທີ່ສາມາດຄວບຄຸມໄດ້; ພ້ອມນີ້ ກໍ່ໃຫ້ຄົ້ນຄວ້າ ແລະ ລາຍງານທິດທາງການແກ້ໄຂບັນຫາເງິນເຟີ້ ແລະ ຄຸ້ມຄອງອັດຕາແລກປ່ຽນໄລຍະກາງ ແລະ ໄລຍະຍາວ;
  • ໃຫ້ເອົາໃຈໃສ່ຕິດຕາມຊຸກຍູ້ການຜະລິດ ເປັນຕົ້ນແມ່ນ ການແກ້ໄຂບັນຫາການສະໜອງນໍ້າໃນການຜະລິດ, ການລະບາດຂອງພະຍາດສັດ (ໄຂ້ຫວັດສັດປີກ) ແລະ ການປ້ອງກັນ-ສະກັດກັ້ນສັດຕູພືດ; ພ້ອມທັງມີການຄຸ້ມຄອງຈໍາກັດການນໍາເຂົ້າ, ການສົ່ງເສີມການຜະລິດ ແລະ ຊົມໃຊ້ພາຍໃນຂອບເຂດທົ່ວປະເທດ ຢ່າງເປັນຮູບປະທໍາ. ພ້ອມດຽວກັນ, ໃຫ້ເອົາໃຈໃສ່ການຜະລິດລະດູແລ້ງ ແລະ ມາດຕະການຮັບມື້ກັບໄພແຫ້ງແລ້ງທີ່ອາດຈະເກີດຂຶ້ນ;
  • ໃຫ້ເອົາໃຈໃສ່ ແລະ ຕິດຕາມເຝົ້າລະວັງສະພາບການປ່ຽນແປງອາກາດ ເປັນຕົ້ນແມ່ນ ສະພາບອາກາດທີ່ເປັນ ມົນລະພິດ ແລະ ສະພາບປະລິມານນ້ໍຳບົກແຫ້ງ ແລະ ມີການແຈ້ງເຕືອນໃຫ້ປະຊາຊົນຮັບຊາບ ແລະ ກຽມຮັບມືຢ່າງທັນການ; ຕິດຕາມ, ເຝົ້າລະວັງ, ສະກັດກັ້ນການແຜ່ລະບາດຂອງເຊື້ອໄວຣັດຊະນິດໃຫມ່ (ອັກເສບປອດ) ທີ່ພວມແຜ່ລະບາດຢູ່ ສປ ຈີນ ພ້ອມທັງໃຫ້ຂໍ້ມູນຄວາມສ່ຽງແກ່ສັງຄົມທີ່ຖືກຕ້ອງທັນການເພື່ອປ້ອງກັນ ແລະ ສະກັດກັ້ນໃຫ້ທັນເວລາ, ມີປະສິດທິຜົນ;
  • ໃຫ້ສືບຕໍ່ຕິດຕາມຢ່າງໃກ້ສິດຕໍ່ສະພາບການ ຂອງສາກົນ ແລະ ພາກພື້ນ ທີ່ມີຄວາມສັບສົນ ພ້ອມທັງ    ມີການ

ວິເຄາະ, ວິໄຈໃຫ້ຊັດເຈນ ທີ່ອາດສົ່ງຜົນກະທົບທາງກົງ ແລະ ທາງອ້ອມຕໍ່ ສປປ ລາວ; ພ້ອມນີ້ ກໍ່ໃຫ້ກະກຽມແຜນການເຄື່ອນໄຫວວຽກງານຕ່າງປະເທດຂອງການນໍາຂັ້ນສູງ ໂດຍສະເພາະແມ່ນ ການກຽມຕ້ອບຮັບ ແລະ ການພົບປະສອງຝ່າຍ ກັບນາຍົກລັດຖະມົນຕີມາເລເຊຍ; ບັນດາຜູ້ນໍາຂອງຕ່າງປະເທດ ທີ່ຈະເຂົ້າຮ່ວມກອງປະຊຸມສາກົນໃນເດືອນ ມີນາ 2020 ແລະ ກະກຽມເປັນເຈົ້າພາບຮ່ວມກອງປະຊຸມແມ່ນໍ້າຂອງ-ແມ່ນໍ້າລ້ານຊ້າງ ແລະ ກອງປະຊຸມທີ່ຕິດພັນ.

 

ເພື່ອຈັດຕັ້ງປະຕິບັດທິດຊີ້ນຳ ຂອງກອງປະຊຸມລັດຖະບານ ສະໄໝສາມັນປະຈຳເດືອນມັງກອນ 2020 ໃຫ້ມີປະສິດ ທິຜົນ, ກອງປະຊຸມ ມອບໃຫ້ ຫ້ອງວ່າການສໍານັກງານນາຍົກລັດຖະມົນຕີ ຜັນຂະຫຍາຍຜົນກອງປະຊຸມລັດຖະບານໃນຄັ້ງນີ້ ເປັນມະຕິ ແລະ ແຈ້ງການເປັນອັນລະອຽດຕື່ມ ເພື່ອມອບຄວາມຮັບຜິດຊອບ ໃຫ້ບັນດາກະຊວງ ແລະ ຂະແໜງການ ທີ່ກ່ຽວຂ້ອງ ນໍາໄປຈັດຕັ້ງປະຕິບັດ ພ້ອມທັງ ມອບໃຫ້ສະມາຊິກລັດຖະບານ ເອົາໃຈໃສ່ນຳພາຊີ້ນໍາການຈັດຕັ້ງປະຕິບັດວຽກງານຈຸດສຸມປະຈໍາເດືອນກຸມພາ ທີ່ກ່ຽວຂ້ອງກັບຄວາມຮັບຜິດຊອບຂອງຕົນ ໃຫ້ມີປະສິດທິຜົນ, ພ້ອມທັງ ສະຫຼຸບລາຍງານຜົນການຈັດຕັ້ງປະຕິບັດ ໃຫ້ຫ້ອງວ່າການສຳນັກງານນາຍົກລັດຖະມົນຕີ.​

ຕອນບ່າຍ ຂອງວັນທີ 23 ມັງກອນ 2020 ນີ້້, ທ່ານ ບົວທອງ ອຸແສງຄໍາ ຮອງເລຂາພັກແຂວງ, ປະທານສະພາປະຊາຊົນແຂວງຜົ້ງສາລີ ຖະແຫຼ່ງຂ່າວການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ ຊຸດທີ I ຕໍ່ສື່ມວນຊົນຂອງແຂວງຜົ້ງສາລີວ່າ ທີ່ຫ້ອງປະຊຸມນ້ອຍສະພາປະຊາຊົນແຂວງ; ເຂົ້າຮ່ວມຮັບຟັງການຖະແຫຼ່ງຂ່າວໃນຄັ້ງນີ້ ມີ ປະທານ, ຮອງປະທານຄະນະກໍາມະການ ສພຂ ພ້ອມດ້ວຍພະນັກງານ-ລັດຖະກອນພາຍໃນ ສພຂ ແລະ ສະຖານີວິທະຍຸ – ໂທລະພາບແຂວງຜົ້ງສາລີເຂົ້້າຮ່ວມ

