Vietjet ໄດ້ສະເຫຼີມສະຫຼອງການຮັບເຮືອບິນ Boeing 737-8 ລໍາທໍາອິດ ຈາກການສັ່ງຊື້ທັງໝົດ 200 ລໍາ ມູນຄ່າ 32 ຕື້ໂດລາກັບບໍລິສັດຜູ້ຜະລິດເຮືອບິນຊັ້ນນຳຂອງໂລກ. ພິທີສົ່ງມອບໄດ້ຈັດຂຶ້ນໃນວັນທີ 22 ກັນຍາ 2025 ທີ່ສູນສົ່ງມອບເຮືອບິນຂອງບໍລິສັດ Boeing ທີ່ເມືອງ Seattle, ລັດ Washington, ສະຫະລັດອາເມລິກາ, ມີ ທ່ານ Luong Cuong ປະທານປະເທດຫວຽດນາມ, ພ້ອມດ້ວຍເຈົ້າໜ້າທີ່ຂັ້ນສູງຈາກທັງສອງປະເທດ ແລະ ຄູ່ຮ່ວມທຸລະກິດເຂົ້າຮ່ວມ.
ການມອບ-ຮັບເຮືອບິນຄັ້ງນີ້,ຈັດຂຶ້ນພ້ອມກັບການສະເຫຼີມສະຫຼອງຄົບຮອບ 30 ປີ ຂອງສາຍພົວພັນທາງການທູດລະຫວ່າງສະຫະລັດອາເມລິກາ-ຫວຽດນາມ ເປັນການຢືນຢັນເຖິງບາດກ້າວອັນສຳຄັນຂອງການຮ່ວມມືທີ່ເພີ່ມຂຶ້ນລະຫວ່າງ Vietjet ແລະ Boeing, ເປັນສັນຍາຂອງຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ. ສະແດງໃຫ້ເຫັນເຖິງຄວາມມຸ່ງໝັ້ນຂອງ Vietjet ໃນການຂະຫຍາຍເຄືອຂ່າຍສາກົນ ແລະ ປະກອບສ່ວນເຂົ້າໃນການພັດທະນາຂົງເຂດການບິນຢ່າງຍືນຍົງໃນພາກພື້ນ ແລະ ໃນໂລກ.
ດຣ. Nguyen Thi Phuong Thao, ປະທານຄະນະກຳມະການບໍລິຫານສາຍການບິນ Vietjet, ກ່າວວ່າ: “ເຮືອບິນ Boeing ລຳທຳອິດນີ້ ເປັນຜົນມາຈາກການຮ່ວມມືເກືອບໜຶ່ງທົດສະວັດລະຫວ່າງ Boeing ແລະ Vietjet . ເປັນການເລີ່ມຕົ້ນຂອງການສົ່ງມອບອີກຫຼາຍຮ້ອຍລຳໃນຊຸມປີຂ້າງໜ້າ. ບາດກ້າວສຳຄັນນີ້ຈະຊ່ວຍເສີມສ້າງການຄ້າສອງຝ່າຍ, ເປັນສັນຍາລັກຂອງຄູ່ຮ່ວມມືຍຸດທະສາດຮອບດ້ານລະຫວ່າງສະຫະລັດອາເມລິກາ-ຫວຽດນາມ ແລະ ສະແດງເຖິງຄວາມມຸ່ງຫວັງຮ່ວມກັນຂອງສອງຝ່າຍທີ່ຈະກ້າວສູ່ຄວາມສຳເລັດໃໝ່ໃນວົງການການບິນ. ນອກຈາກນີ້, ຍັງກໍ່ໃຫ້ເກີດຜົນປະໂຫຍດຢ່າງແທ້ຈິງຕໍ່ເສດຖະກິດຂອງທັງສອງປະເທດ ແລະ ສ້າງວຽກເຮັດງານທຳຫຼາຍຂຶ້ນ.
ເຮືອບິນລຳໃໝ່ນີ້, ພ້ອມກັບອີກຫຼາຍຮ້ອຍລຳທີ່ຈະສົ່ງມອບໃນຊຸມປີຂ້າງໜ້າ, ຈະຖືກນຳໃຊ້ເຂົ້າໃນເສັ້ນທາງການບິນທີ່ມີຄວາມຕ້ອງການສູງຂອງ Vietjet ເພື່ອຍົກລະດັບປະສົບການດ້ານການເດີນທາງໃຫ້ຜູ້ໂດຍສານຫຼາຍລ້ານຄົນ. ສໍາລັບຜູ້ໂດຍສານຂອງລາວ ສາຍການບິນນີ້ໄດ້ໃຫ້ບໍລິການຖ້ຽວບິນໂດຍກົງລະຫວ່າງ ນະຄອນຫຼວງວຽງຈັນ ແລະ ນະຄອນໂຮ່ຈີມິນມາເປັນເວລາດົນສົມຄວນແລ້ວ.
ຂ່າວ : ສົມພາວັນ ວສລ