ການຖະແຫຼງຂ່າວຄັ້ງນີ້, ທ່ານ ບົວທອງ ອຸແສງຄໍາ ຮອງເລຂາພັກແຂວງ, ປະທານສະພາປະຊາຊົນແຂວງຜົ້ງສາລີ ໄດ້ແຈ້ງໃຫ້ທຸກພາກສ່ວນໃນທົ່ວແຂວງຜົ້ງສາລີ ຊາບວ່າ: ມາເຖິງປັດຈຸບັນນີ້ການກະກຽມ ດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ ຊຸດທີ I ແມ່ນມີຄວາມພ້ອມໃນທຸກດ້ານແລ້ວ.  ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ ຊຸດທີ I ຈະໄຂຂຶ້ນຢ່າງເປັນທາງການ ໃນເວລາ 8 ໂມງເຊົ້າ ຂອງມື້ວັນຈັນ, ວັນທີ  30 ມັງກອນ 2020 ທີ່ຫ້ອງປະຊຸມຫ້ອງວ່າການແຂວງ ຊັ້ນທີ 5 ເທດສະບານໃໝ່ຂອງແຂວງຜົ້ງສາລີ ທີ່ເມືອງບຸນເໜືອ, ຊຶ່ງກອງປະຊຸມຈະໃຊ້ເວລາ 3 ວັນເຕັມ (ແຕ່ວັນທີ30 ມັງກອນ  –  1 ກຸມພາ 2020). ກອງປະຊຸມສະໄໝສາມັນ ໃນຄັ້ງນີ້, ຈະໄດ້ສຸມໃສ່ຄົ້ນຄວ້າພິຈາລະນາ ແລະ ຕົກລົງບັນຫາສໍາຄັນພື້ນຖານຂອງທ້ອງຖິ່ນມີຄື: ພິຈາລະນາ, ຮັບຮອງເອົາ ເອົາການແຕ່ງຕັ້ງບຸກຄະລາກອນຂອງອົງການປົກຄອງແຂວງຈຳນວນໜຶ່ງ; ພິຈາລະນາ, ຮັບຮອງເອົາ ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດວຽກງານທີ່ພົ້ນເດັ່ນປະຈຳປີ 2019 ແລະ ທິດທາງປີ 2020; ຮັບຟັງ, ພິຈາລະນາ, ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດວຽກງານແຜນພັດທະນາເສດຖະກິດ – ສັງຄົມ, ແຜນງົບປະມານແຫ່ງລັດປີ2019 ແລະ ທິດທາງປີ 2020; ຮັບຟັງ, ພິຈາລະນາແລະ ຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ2019 ແລະ ທິດທາງແຜນການປະຈຳປີ 2020 ຂອງອົງການກວດສອບປະຈຳພາກເໜືອ; ຮັບຟັງ, ພິຈາລະນາ ແລະ ຮັບຮອງບົດລາຍງານຜົນການກວດສອບບົດສະຫຼູບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດຂັ້ນແຂວງ ປະຈຳປີ 2018 ຂອງອົງການກວດສອບປະຈຳພາກເໜືອ; ຮັບຟັງບົດລາຍງານຂອງອົງການກວດກາລັດແຂວງກ່ຽວກັບການຈັດຕັ້ງປະຕິບັດຜົນການກວດກາ ໃນປີຜ່ານມາ ແລະ ທິດທາງແຜນການປະຈຳປີ 2020; ຮັບຟັງ, ພິຈາລະນາ ແລະ ຮັບຮອງເອົາບົດລາຍງານການເຄື່ອນໄຫວວຽກງານປະຈຳປີ 2019 ແລະ ທິດທາງແຜນການເຄື່ອນໄຫວວຽກງານປະຈຳປີ 2019 ແລະ ທິດທາງການເຄື່ອນໄຫວວຽກງງານປະຈຳປີ 2020  ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ; ຮັບຟັງ, ພິຈາລະນາ ແລະ ຮັບຮອງເອົາ ບົດລາຍງານ ການຈັດຕັ້ງປະຕິບັດແຜນການເຄື່ອນໄຫວ ວຽກງານປະຈຳປີ 2019 ແລະ ແຜນການເຄື່ອນໄຫວວຽກງານປະຈຳປີ 2020 ຂອງສະພາປະຊາຊົນແຂວງ; ຮັບຟັງ, ພິຈາລະນາແລະ ຮັບຮອງການຈັດຕັ້ງປະຕິບັດຜົນການປະຕິບັດໜ້າທີຂອງບຸກຄະລາກອນດຳລົງຕຳແໜ່ງ ທີ່ສະພາປະຊາຊົນແຂວງເລືອກຕັ້ງ ແລະ ຮັບຮອງເອົາການແຕ່ງຕັ້ງ; ຮັບຟັງ, ພິຈາລະນາ ແລະ ຮັບຮອງບົດລາຍງານຜົນການຕິດຕາມກວດກາຂອງຄະນະປະຈຳ ສພຂ ກ່ຽວກັບການຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດມາຍທີ່ຕິດພັນກັບການເກັບລາຍຮັບ, ຕິດພັນກັບການສ້າງວິຊາຊີບ, ການພັດທະນາສີມືແຮງງານທີ່ມີຄຸນນະພາບ ແລະ ການສ້າງວຽກເຮັດງານທຳຂອງປະຊາຊົນ; ຮັບຟັງບົດປະກອບຄໍາເຫັນ ຂອງອົງການແນວລາວສ້າງຊາດແຂວງຕໍ່ບົດລາຍງານແຜນການເຄື່ອນໄຫວວຽກງານປະຈຳປີ 2019 ແລະ ທິດທາງເຄື່ອນໄຫວວຽກງານປະຈຳປີ 2020 ຂອງສະພາປະຊາຊົນແຂວງ. ນອກຈາກ ຍັງຮັບຟັງການປະກອບຄຳເຫັນຂອງຄະນະປະຈຳຕໍ່ບັນດາເນື້ອໃນ ແລະ ບັນຫາຕ່າງໆທີຍົກຂື້ນໃນກອງປະຊຸມ.

ທ່ານປະທານສະພາປະຊາຊົນແຂວງຜົ້ງສາລີ ຈຶ່ງ ຂໍເຊີນບັນດາການນໍາພັກ-ລັດທຸກຂັ້ນ, ພະນັກງານ-ລັດຖະກອນ, ທະຫານ, ຕໍາຫຼວດ, ນັກຮຽນ, ນັກສຶກສາ-ປັນຍາຊົນ, ນັກທຸລະກິດທາງພາກລັດ ແລະ ພາກເອກະຊົນ, ຊາວຜູ້ອອກແຮງານ ແລະ ພໍ່ແມ່ພີ່ນ້ອງປະຊາຊົນບັນດາເຜົ່າ ໃນທົ່ວແຂວງ ຈົ່ງຕິດຕາມການດໍາເນີນກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງ ຊຸດທີ I ໃນຄັ້ງນີ້ ແລະ ໄລຍະດໍາເນີນກອງປະຊຸມສະໄໝສາມັນ ເທື່ອທີ 8 ທາງສະພາປະຊາຊົນແຂວງຜົ້ງສາລີ ໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນຂອງແຂວງ ເພື່ອຮັບເອົາຄໍາຄິດ, ຄໍາເຫັນ ແລະ ຄໍາສະເໜີໂດຍກົງຈາກປະຊາຊົນ ທີ່ມີຕໍ່ການບໍລິຫານວຽກງານ ຂອງອົງການຕັ້ງພັກ-ລັດທຸກຂັ້ນ ໃນທົ່ວແຂວງ ທີ່ສົ່ງໄປຍັງກອງປະຊຸມສະໄໝສາມັນ ເທື່ອທີ 8 ໃນຄັ້ງນີ້; ບັນດາທ່ານສາມາດສົ່ງຄໍາຄິດ, ຄໍາເຫັນ ແລະ ຄໍາສະເໜີໄປຍັງກອງປະຊຸມໄດ້ 3 ຊ່ອງທາງດັ່ງນີ້:

  1. ໂທລະສັບສາຍດ່ວນ ໝາຍເລກ: 088 156.
    2. ແຟັກ ໝາຍເລກ: 088 210 102
    3. ສົ່ງອີເມວ: sapha.psl@hotmail.com.

ຂ່າວ: ສົມຄິດ ແກ້ວນວນລາ

 

ໃນວັນທີ 23 ມັງກອນ 2020, ທີ່ ໂຮງແຮມ ລາວພລາຊາ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມອໍາລາຂອງ ທ່ານ ນາງ ມາເຣຍ ນາຕາເຣຍ ກຸເຕີເຣສ ວີກັສ ຄາລາສກາລາວ (Maria Natalia Gutterres Viegas Carrascalao), ເອກອັກຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ ປະຈຳ ສປປ ລາວ, ໃນໂອກາດທີ່ສຳເລັດໜ້າທີ່ການທູດ ຢູ່ ສປປ ລາວ.

ໃນໂອກາດນີ້, ທ່ານລັດຖະມົນຕີ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສຳເລັດໃນການປະຕິບັດໜ້າທີ່ຂອງທ່ານທູດ ຕະຫຼອດໄລຍະດຳລົງຕຳແໜ່ງເປັນເອກອັກຄະລັດຖະທູດ, ຊຶ່ງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນ ລະຫວ່າງສອງປະເທດ ກໍຄືປະຊາຊົນສອງຊາດ ໃຫ້ມີຄວາມແໜ້ນແຟ້ນຍິ່ງໆຂຶ້ນ. ພ້ອມນີ້, ທ່ານລັດຖະມົນຕີ ກໍໄດ້ສະແດງຄວາມ​ຂອບ​ໃຈມາຍັງລັດ​ຖະ​ບານ ແລະ ປະຊາຊົນ ຕີມໍ-ເລສເຕ ທີ່ໄດ້ໃຫ້ການຊ່ວຍເຫຼືອ ສປປ ລາວ ໃນໄລຍະຜ່ານມາ ໂດຍສະເພາະ ຕໍ່ເຫດການໄພພິບັດທາງທຳມະຊາດຢູ່ແຂວງອັດຕະປື ໃນປີ 2018, ຊຶ່ງໄດ້ໃຫ້ການຊ່ວຍເຫຼືອເປັນເງິນ ຈໍານວນ 750.000 ໂດລາ ສະຫະລັດ.

ໃນຕອນທ້າຍ, ທ່ານລັດຖະມົນຕີ ໄດ້ອວຍພອນໃຫ້ທ່ານທູດ ປະສົບຜົນສໍາເລັດໃນການປະຕິບັດໜ້າທີ່ອັນໃໝ່ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ. ໃນຂະນະດຽວກັນ, ທ່ານທູດ ກໍໄດ້ສະແດງຄວາມຂອບໃຈເປັນຢ່າງສູງມາຍັງລັດຖະບານ ແລະ ປະຊາຊົນລາວ ກໍຄືກະຊວງການຕ່າງປະເທດ ແຫ່ງ ສປປ ລາວ ທີ່ໄດ້ໃຫ້ການຮ່ວມມື, ສະໜັບສະໜູນຊ່ວຍເຫຼືອ ແລະ ອໍານວຍຄວາມສະດວກເປັນຢ່າງດີ ຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປ ລາວ ໃນຄັ້ງນີ້ ຈົນໄດ້ຮັບຜົນສໍາເລັດອັນຈົບງາມ ແລະ ຈະສືບຕໍ່ ໃຫ້ການຮ່ວມມືໃນທຸກດ້ານ ເພື່ອປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ຕີມໍ-ເລສເຕ- ສປປ ລາວ ໃຫ້ຈະເລີນງອກງາມຍິ່ງໆຂຶ້ນ.

ກົມການຂ່າວກະຊວງການຕ່າງປະເທດ

ພະແນກໂຄສະນາ ແລະ ປະຊາສຳພັນ

ໃນວັນທີ 21 ມັງກອນ 2020, ຄະນະຜູ້ແທນແຫ່ງ ສປປ ລາວ ນຳໂດຍ ທ່ານ ບຸນເກີດ ສັງສົມສັກ, ລັດຖະມົນຕີປະຈໍາສໍານັກງານນາຍົກລັດຖະມົນຕີ, ປະທານຄະນະກໍາມະການແຫ່ງຊາດວ່າດ້ວຍສິດທິມະນຸດ ພ້ອມດ້ວຍຄະນະຜູ້ແທນຈໍານວນ 25 ​ທ່ານ ທີ່ຕາງໜ້າໃຫ້ກະຊວງການຕ່າງປະເທດ, ກະຊວງປ້ອງກັນຄວາມສະຫງົບ, ກະຊວງຍຸຕິທໍາ, ກະຊວງຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ, ກະຊວງພາຍໃນ, ກະຊວງແຮງງານ ແລະ ສະຫັວດດີການສັງຄົມ, ກະຊວງກະສິກໍາ ແລະ ປ່າໄມ້, ສະພາແຫ່ງຊາດ, ສານປະຊາຊົນສູງສຸດ ແລະ ສູນກາງສະຫະພັນແມ່ຍິງລາວ ໄດ້ເຂົ້າຮ່ວມກອງປະຊຸມ ຄັ້ງທີ 35 ຂອງໜ່ວຍງານ ທົບທວນປະຈຳໄລຍະດ້ານສິດທິມະນຸດ (UPR Working Group) ຂອງສະພາສິດທິມະນຸດ, ທີ່ ສໍານັກງານອົງການ ສະຫະປະຊາຊາດ ປະຈໍານະຄອນເຊີແນວ, ປະເທດສະວິດ, ເພື່ອປ້ອງກັນບົດລາຍງານແຫ່ງ ຊາດດ້ານສິດທິມະນຸດພາຍໃຕ້ ກົນໄກ UPR ໃນຮອບວຽນທີ 3.
ການທົບທວນປະຈໍາໄລຍະ ຫລື Universal Periodic Review (UPR) ແມ່ນກົນໄກຫນຶ່ງຂອງສະພາສິດທິມະນຸດ ທີ່ ໄດ້ຮັບການສ້າງຕັ້ງຂຶ້ນພາຍໃຕ້ກົດບັດຂອງອົງການ ສປຊ, ເຊິ່ງປະເທດສະມາຊິກ ສປຊ ທຸກໆປະເທດ, ໂດຍບໍ່ມີການຈໍາແນກ, ມີພັນທະເຂົ້າຮ່ວມການທົບທວນດັ່ງກ່າວທີ່ຈັດຂຶ້ນທຸກໆ 4 ປີເຄິ່ງ, ບົນພື້ນຖານຄວາມສະເຫມີພາບ ແລະ ເຄົາລົບຊິ່ງກັນ ແລະ ກັນ.
ໃນການທົບທວນໃນຮອບວຽນທີ 3 ນີ້, ໜ່ວຍງານເຮັດວຽກເພື່ອການທົບທວນ ໄດ້ປະເມີນ ແລະ ທົບທວນຄືນກ່ຽວກັບການຈັດຕັ້ງປະຕິບັດ ສິດທິມະນຸດ ລວມທັງ ຂໍ້ສະເໜີແນະ ຈຳນວນ116 ຂໍ້ ທີ່ ສປປ ລາວ ໄດ້ຮັບເອົາໃນຮອບວຽນທີ 2 ໃນປີ 2015.
ໃນກອງປະຊຸມທົບທວນຄັ້ງນີ້ ໄດ້ມີຜູ້ຕາງຫນ້າຈາກປະເທດສະມາຊິກ ສປຊ ຕ່າງໆເຂົ້າຮ່ວມ ແລະ ໃນນັ້ນ 93 ປະເທດໄດ້ປະກອບຄໍາເຫັນ ແລະ ມີຂໍ້ສະເໜີແນະຕໍ່ ສປປ ລາວ ເພື່ອນໍາໄປພິຈາລະນາ ແລະ ຮັບຮອງເອົາບົນພື້ນຖານຄວາມສະໝັກໃຈ ເພື່ອຈັດຕັ້ງປະຕິບັດໃນຕໍ່ໜ້າ; ພ້ອມກັນນັ້ນ, ກໍ່ຍັງມີການເຂົ້າຮ່ວມຂອງຜູ້ຕາງຫນ້າອົງການຈັດຕັ້ງສາກົນ, ອົງການຈັດຕັ້ງສາກົນບໍ່ຂຶ້ນກັບລັດຖະບານ ແລະ ອົງການຈັດຕັ້ງທາງສັງຄົມຈຳນວນຫນຶ່ງໃນຖານະຜູ້ສັງເກດການ.
ທ່ານ ບຸນເກີດ ສັງສົມສັກ ໄດ້ຍົກໃຫ້ເຫັນໃນເວລາກ່າວເປີດກອງປະຊຸມເຖິງການໃຫ້ຄວາມສໍາຄັນຂອງລັດຖະບານລາວ ຕໍ່ການຮ່ວມມືກັບສາກົນໃນວຽກງານການສົ່ງເສີມ ແລະ ປົກປ້ອງສິດທິມະນຸດ ແລະ ການເຂົ້າຮ່ວມການທົບທວນໃນຄັ້ງນີ້. ພ້ອມດຽວກັນນັ້ນ, ທ່ານກໍ່ໄດ້ຍົກໃຫ້ເຫັນເຖິງຜົນສໍາເລັດ ແລະ ຄວາມຄືບຫນ້າໃນການຈັດຕັ້ງປະຕິບັດສິດທິມະນຸດຢູ່ ສປປ ລາວ ນັບແຕ່ການທົບທວນຄັ້ງທີ 2 ຜ່ານມາ, ຊຶ່ງລັດຖະບານໄດ້ມີການທົບທວນນະໂຍບາຍ, ປັບປຸງລັດຖະທໍາມະນູນ ແລະ ກົດຫມາຍຫລາຍສະບັບ ທີ່ ພົວພັນເຖິງການຜັນຂະຫຍາຍພັນທະຂອງ ສປປ ລາວ ພາຍໃຕ້ສົນທິສັນຍາສາກົນດ້ານສິດທິມະນຸດ ທີ່ ສປປ ລາວ ເປັນພາຄີ 7 ສະບັບ ຈົນມາຮອດປະຈຸບັນ.


ນອກຈາກນັ້ນ, ທ່ານກໍ່ໄດ້ຍົກໃຫ້ເຫັນຄວາມຄືບໜ້າ ໃນການປັບປຸງບູລະນະການປົກຄອງ, ການສ້າງລັດແຫ່ງກົດຫມາຍ, ການພັດທະນາເສດຖະກິດ-ສັງຄົມ, ການລົບລ້າງຄວາມທຸກຍາກ, ການປະຕິບັດເປົ້າໝາຍການພັດທະນາແບບຍືນຍົງຂອງ ສປຊ, ການຮ່ວມມືສາກົນດ້ານສິດທິມະນຸດ ກໍ່ລ້ວນແລ້ວແຕ່ແມ່ນຕົວຊີ້ວັດທີ່ສະແດງໃຫ້ເຫັນ ຄວາມພະຍາຍາມຢ່າງຕັ້ງໜ້າຂອງລັດຖະບານ ໃນການສ້າງເງື່ອນໄຂ ແລະ ສະພາບແວດລ້ອມ, ໃນໄລຍະ 5 ປີຜ່ານມາ, ເພື່ອເຮັດໃຫ້ປະຊາຊົນລາວບັນດາເຜົ່າສາມາດຊົມໃຊ້ສິດທິຂອງເຂົາເຈົ້າທາງດ້ານການເມືອງ, ພົນລະເມືອງ, ເສດຖະກິດ, ສັງຄົມ ແລະ ວັດທະນະທໍາ, ຕາມລັດຖະທໍາມະນູນ ແລະ ກົດຫມາຍ ໄດ້ຢ່າງເຕັມສ່ວນ.
ໃນກອງປະຊຸມຄັ້ງນີ້, ມີຫຼາຍປະເທດໄດ້ສະແດງຄວາມຊົມເຊີຍຕໍ່ຜົນສໍາເລັດທີ່ ສປປ ລາວ ຍາດມາໄດ້ໃນການປະຕິບັດສິດທິມະນຸດໃນໄລຍະຜ່ານມາ ພ້ອມທັງໄດ້ມີຄຳເຫັນ ແລະ ຄຳຖາມເຈາະຈີ້ມຕໍ່ບາງບັນຫາທີ່ພົວພັນເຖິງການພັດທະນາເສດຖະກິດ-ສັງຄົມຂອງ ສປປ ລາວ, ການລຶບລ້າງຄວາມທຸກຍາກ, ການເຂົ້າເຖິງຄວາມຍຸຕິທໍາ ແລະ ການຊ່ວຍເຫຼືອລ້າທາງດ້ານກົດໝາຍສໍາລັບປະຊາຊົນຜູ້ທີ່ດ້ອຍໂອກາດ, ໂທດປະຫານຊິວິດ, ການຕ້ານການທໍລະມານ, ສະພາບເງື່ອນໄຂຄ້າຍຄຸ້ມຂັງ,​ ສິດທິຂອງຊົນເຜົ່າ, ສິດເສລີພາບດ້ານສາສະຫນາ, ສິດເສລີພາບໃນການສະແດງຄວາມຄິດຄວາມເຫັນ, ການນໍາໃຊ້ອິນເຕີແນັດ, ອົງການຈັດຕັ້ງທາງສັງຄົມ, ບັນຫາຄົນທີ່ຫາຍສາບສູນ, ສິດທິຂອງພົນລະເມືອງຕໍ່ການນໍາໃຊ້ທີ່ດິນ, ສິດທິຂອງແມ່ຍິງ, ເດັກນ້ອຍ, ການຄ້າມະນຸດ ແລະ ອື່ນໆຈໍານວນໜຶ່ງ.
ຕໍ່ບັນຫາດັ່ງກ່າວ, ຜູ້ແທນລາວທີ່ຕາງໜ້າໃຫ້ກະຊວງຂະແໜງການທີ່ກ່ຽວຂ້ອງ ກໍ່ໄດ້ໃຫ້ຂໍ້ມູນ ແລະ ຊີ້ແຈງອະທິບາຍເພີ່ມເຕີມ, ບົນພື້ນຖານນະໂຍບາຍ, ລັດຖະທໍາມະນູນ, ກົດໝາຍ ແລະ ມາດຕະການຕ່າງໆຂອງລັດ ທີ່ໄດ້ຮັບຮອງເອົາ ເພື່ອແກ້ໄຂບັນຫາດັ່ງກ່າວ, ອັນໄດ້ເຮັດປະເທດສະມາຊິກ ສປຊ ກໍ່ຄື ສະພາສິດທິມະນຸດ ແລະ ຜູ້ເຂົ້າຮ່ວມອື່ນໆມີຄວາມເຂົ້າອົກເຂົ້າໃຈເປັນຢ່າງດີກ່ຽວກັບການປະຕິບັດສິດທິມະນຸດຢູ່ ສປປ ລາວ.
ການທົບທວນໃນຄັ້ງນີ້ ແມ່ນ ດໍາເນີນໄປເປັນເວລາ 3 ຊົ່ວໂມງເຄິ່ງ ດ້ວຍບັນຍາກາດສ້າງສັນ ແລະ ກົງໄປກົງມາ.
ໃນວັນທີ 24 ມັງກອນ 2020, ຄະນະຜູ້ແທນລາວ ຍັງຈະສືບຕໍ່ເຂົ້າຮ່ວມກອງປະຊຸມຂອງຫນ່ວຍງານທົບທວນປະຈໍາໄລຍະຂອງສະພາສິດທິມະນຸດ ເພື່ອຮັບຮອງເອົາຮ່າງບົດລາຍງານການທົບທວນຂອງ ສປປ ລາວ ທີ່ກວມເອົາຈໍານວນຂໍ້ສະເຫນີແນະຈາກປະເທດຕ່າງໆທີ່ສະເໜີໃຫ້ ສປປ ລາວ ນໍາເອົາຄືນມາພິຈາລະນາຮ່ວມກັບເຈົ້າໜ້າທີ່ທີ່ກ່ຽວ ຂ້ອງ ແລະ ອົງການຈັດຕັ້ງຕ່າງໆທາງສັງຄົມ ຢູ່ ສປປ ລາວ ແລະ ໄປລາຍງານຄືນໃນກອງປະຊຸມສະພາສິດທິມະນຸດທີ່ຈະມີຂຶ້ນໃນເດືອນມິຖຸນາ 2020 ທີ່ຈະມາເຖິງ ເພື່ອຈະແຈ້ງວ່າ ຂໍ້ສະເໜີແນະໃດສອດຄ່ອງກັບນະໂຍບາຍ ແລະ ກົດໝາຍພາຍໃນຂອງພວກເຮົາ ແລະ ຂໍ້ສະເໜີແນະໃດທີ່ພວກເຮົາມີຄວາມອາດສາມາດຮັບເອົາມາຈັດຕັ້ງປະຕິບັດໄດ້ໃນຊຸມປີຕໍ່ໜ້າ.

ກອງປະຊຸມລາຍງານສະພາບການຈັດຕັ້ງປະຕິບັດ ວຽກງານໂຄງການກະສິກຳ ເພື່ອໂພສະນາການ ປະຈຳປີ 2019 ແລະ ຜ່ານທິດທາງແຜນການກິດຈະກໍຳ-ງົບປະມານປີ 2020 ຂອງແຂວງຜົ້ງສາລີ ໄດ້ເປີດຂຶ້ນຢ່າງເປັນທາງການ ໃນຕອນເຊົ້າຂອງວັນທີ 23 ມັງກອນ 2020ນີ້ ທີ່ສະໂມສອນຂອງເມືອງບູນເໜືອ ເທດສະບານໃໝ່ຂອງແຂວງຜົ້ງສາລີ ໂດຍການເຂົ້້າຮ່ວມເປັນປະທານຂອງທ່ານ ວິສັນ ວົງນະຄອນ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ຮອງປະທານຊີ້ນຳໂຄງການກະສິກໍຳເພື່ອໂພສະນາການຂັ້ນແຂວງ ແຂວງຜົ້ງສາລີ; ມີທ່ານ ສີໂສວັດ ພັນດານຸວົງ ຕາງໜ້າຈາກກະຊວງກະສິກໍຳ ແລະ ປ່າໄມ້, ຜູ້ປະສາງານໂຄງການກະສິກຳເພື່ອໂພສະນາການຂັ້ນສູນກາງ;  4 ເມືອງເປົ້າໝາຍ, ຜູ້ປະສານງານໂຄງການຂັ້ນແຂວງ, ຜູ້ຊີ້ນໍຳກຸ່ມການຈັດຕັ້ງປະຕິບັດປູກຝັງ ແລະ ລ້ຽງສັດ ຂອງບ້ານເປົ້າໝາຍໂຄງການ ຈາກເມືອງບູນໃຕ້, ເມືອງຂວາ, ເມືອງໃໝ່ ແລະ ເມືອງສຳພັນ.

ໃນກອງປະຊຸມທ່ານ ນາງ ບົວເພັງ ອີນສົມດີ ຜູ້ປະສານງານໂຄງການກະສິກຳເພື່ອໂພສະນາການຂັ້ນແຂວງ ໄດ້ຂຶ້ນລາຍງານສະພາບການຈັດຕັ້ງປະຕິບັດ ວຽກງານໂຄງການກະສິກຳ ເພື່ອໂພສະນາການ ປະຈຳປີ 2019 ແລະ ຜ່ານທິດທາງແຜນການກິດຈະກຳ-ງົບປະມານປີ 2020 ເຊິ່ງໂຄງການກະສິກຳເພື່ອໂພສະນາການແຂວງຜົ້ງສາລີໄດ້ກວມເອົາຈຳນວນ 4 ເມືອງ, 136 ບ້ານ, 9 919 ຄອບຄົວ ໃນນັ້ນຄອບຄົວທຸກຍາກ 4 612 ຄອບຄົວ ແລະ ຄອບຄົວແມ່ຍິງເປັນຫົວໜ້າ 413 ຄອບຄົວ ປີ 2019 ແມ່ນເລັ່ງໃສ່ດ້ານໂຄງລ່າງພື້ນຖານຂັ້ນບ້ານ, ສ້າງຕັ້ງກຸ່ມຜະລິດກະສິກໍຳ, ວຽກສູນສະຖານີບໍລິການເຕັກນິກ ແລະ ວຽກສູນຮຽນຮູ້ກະສິກຳເພື່ອໂພສະນາການ ເປົ້າໝາຍຫຼັກແມ່ນແມ່ຍິງຖືພາ, ແມ່ລູກອ່ອນ ແລະ ເດັກອາຍຸລຸ່ມ 2 ປີ ພ້ອມສ້າງຄວາມເຂັ້ມແຂງໃຫ້ພະນັກງງານຂັ້ນທ້ອງຖິ່ນ ແລະ ອື່ນໆ ທີ່ຕິດພັນກັບ 4 ອົງປະກອບຫຼັກຂອງໂຄງການ ເພື່ອຈັດຕັ້ງປະຕິບັດໃຫ້ສອດຄ່ອງກັບ 4 ກິດຈະກໍາຫຼັກຂອງກະສິກໍາ. ໃນນີ້ປີ2019 ໄດ້ຮັບທຶນຈາກໂຄງການກະສິກຳເພື່ອໂພສະນາການມີ 47 ບ້ານ, 930 ຄອບຄົວ ມູນຄ່າ 930 ລ້ານກີບ; ກຸ່ມການຜະລິດກະສິກຳ 52 ບ້ານ 66 ກຸ່ມ, ສະມາຊິກ 736 ຄົນ ລວມທຶນ 2 ຕື້ 4 ຮ້ອຍລ້ານກວ່າກີບ; ກໍ່ສ້າງພື້ນຖານໂຄງລ່າງຂັ້ນບ້ານສຳເລັດ 94 ໂຄງການ 18ຕື້້ 9 ຮ້ອຍກວ່າລ້ານກີບ.

ໃນກອງປະຊຸມຜູ້ເຂົ້້າຮ່ວມຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດ ວຽກງານໂຄງການກະສິກຳ ເພື່ອໂພສະນາການ ອົງປະກອບທີ່2; ສະພາບການຜັນຂະຫຍາຍບົດບັນທຶກ ກອງປະຊຸມ 6 ເດືອນທ້າຍປີ 2019 ຂອງຄະນະຊີ້ນຳຂັ້ນແຂວງ ແລະ ເມືອງ; ສະພາບການຈັດຕັ້ງປະຕິບັດກິດຈະກຳກຸ່ມລ້ຽງແບ້ ບ້ານລາກຸ ເມືອງບູນໃຕ້, ກຸ່ມລ້ຽງປາບ້ານແສນອາດເມືອງໃໝ່, ກິດຈະກຳສວນຄົວບ້ານຫ້ວຍມ່ວນ ເມືອງຂວາ. ພ້ອມນີ້ໃນກອງປະຊຸມຄະນະຊີ້ນຳໂຄງການຂັ້ນເມືອງ 4 ເມືອງເປົ້້າໝາຍ, ພາກສວ່ນກ່ຽວຂອງຂັ້ນແຂວງ-ຂັ້ນສູນກາງ ແລະ ຜູ້ປະສານງານຂັ້ນເມືອງ ຍັງຈະໄດ້ຄົ້ນຄວ້າປະກອບຄຳຄິດຄໍຳເຫັນ ແລະ ພ້ອມກັນຮັບຮອງເອົາບົດລາຍງານສະພາບການຈັດຕັ້ງປະຕິບັດ ວຽກງານໂຄງການກະສິກຳ ເພື່ອໂພສະນາການ ປະຈຳປີ 2019 ແລະ ຜ່ານທິດທາງແຜນການກິດຈະກຳ-ງົບປະມານປີ 2020.

ກອງປະຊຸມຄັ້ງນີ້ຈະໄດ້ດຳເນີນເປັນເວລາ 2 ວັນ ຮອດວັນທີ 24 ມັງກອນຈຶ່ງຈະສຳເລັດ.

ຂ່າວ: ສົມຄິດ ແກ້ວນວນລາ

ກອງປະຊຸມສະຫຼຸບວຽກງານການເງິນປະຈຳປີ 2019 ແລະ ແຜນປະຈຳປີ 2020 ຂະແໜງສາທາລະນະສຸກ 9 ແຂວງພາກເໜືອ ໄຂຂຶ້ນໃນວັນທີ 23 ມັງກອນ 2020 ນີ້ ທີ່ຫ້ອງປະຊຸມ ພັດທະຄານອຸດົມຄຳ ເທດສະບານແຂວງອຸດົມໄຊ ໂດຍການເປັນປະທານຂອງທ່ານ ຮອງສາດສະດາຈານ ດ໋ອກເຕີ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ມີ ທ່ານ ສົມພອນ ຜາງມະນີວົງ ຫົວໜ້າກົມການເງິນ ກະຊວງສາທາລະນະສຸກ, ມີຫົວໜ້າກົມ ຮອງກົມ ທີ່ກ່ຽວຂ້ອງພາຍໃນກະຊວງສາທາລະນະສຸກ ພ້ອມດ້ວຍຫົວໜ້າພະແນກສາທາລະນະສຸກ 9 ແຂວງພາກເໜືອ ແຂກເຊີນ ຈາກພາກສ່ວນທີ່ກ່ຽວຂ້ອງເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້ ເພື່ອສະຫຼຸບລາຍງານ ຄວາມຄືບໜ້າແຜນປະຕິຮູບດ້ານການເງິນ ແລະ ຖອດຖອນບົດຮຽນດ້ານການຈັດຕັ້ງປະຕິບັດງົບປະມານ ປະຈຳປີ 2019, ປຶກສາຫາລື ແລະ ແນະນຳການຈັດຕັ້ງປະຕິບັດແຜນການເງິນ ແລະ ແຜນການເງິນປີ 2020, ປຶກສາຫາລືກ່ຽວກັບການຄຸ້ມຄອງການເງິນ ຂະແໜງສາທາລະນະສຸກ ບັນຫາ ແລະ ວິທີການປະຕິບັດ-ແກ້ໄຂ, ການໃຊ້ຈ່າຍໃນຂະແໜງສາທາລະນະສຸກ ແລະ ການຄຸ້ມຄອງການເງິນພາກລັດໃນຂະແໜງການ, ການສ້າງແຜນ ຈັດສັນ ແລະ ດັດແກ້ງົບປະມານ, ການຄຸ້ມຄອງລາຍຮັບ ແລະ ນຳໃຊ້ເງິນຄ່າບໍລິການວິຊາການ-ເງິນຊົດເຊີຍ ຈາກລະບົບປະກັນສຸຂະພາບ, ການຄຸ້ມຄອງການໃຊ້ຈ່າຍ ແລະ ນຳໃຊ້ງົບປະມານທີ່ມີປະສິດທິຜົນ, ການຄຸ້ມຄອງດ້ານບັນຊີແຫ່ງລັດຂອງຂະແໜງສາທາລະນະສຸກ, ການຕິດຕາມກວດກາ ແລະ ລາຍງານດ້ານການເງິນ. ພ້ອມດຽວກັນບັນດາຜູ້ແທນກອງປະຊຸມຍັງໄດ້ຮັບຟັງການຜ່ານບັນດາເອກະສານສຳຄັນ ເປັນຕົ້ນແມ່ນ ຄວາມຕ້ອງການດ້ານງົບປະມານ  ແລະ ທ່າອ່ຽງຂອງການຕອບສະໜອງຂອງບັນດາແຫຼ່ງທຶນໃນອານາຄົດ, ລາຍງານຜົນສຳເລັດຂອງວຽກງານໃນການຈັດຕັ້ງປະຕິບັດແຜນການປະຈຳປີ 2019 ຄາດໝາຍຕົ້ນຕໍໃນປີ 2020 ຂອງວຽກງານສາທາລະນະສຸກໂດຍລວມ ແລະ ສະເພາະ 9 ແຂວງພາກເໜືອ, ບັນຫາທີ່ພົບຈາກຜົນການສຶກສາ ບັນຊີບັນຊີສາທາລະນະສຸກແຫ່ງຊາດປະຈຳປີ 2018  ແລະ ການສຶກສາລະບົບການຄຸ້ມຄອງການເງິນພາກລັດຂະແໜງສາທາລະນະສຸກ,  ການປະຕິບັດກົນໄກຄຸ້ມຄອງການເງິນລວມສູນ- ປະຕູດຽວ ທາງດ້ານການເງິນ ຂັ້ນທ້ອງຖິ່ນ, ກອງປະຊຸມຍັງໄດ້ຮັບຟັງການມີຄວາມເຫັນຂອງທ່ານ ຮອງສາດສະດາຈານ ດ໋ອກເຕີ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ທ່ານໄດ້ຕີລາຄາສູງກ່ຽວກັບວຽກງານຂະແໜງສາທາລະນະສຸກ ແລະ ທັງໄດ້ເນັ້ນໃຫ້ບັນດາພະແນກສາທາລະນະສຸກ 9 ແຂວງ ໃຫ້ເອົາໃຈໃສ່ເຂົ້າໃນວຽກງານສົ່ງເສີມ ແລະ ດູແລສຸຂະພາບຂອງປະຊາຊົນບັນດາເຜົ່າໃຫ້ສູງ ເພາະວ່າຜ່ານມາຖ້າທຽບໃສ່ແຜນປີແລ້ວແມ່ນຍັງຕ່ຳ, ສຸມໃສ່ປະຕິບັດຂໍ້ຄົງຄ້າງໃນຊຸມປີຜ່ານມາໃຫ້ບັນລຸເປົ້າໝາຍ, ຈະຕ້ອງເປັນເຈົ້າການໃນການປະກອບສ່ວນທາງດ້ານສັງຄົມ, ສຸມທຸກສະຕິບັນເຂົ້າໃນການປະກອບຄວາມຄິດເຫັນເຂົ້າໃນວຽກງານຂະແໜງສາທາໃຫ້ຫຼາຍ, ເອົາໃຈໃສ່ເຂົ້າໃນການຄຸ້ມຄອງດ້ານການເງິນໃຫ້ໂປ່ງໃສ່ ໃຊ້ງົບປະມານໃຫ້ຖືກຕາມເປົ້າໝາຍ ແລະ ອື່ນໆ.

ກອງປະຊຸມຄັ້ງນີ້ແມ່ນຈະດຳເນີນໄປເປັນເວລາ 2 ວັນຈຶ່ງສຳເລັດ.

ຂ່າວ: ແສງອາທິດ

ກອງ​ປະຊຸມ​ໃຫ່ຍຄັ້ງທີ V ຂອງ​ອົງຄະ​ນະ​ພັກ, ກ​ອງບັນຊາ​ການ​ທະຫານ​ແຂວງ​ບໍລິ​ຄໍາ​ໄຊ, ​ໄດ້​ໄຂ​ຂື້ນຢ່າງ​ເປັນ​ທາງ​ການ ​ໃນ​ວັນ​ທີ່ 22 ມັງ​ກອນ 2020 ນີ້, ຢູ່​ທີ​ຫ້ອງ​ປະຊຸມ​ກອງ​ບັນຊາ​ການ​ທະ​ຫານ​ແຂວງ​ບໍລິ​ຄໍາ​ໄຊ, ​ໂດຍ​ພາຍ​ໄຕ້​ການ​ເປັນ​ປະທານ​ຂອງສະຫາຍ ພົນ​ຈັດຕະວາ ຈວງ​ຈັນ ລາດ​ສະ​ວົງ, ຄະນະ​ປະ​ຈໍາ​ພັກ​ແຂວງ, ​ເລຂາ​ຄະນະ​ພັກ​ ຫົວໜ້າການ​ເມືອງ​ກອງ​ບັນຊາ​ການ, ທະຫານ​ແຂວງ​ບໍລິ​ຄໍາ​ໄຊ, ​ໃຫ້ກຽດ​ເຂົ້າຮ່ວມ​ໃນ​ພິທີ, ຂອງ​ສະຫາຍ ກອງ​ແກ້ວ ​ໄຊ​ສົງຄາມ, ກໍາມະການ​ສູນ​ກາງ​ພັກ, ​ເລຂາ​ຄະນະ​ບໍລິຫານ​ງານ​ພັກ​ແຂວງ, ​ເຈົ້າ​ແຂວງ​ບໍລິ​ຄໍາ​ໄຊ, ມີ​ຕາງໜ້າກົມ​ຈັດຕັ້ງພັກ ,ກະຊວງ​ປ້ອງ​ກັນ​ປະ​ເທດ, ມີບັນດາຄະນະ​ພັກ​ຮາກ​ຖານ, ​ໜ່ວຍພັກ​ຮາກ​ຖານ, ​ແຕ່​ລະ​ກົມ​ກອງ​ທີ່​ຂື້ນກັບ, ກອງ​ບັນຍາ​ການ​ທະຫານ​ແຂວງ ​ແລະ ​ແຂກ​ຖືກ​ເຊີນ, ຈາກ​ພະ​ແນ​ກການ​ອ້ອມ​ຂ້າງ​ແຂວງ ​ແລະ ກອງ​ບັນຊາ​ການ​ທະຫານ​ແຂວງ​ອ້ອມຂ້າງ​ເຂົ້າຮ່ວມ 131 ສະຫາຍ ​ໃນ​ນັ້ນຜູ້​ແທນ​ສົມບູນ 111 ສະຫາຍ.


ກອງ​ປະຊຸມ​ຄັ້ງນີ້ໄດ້​ຮັບ​ຟັງ​, ການຜ່ານ​ບົດ​ລາຍ​ງານ​ການ​ເມືອງ​ທັງ​ສອງ​ພາກ, ຈາກ​ສະຫາຍ ພົນ​ຈັດຕະວາ ຈວງ​ຈັນ ລາດ​ສະ​ວົງ, ​ເລຂາ​ຄະນະ​ພັກ ຫົວໜ້າການ​ເມືອງ, ກອງ​ບັນຊາ​ການ​ທະຫານ​ແຂວງ​ບໍລິ​ຄໍາ​ໄຊ, ​ເຊີ່ງ​ໄດ້​ຕີ​ລາຄາໝາກຜົນ, ​ແຫ່ງ​ການ​ນໍາພາ-​ຊີ້ນໍາ ຈັດຕັ້ງປະຕິບັດ, ມະຕິ​ກອງ​ປະຊຸມ​ໃຫຍ່​ຄັ້ງທີ IV ຂອງ​ອົງຄະ​ນະ​ພັກ, ກອງ​ບັນຊາ​ການ​ທະຫານ​ແຂວງ​ບໍລິ​ຄໍາ​ໄຊ, ​ໃນ​ໄລຍະ​ຜ່ານ​ມາ ຍົກ​ໃຫ້​ເຫັນ​ດ້ານ​ດີ ດ້ານ​ອ່ອນ, ຂໍ້ຄົງຄ້າງ ທີ​ຈະ​ຕ້ອງ​ໄດ້​ແກ່​ໄຂ​ໃນຕໍ່ໜ້າ. ​​ໂດຍ​ສະ​ເພາະ​ຜ່ານ​ມາ, ໄດ້​​ຫັນ​ເອົາ​ພະນັກງານ, ລົງ​ກໍ່ສ້າງ​ຮາກ​ຖານ​ຢູ່​ບ້ານ ​ແລະ ກຸ່ມ​ບ້ານ​ຕາມ​ການ​ມອບໝາຍ ປະຕິບັດ​ຕາມ​ມູນ​ເຊື້ອຂອງ​ກອງ​ທັບ. ກົມ​ກອງຕັ້ງທັບ​ຢູ່​ບ່ອນ​ໃດ. ກໍ່​ແບ່ງປັນ​ມອບໝາຍ​ໃຫ້​ພະນັກງານ, ລົງ​ກໍ່ສ້າງຮາກ​ຖານ​ການ​ເມືອງ, ຕິດ​ແໜ້ນກັບ​ປະຊາຊົນ, ​ໄດ້​ຕັ້ງກອງກໍ່ສ້າງ​ຮາກ​ຖານ 215 ປະ​ຈໍາ​ຢູ່ 3 ຈຸດ, ທີ່ມີ​ຄວາມ​ຫຼໍ່​ແຫຼມ, ​ເພື່ອ​ປຸກລະດົມ​ຂົນຂວາຍ, ອົງການ​ປົກຄອງ​ບ້ານ, ພໍ່​ແມ່​ປະຊາຊົນ​ບັນດາ​ເຜົ່າ, ​ເຂົ້າຮ່ວມ​ເຮັດ​ວຽກປ້ອງ​ກັນຊາດ-​ປ້ອງ​ກັນ​ຄວາມ​ສະຫງົບ, ຢ່າງ​ກວ້າງຂວາງ, ຕິດພັນ​ກັບ​ການ​ປຸກລະດົມ, ຊຸກຍູ້ ປະຕິບັດ​ວຽກງານ​ສາມ​ສ້າງ. ນໍາພາ​ຮົບ​ຮົມ-ຫັດ​ແອບ​ສ້າງ​ຄອບຄົວ-ບ້ານ​ປ້ອງ​ກັນຊາ​ດ​ເຂັ້ມ​ແຂງ​ໄດ້ 3 ​ ບ້ານ​ທົ່ວ​ແຂວງ, ຕິດຕາມ​ກໍາ​ແໜ້ນປະຊາຊົນ​ຍ້າຍ​ຖິ່ນ​ຖານ​ບໍ່ຖືກຕ້ອງ, ພາກສ່ວນ​ທີ່ເຂົ້າ​ເມືອງ​ພິດ​ກົດໝາຍ, ພ້ອມ​ທັງສຶກສາ​ອົບຮົມ​ໃຫ້​ເຂົ້າ​ເຈົ້າ. ປະຕິບັດ​ຕາມ​ລະບຽບກົດໝາຍ ຂອງ ສປປ ລາວ,​ ວາງ​ອອກຢ່າງ​ເຂັ້ມງວດ .​ໄດ້​ເຮັດ​ໃຫ້​ແຕ່ລະ​ເຂດ, ​ແຕ່​ລະ​ບ້ານ​ມີ​ຄວາມ​ສະຫງົບ​ປອດ​ໄພ. ຈັດຕັ້ງກໍາລັງ​ອອກ​ເຄື່ອນ​ໄຫວ​ນ້ອຍ-​ໃຫຍ່ ​ໄດ້ 6 ຮ້ອຍ​ກວ່າ​ຄັ້ງ. ​ເພື່ອ​ຄອບ​ຄຸມຕິດຕາມ, ກໍາ​ແໜ້ນ​ເປົ້າໝາຍຢູ່​ບໍລິ​ເວນ​ພື້ນທີ່. ບໍ່​ໃຫ້​ມີ​ການ​ເຄື່ອນໄຫວ, ກໍ່ຄວາມ​ບໍ່ສະຫງົບ, ​ພ້ອມ​ທັງທໍາລາຍ​ສວນ​ຊາ-​ສວນ​ຝີ່ນ ​ໄດ້ 2 ຮ້ອຍ​ກວ່າ​ສວນ, ມີ​ເນື້ອທີ່ 1 ຮ້ອຍ​ກວ່າ​ເຮັກ​ຕ່າ, ຢຶດ ​ແລະ ທໍາລາຍ​ກັນຊາ​ໄດ້ 7 ພັນ​ກວ່າ​ກິ​ໂລ, ​ເກັບ​ກູ້​ອາວຸດ​ເສິກ​ໄດ້ 1 ຮ້ອຍ​ກວ່າ​ກະບອກ, ອາວຸດ​ຫຼ່າ​ເນື້ອ​ໄດ້ 1 ພັນ​ກວ່າ​ກະບອກ ​ແລະ ​ວຽກງານ ອື່ນໆ ຈາກ​ນັ້ນ ​ຄະນະ​ພັກ​ກົມ​ກອງ, ຫົວໜ້າພະ​ແນ​ກ, ແຂກ​ຖືກ​ເຊີນທີ່​ເຂົ້າຮ່ວມ, ​ເປັນ​ຕົົ້ນ ກອງ​ບັນຍາ​ການ​ທະຫານ​ແຂວງ​ຄໍາ​ມ່ວນ, ຫ້ອງ​ເສນາ, ພະ​ແນ​ກສະຫະພັນ​ແມ່ຍິງ. ກອງພັນ 619 ​ແລະ ກອງຮ້ອຍ 25 ກໍ່​ໄດ້​ພັດ​ປຽ່ນກັນ​ປະກອບ​ຄໍາ​ເຫັນ. ຕໍ່ກອງ​ປະຊຸມ, ພ້ອມ​ທັງຜ່ານ​ບົດ​ສໍາ​ຫຼວດ. ການ​ນໍາພາ​ລວມ, ຈາກ​ຄະນະ​ພັກຊຸດ​ເກົ່າ, ຂອງກອງ​ບັນຊາ​ການ​

ທະຫານ​ແຂວງບໍລິ​ຄໍາ​ໄຊນໍາ​ອີກ

ຂ່າວ-​ພາບ/ພູ​ວົງ

ພິທີມອບທຸງໄຊນໍາໜ້າຂະບວນການແຂ່ງຂັນ 4 ບຸກໃຫ້ຄະນະຊາວໜຸ່ມປະຊາຊົນປະ ຕິວັດລາວ ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ ຈັດຂຶ້ນໃນຕອນບ່າຍວັນທີ22 ມັງກອນ 2020 ທີ່ຫໍວັດທະນະທໍາແຫ່ງຊາດ ນະຄອນຫລວງວຽງຈັນ, ມີ ທ່ານ ບົວເງິນ ຊາວພູວົງ ຮອງເລຂາຄະນະພັກກະຊວງ, ຮອງລັດຖະມົນຕີກະຊວງຖະແຫລງຂ່າວ ວັດທະ ນະທໍາ ແລະ ທ່ອງທ່ຽວ, ທ່ານ ບຸນຕາ ເທບພະວົງ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ພ້ອມດ້ວຍຄະນະປະຈໍາພັກກະຊວງ, ຜູ້ຊີ້ນໍາອົງການຈັດຕັ້ງມະຫາຊົນ, ຮອງເລຂາໜ່ວຍພັກ ຄະນະໜ່ວຍຊາວໜຸ່ມຮາກຖານອ້ອມຂ້າງກະຊວງ ຖະແຫລງຂ່າວ ວັດທະນະທໍາ ແລະ ທ່ອງທ່ຽວ ເຂົ້າຮ່ວມ.

ທ່ານ ວຽງພອນ ສຸຂະວົງ ຮອງເລຂາຄະນະບໍລິຫານງານຊາວໜຸ່ມກະຊວງ ຖະແຫລງຂ່າວ ວັດທະນະທໍາ ແລະ ທ່ອງທ່ຽວໄດ້ຜ່ານບົດສະຫລຸບ ແລະ ທິດທາງແຜນການ 4 ບຸກໃນຕໍ່ໜ້າໂດຍຍົກໃຫ້ເຫັນວ່າໄລຍະຜ່ານມາ, ຄະນະບໍລິຫານງານຊາວໜຸ່ມກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວໄດ້ເອົາໃຈໃສ່ເຄື່ອນໄຫວວຽກງານຂອງຕົນຕິດພັນກັບວິຊາສະເພາະຢ່າງສະນິດແໜ້ນ ແລະ ຕັ້ງໜ້າສາມາດຍາດໄດ້ຜົນສໍາເລັດອັນຍິ່ງໃຫຍ່ ແລະ ກວ້າງຂວາງ ເຮັດໃຫ້ການຈັດຕັ້ງ ແລະ ບຸກຄົນໃນຖັນແຖວຊາວໜຸ່ມກາຍເປັນຕົວແບບ 4 ບຸກ ມີຄວາມເຂັ້ມແຂງໜັກແໜ້ນ, ມີຄວາມສາມັກຄີພາຍໃນ, ມີແບບແຜນວິທີເຮັດວຽກ, ວ່ອງໄວ ແລະ ມີຄຸນນະພາບ, ຖືເອົາວຽກງານການນໍາພາດ້ານການເມືອງແນວຄິດເປັນຕົ້ນຕໍ.

ຮອງເລຂາຄະນະບໍລິຫານງານຊາວໜຸ່ມກະຊວງ ຖະແຫລງຂ່າວ ວັດທະນະທໍາ ແລະ ທ່ອງທ່ຽວໃຫ້ຮູ້ຕື່ມວ່າ: ຊາວໜຸ່ມກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວສະໄໝທີ 7 ປະກອບມີ 44 ໜ່ວຍຊາວໜຸ່ມຮາກຖານ, ມີສະມາຊິກຊາວໜຸ່ມທັງໝົດ 1.300 ກວ່າຄົນ ຍິງ 622 ຄົນ.ໃນນີ້  264 ຄົນ ເປັນນັກຮຽນທີ່ສັງກັດຢູ່ໂຮງຮຽນສີລະປະດົນຕີແຫ່ງຊາດ ແລະ ສະຖາບັນວິຈິດສິນແຫ່ງຊາດກວມເອົາຫລາຍກ່ວາ 19 ສ່ວນຮ້ອຍຂອງສະມາຊິກຊາວໜຸ່ມພາຍໃນກະຊວງທັງໝົດ.%

 

ກອງປະຊຸມຄະນະກຳມະການຊາຍແດນ ລາວ-ຈີນ ຄັ້ງທີ XVII ໄດ້ຈັດຂຶ້ນໃນລະຫວ່າງວັນທີ 12-14 ມັງກອນ 2020 ທີ່ ນະຄອນຫຼວງພະບາງ, ແຂວງຫຼວງພະບາງ, ສປປ ລາວ. ຄະນະຜູ້ແທນຝ່າຍລາວ ນໍາໂດຍ ທ່ານ ອານຸສິນ ຂັດຕິຍະລາດ, ຫົວໜ້າຫ້ອງການຄະນະກຳມະການຊາຍແດນແຫ່ງຊາດ, ກະຊວງການຕ່າງປະເທດ    ແຫ່ງ ສປປ ລາວ, ຫົວໜ້າຄະນະກຳມະການຊາຍແດນ ລາວ-ຈີນ ແລະ ຝ່າຍຈີນ ນໍາໂດຍ ທ່ານ ​ເຫວີຍ ຫົງ​ທຽນ,   ເອກອັກຄະລັດຖະທູດ, ກົມກິດຈະການຊາຍແດນ ແລະ ທະເລ, ກະຊວງການຕ່າງປະເທດ ແຫ່ງ ສປ ຈີນ, ຫົວໜ້າຄະນະກຳມະການຊາຍແດນ ຈີນ-ລາວ, ພ້ອມດ້ວຍຜູ້ຕາງໜ້າຈາກພາກສ່ວນກ່ຽວຂ້ອງຂອງສູນກາງ ແລະ ແຂວງທີ່ມີຊາຍແດນຕິດຈອດກັນ.

ສອງຝ່າຍໄດ້ພ້ອມກັນສັງເກດຕີລາຄາຄືນຜົນການຈັດຕັ້ງປະຕິບັດເນື້ອໃນບົດບັນທຶກກອງປະຊຸມຄະນະກຳມະ ການຊາຍແດນ ລາວ-ຈີນ ຄັ້ງທີ XVI ໃນໄລຍະຜ່ານມາ, ເຫັນວ່າ: ສະພາບການຢູ່ຕາມບໍລິເວນຊາຍແດນລະຫວ່າງສອງປະເທດ ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍດີ, ກໍາລັງປ້ອງກັນຊາດປ້ອງກັນຄວາມສະຫງົບຂອງສອງປະເທດໄດ້ຮ່ວມກັນກວດກາລາດຕະເວນຊາຍແດນ ແລະ ກວດກາຫຼັກໝາຍຊາຍແດນຢ່າງເປັນປົກກະຕິ, ສະພາບປະກົດການຫຍໍ້ທໍ້ທີ່ເກີດຂຶ້ນກໍ່ໄດ້ຮັບການແກ້ໄຂຢ່າງທັນການ, ເຈົ້າໜ້າທີ່ກ່ຽວຂ້ອງຂອງສູນກາງ ແລະ ທ້ອງຖິ່ນໄດ້ມີການພົບປະ ແລະ ປະສານສົມທົບກັນຢ່າງເປັນປົກກະຕິ.

ເພື່ອ​ແນ​ໃສ່​ເຮັດ​ໃຫ້​ວຽກງານການຮ່ວມມື ແລະ ຄຸ້ມຄອງຊາຍແດນລະຫວ່າງສອງປະເທດ​ໃຫ້​ມີ​ປະສິດທິ​ຜົນ​ກວ່າ​ເກົ່າ, ສອງຝ່າຍໄດ້ເຫັນດີເອກກະພາບກັນວາງທິດທາງແຜນການເຄື່ອນໄຫວໃນປີ 2020 ແລະ ຈະຕ້ອງໄດ້ເພີ່ມທະວີ​ເອົາ​ໃຈ​ໃສ່​​ໃນ​ການແລກປ່ຽນຂໍ້ມູນຂ່າວສານ, ເຜີຍແຜ່ໂຄສະນານິຕິກຳກ່ຽວກັບການຄຸ້ມຄອງຊາຍແດນ ແລະ  ຫຼັກໝາຍຊາຍແດນກໍຄືສັນຍາ, ອະນຸສັນຍາໃຫ້ແກ່ເຈົ້າໜ້າທີ່ ແລະ ປະຊາຊົນຢູ່ຕາມບໍລິເວນຊາຍແດນ; ຮ່ວມກັນສະກັດກັ້ນການລັກລອບຂ້າມຊາຍແດນຜິດ​ກົດໝາຍ, ການຕັດໄມ້ທໍາລາຍປ່າ, ການຄ້າຂາຍເຖື່ອນ, ການຄ້າມະນຸດ ແລະ ປະກົດການຫຍໍ້ທໍ້ອື່ນໆທີ່ເກີດຂຶ້ນຕາມບໍລິເວນຊາຍແດນ. ນອກຈາກນີ້, ສອງຝ່າຍຍັງເຫັນດີເສີມຂະຫຍາຍການແລກປ່ຽນຮ່ວມມື ລະຫວ່າງ ບັນດາຂະແໜງການຮັບຜິດຊອບດ່ານຊາຍແດນໃຫ້ເລິກເຊິ່ງ, ເພີ່ມທະວີການກໍ່ສ້າງພື້ນຖານໂຄງລ່າງຢູ່ດ່ານຊາຍແດນ, ອຳນວຍຄວາມສະດວກ​ໃຫ້ແກ່ຄົນ ​ແລະ ພາຫະນະ​ເຂົ້າ​-ອອກ ໃນການຜ່ານດ່ານຊາຍແດນ ເພື່ອຮັບໃຊ້ການພັດທະນາເສດຖະກິດ-ສັງຄົມ ຢູ່ຕາມບໍລິເວນຊາຍແດນຂອງສອງປະເທດ. ແນໃສ່ປົກປັກຮັກສາຄວາມສະຫງົບສຸກ ແລະ ຄວາມເປັນລະບຽບຮຽບຮ້ອຍໃນການເຄື່ອນໄຫວດຳລົງຊີວິດຂອງປະຊາຊົນທີ່ຢູ່ຕາມບໍລິເວນຊາຍແດນຂອງສອງປະເທດໃຫ້ສະດວກ​ສະບາຍ​ຍິ່ງໆຂຶ້ນ.